កាលពីម្សិលមិញនេះក្រុមអ្នកជំនួញវ័យក្មេង១ក្រុមមានគ្នាប្រមាណជាង១០នាក់ បាននាំយកអំណោយជាសម្ភារៈសិក្សា អាហារក៏ដូចជា ថវិកាមួយចំនួន យកទៅចែកជូន ដល់សិស្សានុសិស្ស ក៏ដូចជាលោកគ្រូ នៅសាលាបឋមសិក្សា ភ្នំ ខ្លែង ក្នុងទឹកដីខេត្តតាកែវ។
អំណោយទាំងនោះត្រូវបានពួកគេរៃអង្គាសពីសប្បុរសជននានាព្រមទាំងថវិកាផ្ទាល់ខ្លួន ដែលសរុបជាទឹកប្រាក់ប្រហែល ជិត២០០០ ដុល្លារ។ តាមការឲ្យដឹងពីលោក កេត វុធដុង ប្រធានក្រុមហ៊ុន”ភូមិឋាន ឧត្តុង្គ លែន” ដែលជាក្រុមហ៊ុនពុះដីឡូតិ៍លក់នៅតំបន់ជាយក្រុង បានឲ្យដឹងថា ការចែកអំណោយដល់សិស្សានុសិស្សក៏ដូចជាលោកគ្រូអ្នកគ្រូនេះ ក៏ព្រោះតែសាលានៅទីនោះមានការខ្វះខាតខ្លាំង ម្យ៉ាងក្រុមហ៊ុនរបស់លោកចង់ធ្វើកម្មវិធីមួយ ដើម្បីអបអរកម្មវិធីចូលឆ្នាំសាកលផង។
អំណោយដែលបានចែកជូនមានដូចជា សៀវភៅ 2000ក្បាល ប៉ិច1200ដើម ខ្មៅដៃ1200ដើម ជ័រលុប600 ដែកខួង600 បន្ទាត់600 នំបុ័ង500 ភេសជ្ជៈ30កេស ទឹកសុទ្ធ50យួរ ក្រមា 20 ថវិកាជូនលោកគ្រូអ្នកគ្រូ 200$ ត្រូវបានចែកទៅសិស្សចំនួន ជាង 500នាក់ នឹង លោកគ្រូអ្នកគ្រូ 17នាក់ ។
ប្រធានក្រុមហ៊ុនខាងលើបានលើកឡើងថា ការបរិច្ចាគ ដល់សង្គម ដូច មន្ទីរពេទ្យ សាលារៀន វត្តអារាម ជួយដល់ជនក្រីក្រ ចាស់ជរា ក្មេងកំព្រា ឬ ជនទូរគត់ផ្សេងទៀត គឺជា ទង្វើវិជ្ជមាន សម្រាប់មនុស្សទូទៅគួរតែប្រតិបត្តិប្រសិនបើពួកគាត់មានលទ្ធភាព ហើយទង្វើបែបនេះ គឺទទួលបានផលបុណ្យច្រើនណាស់។ ក្រុមហ៊ុន “ភូមិឋាន ឧត្តុង្គ លែន” ក្រៅពីមានគោលដៅ ស្វែងរកទីតាំងដីល្អដល់អតិថិជន សម្រាប់សង់លំនៅឋានក៏ដូចជា វិនិយោគផ្សេង ក្នុងគោលដៅជោគជ័យទាំងអស់គ្នា ក្រុមហ៊ុនរបស់លោក បានដាក់គោលដៅកាត់ប្រាក់ចំណេញចំណែកតូចណាមួយ ដើម្បីបរិច្ចាគដល់សង្គម ទោះក្នុងរូបភាពណាក្ដី ហើយកិច្ចការមនុស្សធម៌នេះ នឹងបន្តធ្វើជាបន្តបន្ទាប់ទៀត ក្នុងនោះដែរលោកក៏ស្វាគមន៍សប្បុរសជនផ្សេងទៀតដែលចង់ចូលរួមចំណែកជាមួយក្រុមរបស់លោក៕
