អ្នកជំនួញជាច្រើនសុទ្ធសឹងតែគ្មានពេលទំនេរសម្រាកសម្រាប់ខ្លួនឯង និងគ្រួសារផងក៏មាន ដោយហេតុថា រវល់ជាប់ជាមួយនឹងការគ្រប់គ្រងអាជីវកម្ម។ នៅក្នុងការធ្វើជំនួញ ពិតណាស់ថាត្រូវការមានចំណេះដឹងជ្រៅជ្រះ រួមនឹងបទពិសោធនជាក់ស្តែងដើម្បីឈានទៅរកភាពជោគជ័យដ៏ច្រចេះត្រចង់មួយបាន។
បើទោះរវល់ខ្លាំងយ៉ាងណាក្តី ដើម្បីបន្តនិរន្តរភាពមុខជំនួញ សហគ្រិនជោគជ័យទាំងនោះតែងតែបែងចែកពេលវេលាដើម្បីអានសៀវភៅ ពីព្រោះការអានពិតជាបានបណ្តុះសតិប្រាជ្ញានិងការចេះដឹងរបស់ខ្លួន អោយកាន់តែភ្លឺថ្លាពណ្ណរាយ ថ្កុំថ្កើងជាងមុនជានិច្ច។
សូមចុច Subscribe Telegram oknha_news ដើម្បីទទួលបានព័ត៌មានគ្រប់សកម្មភាពឧកញ៉ា អាជីវកម្ម ចែករំលែក ជោគជ័យ
អ្នកឧកញ៉ា គិត ម៉េង អគ្គនាយកក្រុមហ៊ុន រ៉ូយ៉ាល់ គ្រុប និងជាប្រធានសភាពាណិជ្ជកម្មកម្ពុជា បានលើកឡើថា ទោះបីជាការងារខ្ញុំមមាញឹកយ៉ាងណា សកម្មភាពមួយដែលខ្ញុំចូលចិត្តបំផុតនោះ គឺការអានសៀវភៅ។ ខ្ញុំជឿជាក់ថា សៀវភៅគឺ ជាកញ្ចក់ឆ្លុះដល់ពិភពលោក ហើយខ្ញុំនៅតែរៀនសូត្រតាមរយៈការអានសៀវភៅ។
ជាមួយនោះអ្នកឧកញ៉ាក៏បានចែករំលែករឿងវិជ្ជមានដែលតែងតែមាននៅក្នុងសៀវភៅដែលលោកបានអាន។ លោកថា នៅពេលយើងប្រឈមនឹងការលំបាក មានតែការព្យាយាមជម្នះរាល់ឧបសគ្គទាំងនេះទេ ដែលអាចឱ្យយើងឃើញនូវឱកាស និងដឹងពីសក្តានុពលពេញលេញរបស់យើង ដើម្បីធ្វើការសម្របខ្លួន និងមានការរីកចម្រើនទៅមុខ។
សម្រាប់លោកឧកញ៉ាវេជ្ជបណ្ឌិត គួច ម៉េងលី អគ្គនាយកប្រតិបត្តិ នៃក្រុមហ៊ុន ម៉េងលី ជេ. គួច អេឌ្យូខេសិន និងជាអ្នកជំនួញល្បីល្បាញមួយរូប នៅក្នុងវិស័យអប់រំនៅកម្ពុជា បានបង្ហាញការយល់ឃើញថា ការរៀន ការអាន ទាំងអស់និងធ្វើឲ្យមនុស្សក្លាយទៅជាបញ្ញវន្ដ។ មានបញ្ញវន្ដភាពក្នុងប្រទេសច្រើន គឺវាមានភាពជោគជ័យ មានគេគោរព មានក្លាហាន ហ៊ានចរចា ហ៊ានប្រឹក្សា ហ៊ានធ្វើធំ ហ៊ានដាក់ដឺម៉ង់ចូលរួមជាមួយគេស្មើប្រទេស។
ថ្លែងនៅក្នុងសន្និសីទសារព័ត៌មានស្តីពីការប្រកាសផ្សព្វផ្សាយសៀវភៅ គំនិតរកស៊ី គួច ម៉េងលី ឬ Mengly J. Quach’s Business Ideas បានឲ្យដឹងថា ការរកស៊ីមិនត្រូវធ្វើឡើងដោយប្រថុយប្រថាននោះទេ ហើយការវិនិយោគលើចំណេះដឹង គឺប្រសើរជាងវិនិយោគលើលុយ។
ការលើកឡើងបែបនេះ ឧកញ៉ាចង់បញ្ជាក់ថា បើយើងមានចំណេះដឹងជ្រៅជ្រះ មានការសិក្សាច្រើន មានគំនិតពិចារណាវែងឆ្ងាយ ស្វែងយល់គំនិតល្អៗពីអ្នកនៅជុំវិញខ្លួន នៅពេលដែលយើងបើកអាជីវកម្ម ឬជំនួញផ្ទាល់ នោះហានិភ័យនឹងមានតិចតួចបំផុត។ ប៉ុន្តែ បើយើងប្រើលុយតែមួយមុខ ដោយមិនប្រើគំនិត ឬចំណេះដឹង នោះភាពបរាជ័យនៃការធ្វើជំនួញនឹងមានខ្ពស់។
លោកឧកញ៉ាបញ្ជាក់បន្ថែមថា សេដ្ឋី ឬអ្នកមានដែលមិនចេះអក្សរ មានដោយចៃដន្យ មានដោយភ័ព្វសំណាង មានតែមួយ១ភាគប៉ុណ្ណោះ នៅលើលោកនេះ៕
