លោក Ferudun Cevahiroglu ប្រធានសហព័ន្ធធុរជនឧស្សាហកម្មតួកគី បានសម្តែងនូវទឹកចិត្តសោមនស្សរីករាយដែលបានជួបដោយផ្ទាល់ជាមួយគណៈប្រតិភូសភាពាណិជ្ជកម្មកម្ពុជា និងបានរំលឹកពីការរៀបចំវេទិកាធុរកិច្ចកម្ពុជា-តួកគីតាមប្រព័ន្ធអនឡាញប្រកបដោយជោគជ័យកាលពីខែកញ្ញាឆ្នាំ២០២១ កន្លងទៅ។
លោកថ្លែងយ៉ាងដូច្នេះធ្វើឡើងក្នុងជំនួបជាមួយឧកញ៉ា លឹម ហេង អនុប្រធានសភាពាណិជ្ជកម្មកម្ពុជា កាលពីថ្ងៃទី២៧ ខែកុម្ភៈ ឆ្នាំ២០២២។
លោក Ferudun Cevahiroglu បញ្ជាក់ថា សហព័ន្ធធុរជនឧស្សាហកម្មតួកគី ត្រៀមខ្លួនរួចជាស្រេចក្នុងការសហការជាមួយ ភាគីកម្ពុជាទៅលើវិស័យសំខាន់ៗរួមមានដូចជា សំណង់ ថាមពល ធនធានរ៉ែ និង បច្ចេកវិទ្យា ដោយផ្តើមចេញពីការអនុវត្តគម្រោងរួមគ្នា ជា BOT ឬ PPP។
លោកបន្ថែមទៀតថា រាល់គម្រោងសហប្រតិបត្តិការទាំងអស់ នឹងត្រូវធ្វើឡើងតាមរយៈស្ថានទូតខ្មែរនៅតួកគី សភាពាណិជ្ជកម្មកម្ពុជា និងសហព័ន្ធធុរជនឧស្សាហកម្មតួកគី។ លោកថា លោកនឹងដឹកនាំគណៈប្រតិភូធុរកិច្ចទៅបំពេញទស្សនកិច្ចនៅកម្ពុជា។
ជាមួយគ្នានេះ ឧកញ៉ា លឹម ហេង ក៏បានគូសបញ្ជាក់ថាប្រទេសកម្ពុជា និងតួកគីសុទ្ធតែមានអរិយធម៌រុងរឿង និងមានកិច្ចសហប្រតិបត្តិការល្អទាំងសេដ្ឋកិច្ច នយោបាយ និងការទូត។ លោកថា ប្រទេសតួកគី គឺជាច្រកចូលដ៏សំខាន់សម្រាប់ផលិតផលកម្ពុជាចូលទៅកាន់ទីផ្សារអឺរ៉ុប ចំណែកឯ កម្ពុជាមានទីតាំងភូមិសាស្ត្រស្ថិតនៅកណ្តាលតំបន់អាស៊ាន ដែលជាច្រកចូលដ៏សំខាន់សម្រាប់ផលិតផលតួកគី។
ឧកញ៉ា បន្ថែមថា កម្ពុជាមានទីផ្សារទូលំទូលាយដែលវិនិយោគិនអាចនាំផលិតផលដែលផលិតនៅកម្ពុជាទៅកាន់ទីផ្សារនៃប្រទេសសមាជិកនៃកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ដែលមានប្រជាជនសរុបស្មើនឹង ៣០% នៃចំនួនប្រជាជនទូទាំងពិភពលោក ព្រមទាំងអាចនាំផលិតផលទៅកាន់ ចិន កូរ៉េ អាមេរិក អង់គ្លេស សហគមន៍អឺរ៉ុប និងអាស៊ាន ដោយមិនជាប់ពន្ធ។
ទន្ទឹមនឹងនោះ លោកឧកញ៉ាក៏បានអញ្ជើញធុរជន និងវិនិយោគិនតួកគី ទៅបំពេញទស្សនកិច្ចនៅកម្ពុជា ដើម្បីចាប់យកកាលានុវត្តភាពនានា ទៅតាមវិស័យរៀងៗខ្លួន។ ខណៈប្រទេសទាំងពីរបានចុះកិច្ចព្រមព្រៀងស្តីពីការការពារនិងជំរុញការវិនិយោគ និងបានកំណត់គោលដៅសម្រេចឲ្យបាននូវទំហំពាណិជ្ជកម្មយ៉ោងហោចណាស់ ៥០០ លានដុល្លារអាមេរិកក្នុងមួយឆ្នាំ៕
