លោកជំទាវ ម៉ែន សំអន ជាឧបនាយករដ្ឋមន្រ្តី រដ្ឋមន្រ្តីក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច ហើយជាសមាជិកអចិន្ត្រៃយ៍នៃគណបក្សប្រជាជនកម្ពុជា។ បន្ថែមលើនេះ គណបក្សប្រជាជនកម្ពុជាបានសម្រេចបោះឆ្នោតជ្រើសតាំងលោកជំទាវជាអនុប្រធានគណបក្សថ្មី ជាមួយនឹងសម្តេច ទៀ បាញ់ ដែលធ្វើឲ្យអនុប្រធានគណបក្សកាន់អំណាចមួយនេះ កើនដដល់៤រូប ត្រូវបានធ្វើឡើងនៅក្នុងអង្គសន្និបាតគណៈកម្មាធិការកណ្តាលលើកទី៤៣ អាណត្តិទី៥ របស់គណបក្សប្រជាជនកម្ពុជា នៅថ្ងៃទី២៤ ខែធ្នូ ឆ្នាំ២០២១នេះ។
ការបន្ថែមមន្ត្រីជាន់ខ្ពស់ ទៅជាអនុប្រធានគណបក្សពេលនេះ ធ្វើឲ្យចំនួនអនុប្រធានគណបក្សប្រជាជនកើនឡើងដល់ទៅ៤រូប គឺមានសម្តេច ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ សម្តេច សាយ ឈុំ ប្រធានព្រឹទ្ធសភា សម្តេច ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងលោកជំទាវ ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងរដ្ឋសភា ព្រឹទ្ធសភា និងអធិការកិច្ច។
ជុំវិញការសម្រេចជ្រើសតាំងអនុប្រធានបក្សថ្មីចំនួនពីររូប និងដាក់បេក្ខភាពនាយករដ្ឋមន្ត្រីថ្មី សម្រាប់ថ្ងៃអនាគតរបស់លោក ហ៊ុន ម៉ាណែត ឧកញ៉ាញូស៍ សូមមិនអធិប្បាយបន្តនោះទេ ដោយសូមលើកយកសាវតារនិងការកាន់តួនាទីខ្ពស់ៗក្នុងជួររាជរដ្ឋាភិបាលរបស់លោកជំទាវ ម៉ែន សំអន ដែលជាឥស្សរៈជនស្ត្រីកំពូលក្នុងមន្រ្តីបក្សកាន់អំណាច និងជាថ្នាក់ដឹកនាំដ៏ឆ្នើមក្នុងជួររដ្ឋាភិបាលកម្ពុជា ក្រោមការដឹកនាំដោយសម្តេច ហ៊ុន សែន នាយករដ្ឋមន្ត្រី។
លោកជំទាវ ម៉ែន សំអន បច្ចុប្បន្នជាឧបនាយករដ្ឋមន្ត្រី កើតនៅថ្ងៃទី១៥ ខែសីហា ឆ្នាំ១៩៥៣ ស្ថិតក្នុងខេត្តស្វាយរៀង។ លោកជំទាវ ត្រូវបានជ្រើសរើសជាតំណាងរាស្ត្រមណ្ឌលខេត្តស្វាយរៀង កាលពីឆ្នាំ២០០៣។
លោកជំទាវ ម៉ែន សំអន គឺជាអ្នកនយោបាយស្ត្រីជាន់ខ្ពស់ម្នាក់របស់គណបក្សប្រជាជនកម្ពុជា ដោយធ្លាប់កាន់តំតំណែងជារដ្ឋមន្ត្រី, ទេសរដ្ឋមន្ត្រី និងជាឧបនាយករដ្ឋមន្ត្រីផងដែរ។
