ធនាគារពាណិជ្ជកម្មក្រៅប្រទេសនៃកម្ពុជា FTB បានបន្ថែមទុនចំនួន ១០លានដុល្លារអាមេរិក ទៅឱ្យក្រុមហ៊ុន Cambodia Airport Investment Co., Ltd ហៅកាត់ CAIC ដើម្បីប្រមូលទុនយកទៅប្រើប្រាស់សម្រាប់ការសាងសង់ និងការអភិវឌ្ឍន៍គម្រោងសង់ព្រលានយន្តហោះអន្តរជាតិតេជោ ស្ថិតនៅខេត្តកណ្តាល។ នេះបើយោងតាមសេចក្តីប្រកាសព័ត៌មានកាលពីថ្ងៃទី២៦ ខែមករា ឆ្នាំ២០២២។
ការបន្ថែមទុនវិនិយោគនេះ ចំនួន ១០លានដុល្លារអាមេរិកនេះ ធ្វើឱ្យទំហំវិនិយោគរបស់ធនាគារ FTB មានទឹកប្រាក់សរុប ៣០លានដុល្លារ ខណៈពិធីចុះហត្ថលេខាលើកិច្ចព្រមព្រៀងសញ្ញាបណ្ណមានបុគ្គលធានា តម្លៃ ២០លានដុល្លារ ត្រូវបានធ្វើឡើងដំណាងដោយឧកញ៉ា វ៉ាន់ ឆាល នាយកប្រតិបត្តិក្រុមហ៊ុន CAIC និងលោកឌិត សុចល ប្រធាននាយកប្រតិបត្តិធនាគារ FTB កាលពីថ្ងៃទី២៤ ខែវិច្ឆិកា កន្លងទៅ។
គម្រោងព្រលានយន្តហោះអន្តរជាតិតេជោតាខ្មៅ គិតមកដល់ពេលនេះ សម្រេចការសាងសង់បានប្រមាណជាង៣០%ហើយ ដែលគ្រោងនឹងបញ្ចប់ការសាងសង់នៅក្នុងឆ្នាំ២០២៣ ខាងមុខ។
អាកាសយានដ្ឋាននេះ មានគ្រោងចាយទឹកប្រាក់ប្រមាណ១,៥០០លានដុល្លារ ក្នុងនោះទឹកប្រាក់១,១០០លានដុល្លារជាកម្ចីពីធនាគារបរទេស និង ២៨០លានដុល្លារទៀតជារបស់ក្រុមហ៊ុន CAIC របស់អ្នកឧកញ៉ា ពុង ខៀវសែ ហើយដើមទុនចុះបញ្ជីមានរហូតដល់១២០លានដុល្លារអាមេរិក៕
