កាលពីថ្ងៃពុធ ទី ៥ ធ្នូម្សិលមិញ រដ្ឋាភិបាលរបស់ប្រទេសឥណ្ឌា បានស្នើសុំឱ្យម្ចាស់អាជីវកម្មក្នុងស្រុក នៃក្រុមហ៊ុនផលិតស្មាតហ្វូនយក្សរបស់ចិន Xiaomi បង់ពន្ធនាំចូល ចំនួន ៦,៥៣ ពាន់លានរូពី ឬ ៨៧,៨០ លានដុល្លារអាមេរិក បន្ទាប់ពីស៊ើបអង្កេតឃើញថាក្រុមហ៊ុននេះ បានគេចវេសពីការបង់ពន្ធមួយចំនួន ។
ជាក់ស្តែង រដ្ឋាភិបាល បាននិយាយទៀតថា ការស៊ើបអង្កេត ដែលធ្វើឡើងដោយអគ្គនាយកដ្ឋានប្រាក់ចំណូលរបស់ឥណ្ឌា បានបង្ហាញថា ការទូទាត់ថ្លៃសួយសារអាករ និងថ្លៃអាជ្ញាប័ណ្ឌ របស់ក្រុមហ៊ុន Xiaomi India ដែលបង់ទៅឲ្យក្រុមហ៊ុន Qualcomm USA និង Beijing Xiaomi Mobile Sotfware Co Ltd ប្រទេសចិន គឺមិនត្រូវបានកត់ចូលទៅក្នុងបញ្ជីតម្លៃប្រតិបតិ្តការនៃការនាំចូលដោយក្រុមហ៊ុន និងកិច្ចសន្យាផលិតរបស់ខ្លួននោះទេ ។
មិនតែប៉ុណ្ណោះ សេចក្តីថ្លែងការណ៍មួយ បាននិយាយថា ៖ ” ដោយមិនបង់បន្ថែមទៅលើថ្លៃកម្មសិទ្ធិ និងអាជ្ញាប័ណ្ណ ក្នុងតម្លៃប្រតិបតិ្តការ នោះមានន័យថា Xiaomi India កំពុងតែគេចវេសពីការបង់ពន្ធគយ ក្នុងនាមជាអ្នកដែលទទួលបានអត្ថប្រយោជន៍ក្នុងការនាំចូលទូរសព្ទដៃ គ្រឿងបន្លាស់ និងគ្រឿងបង្គុំទាំងនោះ ” ។
លើសពីនេះ រដ្ឋាភិបាលបាលរបស់ឥណ្ឌា បានបន្ថែមទៀតថា ការជូនដំណឹងអំពីមូលហេតុ ដែលក្រុមហ៊ុន Xiaomi ត្រូវធ្វើការបង់ពន្ធ និងស្តាពន្ធឡើងវិញ គឺមានចំនួន ៦,៥៣ ពាន់លានរូពី ដែលរាប់ចាប់តាំងពីខែ មេសា ឆ្នាំ ២០១៧ ដល់ខែមិថុនា ឆ្នាំ ២០២០ ។
យ៉ាងណាក៏ដោយ ជុំវិញបញ្ហានេះ អ្នកតំណាងរបស់ក្រុមហ៊ុន Xiaomi បាននិយាយថា ៖ ” សម្រាប់ Xiaomi India យើងផ្តល់សារ:សំខាន់បំផុត ក្នុងការធានាបានថាយើងអនុវត្តតាមច្បាប់ របស់ប្រទេសឥណ្ឌាទាំងអស់។ បច្ចុប្បន្ន យើងកំពុងតែធ្វើការពិនិត្យមើលសេចក្តីជូនសំណឹងនេះយ៉ាងលម្អិត។ ក្នុងនាមជាក្រុមហ៊ុន យើងនឹងទទួលខុសត្រូវ ហើយយើងនឹងបន្តគាំទ្រអាជ្ញាធរជាមួយនឹងឯកសារចាំបាច់ទាំងអស់ ” ៕
ប្រភព: KeloNews
