ក្នុងប្រតិបត្តិការអាជីវកម្មរយៈពេល២ឆ្នាំមកនេះ ធនាគារ ជីប ម៉ុង ទទួលបានការជឿជាក់ និងគាំទ្រយ៉ាងពេញទំហឹងពីអតិថិជន ហើយថ្មីៗនេះម្ចាស់ភាគហ៊ុនធនគារជីប ម៉ុង បានសម្រេចបង្កើនដើមទុនចុះបញ្ជីរហូតដល់១០៥លានដុល្លារសហរដ្ឋអាមេរិក ដើម្បីផ្ដល់ផលិតផល និងសេវាកម្មជូនអតិថិជនដែលមានស្រាប់ និងអតិថិជនថ្មីៗបន្ថែមទៀត។
ធនាគារ ជីប ម៉ុង គឺជាពាណិជ្ជកម្មមួយទៀតរបស់ក្រុមហ៊ុន ជីប ម៉ុង ជាបុត្រសម្ព័ន្ធរបស់បណ្តាញក្រុមហ៊ុនជីបម៉ុងគ្រុប។ ធនាគារដែលស្ថិតនៅក្រោមបុត្រសម្ព័ន្ធរបស់ជីប ម៉ុង គ្រុប បង្កើតឡើងនៅដើមឆ្នាំ ២០១៩ អនុវត្តការប្រើប្រាស់ប្រព័ន្ធបច្ចេកវិទ្យាឌីជីថល បម្រើសេវាដល់អតិថិជនដែលផ្តល់ភាពងាយស្រួល ចំណាយតិច និងប្រសិទ្ធភាពខ្ពស់។
ធនាគារជីបម់ុង ប្រើយុទ្ធសាស្រ្តវាយលុកទៅលើសហគ្រាសខ្នាតតូច និងមធ្យម (SMEs) អាជីវកម្មលក់រាយ។ ដោយមានទីស្នាក់ការកណ្តាលស្ថិតនៅលើមហាវិថីម៉ៅសេងទុង ធនាគារ ជីប ម៉ុង បានពង្រាយសាខានៅទីក្រុងភ្នំពេញមាននៅលើមហាវិថីព្រះនរោត្តម, សាខាបឹងសាឡាង លើផ្លូវ២៧១ សាខាផ្សារដើមថ្កូវ សាខាទួលគោក និង២សាខាទៀតក្នុងមជ្ឈមណ្ឌលពាណិជ្ជកម្ម ជីប ម៉ុង បាក់ទូក និងមជ្ឈមណ្ឌលផ្សារទំនើប ជីប ម៉ុង ណូរ៉ូ ម៉ល ព្រមទាំងសាខាជាច្រើនកន្លែងដែលគ្រោងបើកបន្តបន្ទាប់៕
