កំពង់ផែស្វយ័តក្រុងព្រះសីហនុ គឺជាកំពង់ផែទឹកជ្រៅតែមួយគត់របស់កម្ពុជា និងជាដង្ហើមសេដ្ឋកិច្ចដ៏សំខាន់បំផុតដែលបានជំរុញកំណើនសេដ្ឋកិច្ចឆ្ពោះទៅមុខជានិច្ច។ កំពង់ផែនេះមានទីតាំងនៅក្នុងតំបន់ឆ្នេរសមុទ្រខេត្តព្រះសីហនុ បានបោះមួយជំហានទៀតទៅតភ្ជាប់ទៅនឹងកំពង់ផែនៅអាស៊ីប៉ាស៊ីហ្វិកទាំងអស់។
សូមចុច Subscribe Telegram oknha_news ដើម្បីទទួលបានព័ត៌មានគ្រប់សកម្មភាពឧកញ៉ា អាជីវកម្ម ចែករំលែក ជោគជ័យ
រូបភាព កំពង់ផែស្វយ័តក្រុងព្រះសីហនុ
កំពង់ផែស្វយ័តក្រុងព្រះសីហនុ ត្រូវបានសាងសង់លើកដំបូងនៅឆ្នាំ ១៩៥៦ ហើយចាប់ផ្ដើមបន្តប្រតិបត្តិការអាជីវកម្មជាថ្មីឡើងវិញក្រោយឆ្នាំ ១៩៧៩ ដោយប្រតិបត្តិការនៅពេលនោះ ផ្ដើមចេញពីទ្រង់ទ្រាយតូចតាមរយៈការប្រើប្រាស់កម្លាំងកម្មករ ធនធានមនុស្សផ្ទាល់ សម្ភារបរិក្ខារ និងមធ្យោបាយគ្រឿងចក្រធម្មតា ដើម្បីធ្វើការលើកដាក់ទំនិញកុងតេន័រ និងបម្រើឲ្យការដឹកជញ្ជូនរបស់ខ្លួន។ ចាប់តាំងពីពេលនោះមក ដោយមានការសិក្សា និងការធ្វើឲ្យប្រសើរឡើងជាបន្តបន្ទាប់ ព្រមទាំងជំនួយបច្ចេកទេសពីបណ្ដាភ្នាក់ងារអភិវឌ្ឍន៍ និងប្រទេសជាបងប្អូនជាច្រើនផ្សេងទៀត កំពង់ផែបានរីកចម្រើន និងបោះជំហានទៅមុខឥតឈប់ឈរ ។
មកដល់ពេលបច្ចុប្បន្ននេះ កំពង់ផែ មានផ្ទៃដីសរុប ៧០ហិកតា សម្រាប់ធ្វើតំបន់សេដ្ឋកិច្ចពិសេស ហើយមានសមត្ថភាពទទួលនាវាបានចំនួន ៨ចំណត ដែលបំពាក់ដោយឧបករណ៍លើកដាក់ទំនើបទាន់សម័យ។ ក្នុងរយៈពេល៥ឆ្នាំចុងក្រោយនេះ បរិមាណទំនិញឆ្លងកាត់ឧបករណ៍លើកដាក់មានការកើនឡើងជាមធ្យម១១%ក្នុងមួយឆ្នាំ។ នៅឆ្នាំ២០១៥ កំពង់ផែមានប្រាក់ចំណូលសរុបប្រមាណជា៤៩លានដុល្លារអាមេរិកដែលកើនឡើងជិត ១៨ភាគរយធៀបទៅនឹងឆ្នាំ២០១៤គិតជាប្រាក់ចំណេញប្រមាណជា៩លានដុល្លារ។
រូបភាព កំពង់ផែស្វយ័តក្រុងព្រះសីហនុ
ជាមួយកំណើនទឹកប្រាក់ចំណេញរាប់សិបលានដុល្លារអាមេរិក ដែលបានពីកំពង់ផែស្វយ័តមួយនេះ ក៏មានឥស្សរជនឆ្នើម និងជាអ្នកដឹកនាំដ៏សំខាន់ម្នាក់ក្នុងការទទួលខុសត្រូវអភិវឌ្ឍវិស័យកំពង់ផែ ដែលជាដង្ហើមសេដ្ឋកិច្ចដ៏សំខាន់បំផុតជំរុញកំណើនសេដ្ឋកិច្ចកម្ពុជាឆ្ពោះទៅមុខជានិច្ច។
លោក លូ គឹមឈន់ ប្រតិភូរាជរដ្ឋាភិបាលកម្ពុជា ទទួលបន្ទុកជាប្រធានអគ្គនាយក កំពង់ផែស្វយ័តក្រុងព្រះសីហនុ។ លោកមានស្រុកកំណើតនៅស្រុកស្រីសន្ធរ ខេត្តកំពង់ចាម។ លោក លូ គឹមឈន់ ចាប់ផ្តើមធ្វើជាអគ្គនាយកនៅឆ្នាំ១៩៩៣ មកដល់ពេលបច្ចុប្បន្ន។
លោក លូ គឹមឈន់ ប្រតិភូរាជរដ្ឋាភិបាលកម្ពុជា
ការចូលកាន់តួនាទីនេះ គឺជាមោទនភាពរបស់លោកណាស់ ខណៈដែលសម្តេចតេជោហ៊ុន សែន នាយករដ្ឋមន្រ្តីបានផ្តល់សេចក្តីទុកចិត្តឲ្យលោកក្នុងការអភិវឌ្ឍកំពង់ផែទឹកជ្រៅ។ លោកគឺជាថ្នាក់ដឹកនាំដែលមានចក្ខុវិស័យច្បាស់លាស់ រួមនឹងថ្នាក់ដឹកនាំផ្សេងទៀត ដើម្បីការអភិវឌ្ឍកំពង់ផែដែលមានសារៈសំខាន់សម្រាប់ភ្ជាប់និងបម្រើឲ្យការអភិវឌ្ឍវិស័យសេដ្ឋកិច្ចរបស់ប្រទេសជាតិយើង៕
