មហាសេដ្ឋី​ហ្វីលីពីន មិន​​ឈរ​ឈ្មោះ​ប្រធានាធិបតី ងាក​មក​ធ្វើ​ជា​ស្ដេចត្រាញ់​បណ្ដាញ​ព័ត៌មាន​វិញ

អន្តរជាតិ

មហាសេដ្ឋី​ហ្វីលីពីន Manuel Villar ធ្លាប់​មាន​តំណែង​ធំ​មួយ​នៅ​ក្នុង​ជួរ​រដ្ឋាភិបាល គឺជា​សមាជិក​ព្រឹទ្ធសភា ស្របពេល​កន្លងមក​ប្រធានាធិបតី Rodrigo Duterte ធ្លាប់​បង្ហើប​ថា បើសិន​ជា​មហាសេដ្ឋី​រូប​នេះ​ឈរ​ឈ្មោះ​ជា​បេក្ខភាព​ប្រធានាធិបតី នោះ​លោក​នឹង​គាំទ្រ​ពេញ​ទំហឹង។

សូមចុច Subscribe Channel Telegram Oknha news គ្រប់សកម្មភាពឧកញ៉ា សេដ្ឋកិច្ច ពាណិជ្ជកម្ម និងសហគ្រិនភាព

យ៉ាងណា ម្ចាស់​ជំនួញ​រាប់​សិន​អាជីវកម្ម​នេះ​​ហាក់​មិន​ចង់​ប្រឡូក​ក្នុង​វិស័យ​នយោបាយ​តទៀត​ឡើយ ដោយ​ថ្មីៗនេះ​លោក​បាន​ងាក​មក​ចាប់​អារម្មណ៍​លើ​វិស័យ​បណ្ដាញ​សារព័ត៌មាន​ម្ដង ដោយ​បាន​ទិញ​យក​ក្រុមហ៊ុន​វិទ្យុ​ធំ​បំផុត​ប្រចាំ​ប្រទេស ABS-CBN។

រំលឹក​ដែរ​ថា កាល​ពី​ប៉ុន្មាន​ឆ្នាំ​មុន ស្ថានីយ​វិទ្យុ​យក្ស​មួយ​នេះ​ត្រូវបាន​ក្រុម​លោក Duterte អនុញ្ញាត​ឲ្យ​ដំណើរការ​អាជីវកម្ម​ដល់​ឆ្នាំ ២០២០ ក្រោមហេតុផល​នយោបាយ ដោយ​មិន​បញ្ជាក់​អ្វី​ច្បាស់​ជាង​នេះ​ឡើយ។

ការ​ដែល​លោក Villar ទិញ​បាន​ស្ថានីយ​វិទ្យុ​មួយ​នេះ​អាច​ជា​រឿង​ល្អ​សម្រាប់​ប្រធានាធិបតី Duterte ដ្បិត​មហាសេដ្ឋី​រូបនេះ​អាច​មាន​លទ្ធភាព​គ្រប់គ្រាន់​ក្នុង​ការ​គ្រប់គ្រង​វិសាលភាព​នៃ​ការ​ផ្សព្វផ្សាយ​របស់​បណ្ដាញ​សារព័ត៌មាន​ដ៏​ទូលំទូលាយ​មួយ​នេះ។

បញ្ជាក់​ដែរ​ថា យោង​តាម​របាយការណ៍​ចុះផ្សាយ​ដោយ Forbes Magazine បាន​បង្ហាញ​ថា ទ្រព្យសម្បត្តិ​សរុប​របស់ Manuel Villar គឺ​មាន​ប្រមាណ ៧,២ ពាន់​លាន​ដុល្លារ និង​ជា​បុគ្គល​មាន​បំផុត​ប្រចាំ​ប្រទេស​ហ្វីលីពីន ខណៈ​ចំពោះ​តម្លៃ​របស់​ស្ថានីយ​វិទ្យុ ABS-CBN គឺ​មិន​បាន​ទម្លាយ​ឲ្យ​ដឹង​ឡើយ៕

ប្រភព: Inquirer