ឧកញ៉ា លី ឆេង ផ្តល់អាហាររូបករណ៍ ១០០% ដល់ក្មេងទាំង៣ ដែលយកកង់កញ្ចាស់ទៅប្រណាំងជាមួយកង់ទំនើបៗ

Uncategorized ជុំវិញ​ឧកញ៉ា

នៅព្រឹកថ្ងៃទី១៦ ខែវិច្ឆិកា ឆ្នាំ២០២០ លោកឧកញ៉ា លី ឆេង អគ្គនាយក ប៊ែលធី គ្រុប
និងជាសាកលវិទ្យាធិការ សាកលវិទ្យាល័យ ប៊ែលធី អន្តរជាតិ បានជួបសំណេះសំណាលជាមួយក្មេងទាំង ៣នាក់ គឺ កុមារ ប៉ិច ធារ៉ា កុមារ សុវណ្ណ សាលី និងកុមារ ឆុន ភារម្យ រួមទាំងអាណាព្យាបាល បានផ្តល់អាហារូបករណ៍ ១០០% សិក្សាមួយចប់កម្មវិធីទាំងថ្នាក់ចំណេះទូទៅ និងភាសាអង់គ្លេសទូទៅ នៅសាលា ប៊ែលធី អន្តរជាតិ។

សូមចុច Subscribe Channel Telegram Oknha news គ្រប់សកម្មភាពឧកញ៉ា សេដ្ឋកិច្ច ពាណិជ្ជកម្ម និងសហគ្រិនភាព

ទំព័រហ្វេសបុកលោកឧកញ៉ា លី ឆេង បានឲ្យដឹងថា ដោយមើលឃើញពីភាពក្លាហាន ចេះតស៊ូក្នុងជីវិត និងមានក្តីស្រមៃចង់បន្តការសិក្សាឱ្យបានខ្ពស់ ថ្ងៃនេះ អ៊ំសូមផ្តល់អាហារូបករណ៍ ១០០% សម្រាប់ថ្នាក់ចំណេះទូទៅ (ពីថ្នាក់ទី៣ ដល់ទី១២) និងភាសាអង់គ្លេសទូទៅ (Preschool ដល់ Level 12) មួយចប់កម្មវិធីសិក្សាជូនដល់ក្មួយៗទាំង ៣នាក់ ឱ្យមកបន្តការសិក្សានៅសាលា ប៊ែលធី អន្តរជាតិ ដែលក្នុងនោះ រួមមាន៖ ១-កុមារា ប៉ិច ធារ៉ា អាយុ ១៣ឆ្នាំ ២-កុមារា សុវណ្ណ សាលី អាយុ ១៣ឆ្នាំ និង ៣-កុមារា ឆុន ភារម្យ អាយុ ៩ឆ្នាំ។

លោកឧកញ៉ាបានបន្តថា អ៊ំសូមកោតសរសើរក្មួយៗ បើទោះបីជាក្មួយជិះកង់ចាស់ មិនល្អដូចគេយ៉ាងណាក៏ដោយ ក៏ក្មួយមិនអស់សង្ឃឹម មិនបាក់ទឹកចិត្តនោះដែរ គឺក្មួយបានខិតខំប្រឹងប្រែងប្រកួតយ៉ាងក្លាហាន និងអស់ពីកម្លាំងកាយចិត្ត រហូតអាចទទួលបានចំណាត់ថ្នាក់លេខ៤ លេខ៥ និងលេខ៦ ក្នុងចំណោមអ្នកចូលរួមប្រកួតជាច្រើននាក់ ដែលមានទាំងជនជាតិខ្មែរ និងបរទេស។ ហើយអ៊ំក៏សូមលើកទឹកចិត្តក្មួយៗ ត្រូវខិតខំសិក្សារៀនសូត្រឱ្យបានពូកែ ធ្វើជាកូនល្អ សិស្សល្អ ពលរដ្ឋល្អនៅក្នុងសង្គម ដើម្បីក្លាយខ្លួនជាទំពាំងស្នងឫស្សី និងជាធនធានដ៏មានសារៈសំខាន់សម្រាប់ជួយអភិវឌ្ឍប្រទេសកម្ពុជានាពេលអនាគត។

លោកឧកញ៉ា លី ឆេង ថ្លែងអំណរគុណ ឯកឧត្តម គួច ចំរើន និងលោកជំទាវ ព្រមទាំងក្រុមការងារ ដែលបានជួយសម្របសម្រួលឱ្យក្មួយៗទាំង ៣នាក់ មានឱកាសបានទទួលអាហារូបករណ៍នាពេលនេះ។

សូមបញ្ជាក់ផងដែរថា ក្មេងៗទាំង ៣នាក់នេះ បានចូលរួមប្រគួតប្រណាំងកង់នៅ​ទី​លាន​ប្រណាំង​ទោច​ក្រយាន្ត​ព្រែកលាប ក្នុង​កម្មវិធី Cambodia MTB Series 2020 វគ្គទី2​កាល​ពី​ថ្ងៃ​ទី៨ ខែ វិច្ឆិកា ឆ្នាំ ២០២០ កន្លងទៅនេះ។ ពួកគាត់ទាំងនេះ បានយកកង់កញ្ចាស់ទៅប្រណាំងជាមួយកង់ទំនើបៗ។ ក្រោយឃើញសកម្មភាព នៃភាពខ្លាហានរបស់ក្មេងៗទាំងនោះ បានធ្វើឲ្យមហាជនមានការកើតសរសើរ និងល្បីពេញបណ្តាញសង្គមនាពេលបច្ចុប្បន្ននេះ។

រូបភាព៖ គឹម សុវណ្ណា