ក្រុមហ៊ុន ជីប ម៉ុង របស់មហាសេដ្ឋីប្រាក់លានអ្នកឧកញ៉ា ភាព ហៀក ដែលមានសេនាធិការឆ្នើមទាំងពីររូប គឺអ្នកឧកញ៉ា លាង ម៉េង និងអ្នកឧកញ៉ា លាង ឃុន បានបរិច្ចាកថវិកា ២០ម៉ឺនដុល្លារសហរដ្ឋអាមេរិក និងឱសថបុរាណចិន LIANHUA QINGWEN ១ម៉ឺនប្រអប់ដល់សមាគមគ្រូពេទ្យស្ម័គ្រចិត្តយុវជនសម្តេចតេជោ (TYDA) ដើម្បីគាំទ្រដល់យុទ្ធនាការប្រយុទ្ធប្រឆាំងនឹងជំងឺកូវីដ-១៩។
ពិធីប្រគល់ និងទទួល ធ្វើឡើងក្រោមវត្តមានលោកស្រី ពេជ ចន្ទមុន្នី អនុប្រធានក្រុមប្រឹក្សាភិបាលសមាគមគ្រូពេទ្យស្ម័គ្រចិត្តយុវជនសម្ដេចតេជោ (TYDA) និងអ្នកឧកញ៉ា លាង ឃុន សហស្ថាបនិក និងប្រធានក្រុមប្រឹក្សាភិបាលក្រុមហ៊ុន ជីប ម៉ុង កាលពីថ្ងៃទី៣១ សីហា ម្សិលមិញ។
លោកស្រី ពេជ ចន្ទមុនី្ន មានប្រសាសន៍ថា ការចូលរួមនេះ គឺជាទឹកចិត្ត និងសប្បុរសធម៌ជួយគ្នានៅក្នុងគ្រាដែលប្រទេសជាតិកំពុងជួបគ្រោះអាសន្នដោយសារការរីករាលដាល នៃជំងឺកូវីដ-១៩ ខណៈពេលបច្ចុប្បន្ន ដែលថ្នាក់ដឹកនាំ និងក្រុមការងារសមាគមគ្រូពេទ្យស្ម័គ្រចិត្ត TYDA និងយុវជនស្ម័គ្រចិត្តប្រឆាំងកូវីដ-១៩ ដែលកំពុងបំពេញភារកិច្ចយ៉ាងសកម្មដើម្បីជាតិ និងប្រជាជន។
ជាមួយគ្នានេះដែរ អ្នកឧកញ៉ា លាង ឃុន បានវាយតម្លៃខ្ពស់ចំពោះកិច្ចខិតខំប្រឹងប្រែង និងការដឹកនាំរបស់រាជរដ្ឋាភិបាល ក្នុងការគ្រប់គ្រងស្ថានការណ៍ជំងឺកូវីដ-១៩ តាមរយៈការដាក់ចេញនូវវិធានការការពារយ៉ាងហ្មត់ចត់ ក៏ដូចជាកិច្ចខិតខំឥតគណនារបស់កងទ័ពក្នុងការជួយសង្គ្រោះអាយុជីវិតប្រជាពលរដ្ឋ។
អ្នកឧកញ៉ាសង្កត់ធ្ងន់ថា ក្នុងស្មារតីរួមចំណែកជាមួយរាជរដ្ឋាភិបាល ការបរិច្ចាគរបស់ក្រុមហ៊ុន ជីប ម៉ុង នឹងជួយរាជរដ្ឋាភិបាលក្នុងការឆ្លើយតបយ៉ាងឆាប់រហ័ស ជាពិសេសស្របពេលដែលវីរុសបំប្លែងថ្មី Delta កំពុងរាតត្បាតនៅក្នុងប្រទេស។
