អគ្គនាយកដ្ឋានកៅស៊ូនៃក្រសួងកសិកម្មបានឲ្យដឹងថា ឆ្នាំ ២០២១ កម្ពុជាបាននាំចេញកៅស៊ូដែលរកចំណូលសរុបចំនួនប្រមាណ ៦១២,៣លានដុល្លារ។ ដោយឡែកតម្លៃកៅស៊ូវិញបានតម្លៃ ១ ៦៦៦ដុល្លារ ក្នុងមួយតោន។
យោងលើរបាយការណ៍របស់អគ្គនាយកដ្ឋានកៅស៊ូ បានបង្ហាញឲ្យឃើញថា គិតត្រឹមឆ្នាំ២០២១ មានផ្ទៃដីកៅស៊ូសរុបជាង ៤០៤ ០៤៤ហ.ត។ ផលិតផលកៅស៊ូស្ងួតសម្រេចបានចំនួនជាង ៣៦៨,០០០តោន (១ ១៨៦ គ.ក្រ/ហ.ត)។ បច្ចុប្បន្នកម្ពុជាមានរោងចក្រ-សិប្បកម្មកែច្នៃកៅស៊ូចំនួន ១៦៨ ស្ថិតក្នុងខេត្តចំនួន១១ និងបាននាំចេញផលិតផលកៅស៊ូប្រមាណជាង ៣៧ ម៉ឺនតោន ទទួលចំណូលជាថវិកាបានប្រមាណជាង ៦១០លានដុល្លារ និងចំណូលពីការនាំចេញឈើកៅស៊ូបានជាង ១,៥លានដុល្លារ។
លោក វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទបានឲ្យដឹងថា ជាមួយសមិទ្ធផលសម្រេចបាននេះ វិស័យឧស្សាហកម្មកៅស៊ូនៅមានបញ្ហាប្រឈម ដែលចាំបាច់ត្រូវចាប់ផ្តើមបន្ទាន់ធ្វើការកែលម្អ និងដោះស្រាយ។ អគ្គនាយកដ្ឋានកៅស៊ូត្រូវខិតខំរិះរកមធ្យោបាយ វិធានការច្បាស់លាស់ និងបត់បែន ដើម្បីចូលរួមដោះស្រាយបញ្ហាសំខាន់ៗ ដោយត្រូវពង្រឹងកិច្ចសហការថែមទៀតជាមួយអន្តរស្ថាប័នពាក់ព័ន្ធតាមអភិក្រម “រដ្ឋ-ឯកជន-ដៃគូអភិវឌ្ឍន៍ និងសហគមន៍” ប្រកបដោយភាពម្ចាស់ការ និងឈរលើផលប្រយោជន៍រួម។
ជាមួយការអនុវត្តការងារបន្តទៅតាមផែនការរបស់អគ្គនាយកដ្ឋានកៅស៊ូ លោករដ្ឋមន្ត្រីបានក្រើនរំលឹកនិងផ្តល់ជូនទស្សនៈ និងវិធានការសំខាន់ៗមួយចំនួនទៀត ដែលជាធាតុចូលសម្រាប់ជាមូលដ្ឋានគ្រឹះអនុវត្តបន្តឲ្យទទួលបានជោគជ័យ ក្នុងនោះមានដូចជា ៖ ១) ពង្រឹងកិច្ចសហការជាមួយក្រុមហ៊ុន វិនិយោគ និងក្រុមហ៊ុនសម្បទានដីសេដ្ឋកិច្ចដាំកៅស៊ូ រួមទាំងគ្រួសារ។ ២) យកចិត្តទុកដាក់ទីផ្សារនាំចេញផលិតផលកៅស៊ូ។ ៣) ពង្រឹងការងារគ្រប់គ្រងស្ថានីយ មជ្ឈមណ្ឌលស្រាវជ្រាវពូជ ជំងឺ សត្វ ល្អិតចង្រៃ និងការ កែច្នៃ ដោយត្រូវសហការជាមួយវិស័យឯកជន និងដៃគូអភិវឌ្ឍន៍។ ៤) ជំរុញចងក្រង និងពង្រឹងសហគមន៍កសិករកៅស៊ូគ្រួសារ។ ៥) ជំរុញការអភិវឌ្ឍឧស្សាហកម្មកែឆ្នៃកៅស៊ូធម្មជាតិនៅកម្ពុជា។ ៦) ត្រូវបន្តកៀរគរ និងស្វែងរកប្រភពហិរញ្ញប្បទាន ឬបច្ចេកវិទ្យាថ្មីៗពីដៃគូអភិវឌ្ឍន៍ផ្សេងៗទៀត ដើម្បីទទួលបានការរីកចម្រើនថ្មីៗទៀតក្នុងអនុវិស័យនេះ៕
