ឆ្លើយតបប្រធានបទកម្មវិធីជំរុញលើកទឹកចិត្ត ខ្ញុំមិនដឹងត្រូវនិយាយលើកទឹកចិត្តពីអ្វីទៅមុន ដើម្បីឱ្យត្រូវនឹងប្រធានបទកម្មវិធីនេះទេ។ សារអ្នកឧកញ៉ាគួច ម៉េងលី ទាក់ទងប្រធានបទជំរុញទឹកចិត្តដល់យុវជន។
តើខ្ញុំគួរលើកទឹកចិត្តឱ្យយុវជនបន្តផឹកស្រាឬយ៉ាងណា? តែខ្ញុំយល់ឃើញថា ក្មេងៗឥឡូវពួកគេគួរគប្បីស្វែងរកឱ្យឃើញនូវព្រលឹងដួងពេជ្រក្នុងខ្លួនឱ្យជាក់ច្បាស់ ជាជាងធ្វើអ្វីៗដែលពុំមានប្រយោជន៍ទាល់តែសោះ ចំពោះអនាគតដ៏វែងឆ្ងាយរបស់ពួកគេ។ ពួកគេគប្បីចេះស្រមៃមើលទៅមុខ ថាតើគេចង់បានអ្វីសម្រាប់ជីវិត។
មានសញ្ជាតិខ្មែរ-អាមេរិក ជាអ្នកឯកទេសអប់រំ ជាវេជ្ជបណ្ឌិត ជាសហគ្រិនមួយរូប ហើយបច្ចុប្បន្នត្រូវគេស្គាល់ថាជា ស្ថាបនិក ប្រធានក្រុមប្រឹក្សាភិបាល និងអគ្គនាយកប្រតិបត្តិ នៃក្រុមហ៊ុន ម៉េងលី ជេ. គួច អេឌ្យូខេសិន វេជ្ជបណ្ឌិតគួច ម៉េងលី ដែលទើបព្រះមហាក្សត្រផ្តល់គោរម្យងារតែងតាំងជាអ្នកឧកញ៉ាបានបំផុសឲ្យយុវជនត្រូវចោទសួរខ្លួនឯងនូវសំណួរសាមញ្ញៗ ពញ្ញាក់អារម្មណ៍ ហើយចាប់ផ្តើមគិត។
អ្នកឧកញ៉ាបន្តថា កូនខ្មែរយើងភាគច្រើន គឺគួរឱ្យអាណិតណាស់។ ពួកគេហាក់ពុំចេះស្រមៃ និងមិនដឹងថាត្រូវស្រមៃបែបណា។ ពេលខ្លះគេចេះតែដើរ មិនដឹងថាខ្លួនដើរទៅណា ហើយក៏ពុំមាននរណាមកខ្វល់ខ្វាយនឹងជួយតម្រង់ផ្លូវពួកគេឱ្យណាស់ណានោះដែរ។
អ្នកឧកញ៉ាបានថ្លែងបន្ថែមថា មានពេលខ្លះខ្ញុំស្រណោះមែនទែន ពេលឃើញពួកគេវង្វេង ហាក់បីដូចមនុស្សរស់ក្នុងព្រៃជ្រៅ ដែលពុំធ្លាប់ចេញមកមើលពិភពខាងក្រៅ។ ពេលខ្លះពួកគេដូចកំពុងដើរៗ ក៏ស្រាប់តែវង្វេងក្នុងព្រៃ រហូតត្រូវសត្វសាហាវហែកស៊ីបាត់ខ្លួន។
អ្នកឧកញ៉ាក៏ជំរុញដល់មហាជន សាច់ញាតិ ឪពុកម្តាយផ្ទាល់ ក៏ត្រូវចូលរួមគិត និងបំផុសផ្នត់គំនិតស្វែងរកព្រលឹងដួងពេជ្រនៅក្នុងខ្លួន ដល់បងប្អូនកូនក្មួយ ឱ្យពួកគេចេះសួរខ្លួនឯងបណ្តើរៗតាំងពីតូចឱ្យហើយ។
“ពេលត្រលប់ទៅដល់ផ្ទះ បើមានកូន សូមជួយសួរគាត់ «កូន! ធំឡើងកូនឯងចង់ធ្វើអ្វី? ចង់រៀនអ្វី? ចង់ក្លាយជាបែបណា?»។ ចូរកុំមើលស្រាលឥទ្ធិពលនៃក្តីស្រមៃនៅក្នុងខ្លួនឱ្យសោះ។ មិនតែប៉ុណ្ណោះ គឺត្រូវតែហ៊ានស្រមៃ និងធ្វើសកម្មភាពដើម្បីចាប់យកវាឱ្យបាន”។
អ្នកឧកញ៉ាបានសង្កត់យ៉ាងដូច្នេះថា “យើងត្រូវចាប់វាឱ្យជាប់ ហើយបិទវាជាប់នឹងខ្លួនយើង ដូចយើងបិទឬចាក់សាក់ជាប់នឹងខ្លួនអ៊ីចឹងដែរ។ សំណួរយើង អាចធ្វើឱ្យក្មេងៗចាប់ផ្តើមគិត។ ស្រួលមិនស្រួល គេអាចនឹងចេះចង់ធ្វើអ្វីមួយចេញពីក្នុងខ្លួនតាំងពីតូចក្រូចឆ្មារក៏ថាបាន”៕