នៅឆ្នាំ១៩៨៦ ដល់ ១៩៩៣ លោកជំទាវ ចូលជាសមាជិកមជ្ឈឹមបក្សប្រជាជនបដិវត្តកម្ពុជា ហើយក្នុងឆ្នាំ១៩៩៨ ដល់ ២០០៤ បានក្លាយជាសមាជិកគណៈកម្មការអចិន្ត្រៃយ៍នៃរដ្ឋសភា និងជាប្រធានគណៈកម្មការសុខភាពសាធារណៈ សង្គម និងកិច្ចការនារី។
ពីឆ្នាំ២០០៤ ដល់ ២០០៨ លោកជំទាវ ត្រូវបានប្រមុខរដ្ឋាភិបាល ស្នើសុំទៅព្រះមហាក្សត្រ តែងតាំងជាទេសរដ្ឋមន្ត្រី និងរដ្ឋមន្ត្រីក្រសួងទំនាក់ទំនងរដ្ឋសភា ព្រឹទ្ធសភា និងអធិការកិច្ច ពីឆ្នាំ២០០៨ ដល់ពេលបច្ចុប្បន្នកាន់តំណែងជាឧបនាយករដ្ឋមន្ត្រី (ប្រចាំការ)។
ទន្ទឹមនឹងនោះ លោកជំទាវកិត្តិសង្គហបណ្ឌិត ម៉ែន សំអន ក៏ជាប្រធានសមាគមនារីកម្ពុជាដើម្បីសន្តិភាពនិងអភិវឌ្ឍន៏ផងដែរ។ លោកជំទាវ ជាស្ត្រីកម្ពុជាមួយរូប ដែលតែងតែដឹកនាំគណៈប្រតិភូរាជរដ្ឋាភិបាល អញ្ជើញចូលរួម ក្នុងកិច្ចការងារសង្គមទាំងក្នុង និងក្រៅប្រទេស។
ជានិច្ចកាល លោកជំទាវតែងតែផ្តល់អនុសាសន៍ និងលើកទឹកចិត្តឲ្យមន្រ្តីរាជការពង្រឹងសមត្ដភាពបន្ថែមលើវិស័យអធិការកិច្ច តាមដានការអនុវត្តច្បាប់ ដោះស្រាយពាក្យបណ្តឹង និងផ្សព្វផ្សាយច្បាប់។
គួររំលឹកថា ចំនួនស្ត្រីនៅកម្ពុជា កំពុងទទួលបានក្នុងមុខតំណែងជាអ្នកដឹកនាំ បានកើនឡើង នៅគ្រប់ស្ថាប័ន ។ គិតត្រឹមឆ្នាំ២០២១ ស្ត្រីមានចំនួន២១ ភាគរយ កាន់តំណែង នៅក្នុងរដ្ឋសភា និង ១៦ ភាគរយ នៅក្នុងព្រឹទ្ធសភា ។ ហើយក៏មានជាឧបនាយករដ្ឋមន្ត្រី ជាស្ត្រី ១រូប គឺលោកជំទាវ ម៉ែន សំអន រដ្ឋមន្ត្រីជាស្ត្រី ៣រូប និង អភិបាលខេត្ត ជាស្ត្រី២រូប ។ បើប្រៀបធៀប នៃការសមាមាត្រ ស្ត្រី នៅក្នុងសេវាកម្មស៊ីវិល បានកើនឡើង ពី៣៨ ភាគរយ ក្នុង ឆ្នាំ ២០១៤ ទៅដល់ ៤១ភាគរយ នៅឆ្នាំ២០២១ និងសមាមាត្រ តំណាងរបស់ស្ត្រី នៅក្នុងការសម្រេចចិត្ត នៅកម្រិត អនុប្រធាន ការិយាល័យ ថ្នាក់ ក្រុង ស្រុក និង ខណ្ឌ រហូតដល់អគ្គនាយក បានកើនឡើងពី ២០ ភាគរយ ក្នុងឆ្នាំ ២០១៤ ដល់ ២៥ភាគរយ ក្នុងឆ្នាំ ២០១៩៕
