ឧកញ៉ា ស្រី ចាន់ថន បានប្រកាសនឹងបង្កើតរោងចក្រកែច្នៃផ្លែឈើស្រស់ រួមមានដូចជា ផ្លែមៀន, ផ្លែតាង៉ែន, ផ្លែសាវម៉ាវ, ផ្លែគូលេន និងផ្លែឈើផ្សេងៗដើម្បីផលិតជាទឹកផ្លែឈើ និងដំណាប់ផ្លែឈើកំប៉ុង ក្នុងពេលឆាប់ៗនេះ។
ដើម្បីការពារផលប្រយោជន៍កសិករខ្មែរ ដែលដាំដុះដំណាំកសិកម្មពិបាករកទីផ្សារ លោកឧកញ៉ាបានបង្ហាញឆន្ទៈក្នុងការបង្កើតរោងចក្រកែច្នៃផ្លែឈើស្រស់ ដើម្បីផលិតជាទឹកផ្លែឈើ និងដំណាប់ផ្លែឈើកំប៉ុង សម្រាប់លក់លើទីផ្សារ។
ដោយសារតែការរីករាលដាល នៃជម្ងឺកូវីត-១៩ បានជះឥទ្ធិពលយ៉ាងខ្លាំងមកលើប្រទេសកម្ពុជាលើផ្នែកសេដ្ឋកិច្ច និងវិស័យផ្សេងៗទៀត ដូចជាវិស័យទេសចរណ៍ និងវិស័យកសិកម្ម។
លោកឧកញ៉ាបានគិតគូរសម្រេចចិត្តនឹងបង្កើតរោងចក្រកែច្នៃផ្លែឈើស្រស់ ដែលអាចផ្ដល់ការងារជាច្រើនដល់ប្រជាពលរដ្ឋកម្ពុជា កាត់បន្ថយការធ្វើចំណាកស្រុកទៅកាន់ប្រទេសជិតខាង ក៏ដូចជាដើម្បីបញ្ជាក់ឲ្យបរទេសដឹងថា ជនជាតិខ្មែរក៏អាចផលិតបាននូវផលិតផលនានា ដែលអាចប្រកួតប្រជែងជាមួយបណ្ដាប្រទេសទាំងនោះបានផងដែរ ។
ឧកញ៉ាស្រី ចាន់ថន បានចំណាយពេលដើម្បីសិក្សាអស់មួយរយៈ ដើម្បីបន្តរៀបចំកៃច្នៃ និងបង្កើតជាតំបន់ទេសចរណ៍ធម្មជាតិនៅតាមបណ្តាខេត្តនានា ជាផ្នែកមួយជំរុញអភិវឌ្ឍដល់វិស័យទេសចរណ៍ ។ ជាមួយគ្នានោះ ឧកញ៉ាក៏បានបង្ហើបពីគម្រោងបង្កើតរោងចក្រកែច្នៃផ្លែឈើស្រស់ ក្នុងគោលបំណងចូលរួមជាមួយរាជរដ្ឋាភិបាល ដើម្បីជួយដោះស្រាយវិបត្តិសេដ្ឋកិច្ចរបស់បងប្អូនប្រជាពលរដ្ឋខ្មែរ ជួយដល់វិស័យកសិកម្ម វិស័យឧស្សាហកម្មនៅក្នុងប្រទេស ហើយសង្ឃឹមប្អូនខ្មែរទាំងអស់នឹងជួយគាំទ្រនូវផលិតផលក្នុងស្រុក។
គួរបញ្ជាក់ថា ឧកញ៉ា ស្រី ចាន់ថន អគ្គនាយកក្រុមហ៊ុន Jets Group និង 7NG-Skyland ថ្មីៗនេះ បានបង្កើតក្រុមហ៊ុនដឹកជញ្ជូនJet’s Express ដែលផ្តល់សេវាដឹកជញ្ជូនបញ្ញើអ៊ីវ៉ាន់ឆាប់រហ័ស តាមរយៈប្រព័ន្ធបច្ចេកវិទ្យានៅ ២៥ខេត្ត/ក្រុង ទូទាំងប្រទេសកម្ពុជា ៕
