ឆ្នាំ២០២១ គឺជាឆ្នាំដែលកម្ពុជា ចូលរួមយ៉ាងសស្រាក់សស្រាំប្រយុទ្ធប្រឆាំងជាមួយនឹងមេរោគរាតត្បាតសកលកូវីដ-១៩ ជាមួយពិភពលោក ខណៈវិបត្តិសកលដែលបង្កឡើងដោយជំងឺកូវីដ-១៩ បានធ្វើឱ្យសេដ្ឋកិច្ចពិភពលោក រួមទាំងសេដ្ឋកិច្ចកម្ពុជាផងកំពុងដើរថយក្រោយ។ សម្រាប់កម្ពុជា សកម្មភាពនៃការវិនិយោគ មានការធ្លាក់ចុះជិតពាក់កណ្ដាល បើធៀបទៅនឹងឆ្នាំ២០២០កន្លងទៅ។
ជាក់ស្តែង ក្នុងរយៈពេល១២ខែ ឆ្នាំ២០២១នេះ ក្រុមប្រឹក្សាអភិវឌ្ឍន៍កម្ពុជា ហៅកាត់ CDC បានអនុម័តគម្រោងវិនិយោគសរុបចំនួន ១៦១គម្រោង ដែលមានទំហំទឹកប្រាក់វិនិយោគសរុបប្រមាណជិត ៤ពាន់លានដុល្លារ ហើយអាចបង្កើតការងារបានសរុបចំនួន ១០៩,៤១៣កន្លែង។
ជាការកត់សម្គាល់ សម្រាប់ឆ្នាំ២០២១នេះ ការអនុម័តគម្រោងវិនិយោគសរុប គឺមានការធ្លាក់ចុះចំនួន ៧៧គម្រោង ហើយបើធៀបជាមួយនឹងឆ្នាំ២០២០ មានគម្រោងវិនិយោគចំនួន ២៣៨គម្រោង ពោលគឺធ្លាក់ចុះស្នើពាក់កណ្តាលនៃទំហំទុនវិនិយោគកាលពីឆ្នាំ២០២០ ដែលមានចំនួន៨,២ពាន់លានដុល្លារ។
បើតាមក្រុមប្រឹក្សាអភិវឌ្ឍន៍កម្ពុជា ក្នុងចំណោមគម្រោងចំនួន១៦១ដែលបានអនុម័តរួចនោះ គឺការវិនិយោគនៅក្រៅតំបន់សេដ្ឋកិច្ចពិសេសមានចំនួន ១២៥គម្រោង សរុបទុនវិនិយោគចំនួន ១.៩៧ពាន់លានដុល្លារ និងនៅក្នុងតំបន់សេដ្ឋកិច្ចពិសេស មានចំនួន៣៦គម្រោង សរុបទុនវិនិយោគជាង១.៩៨ពាន់លានដុល្លារ។ ក្នុងនោះ គម្រោងវិនិយោគលើផ្នែកកសិកម្ម និងកសិឧស្សាហកម្មមានចំនួន១៤គម្រោង គម្រោងវិនិយោគលើផ្នែកឧស្សាហកម្មមានចំនួន១៣៥គម្រោង គម្រោងវិនិយោគលើផ្នែកទេសចរណ៍មានចំនួន២គម្រោង និងហេដ្ឋារចនាសម្ព័ន្ធ និងផ្សេងៗទៀតមានចំនួន១០គម្រោង៕
