តាមរយៈសកម្មភាពចូលរួមសកម្មភាពចូលរួមអភិវឌ្ឍន៍ និងកសាងជាតិ បុគ្គលជាង ៧០០នាក់ ត្រូវបានព្រះមហាក្សត្រ ចេញព្រះរាជក្រឹត្យផ្ដល់គោរម្យងាជា “ឧកញ៉ា” រហូតដល់មានចំនួន ៧០៤នាក់ តាមតួលេខពីឆ្នាំ១៩៩៤ ដល់ដើមឆ្នាំ២០១៤។
មកដល់ឆ្នាំ ២០១៩ ដែលកន្លងទៅថ្មីៗ គេជឿថា ចំនួននេះ អាចប្រែប្រួលកំណើន ក្នុងនោះត្រឹមតែចុងឆ្នាំ ២០១៩ ប៉ុណ្ណោះ មានបុគ្គល៣នាក់ត្រូវបានតែងតាំងជាឧកញ៉ាដោយព្រះរាជក្រឹត្យព្រះមហាក្សត្រ បន្ទាប់ពីឧកញ៉ា ឡេង ណាវ៉ាត្រា ត្រូវបានតែងតាំងពីដើមឆ្នាំ។ យ៉ាងណា តួលេខចាស់ក៏មានការប្រែប្រួលដែរ ក៏ព្រោះតែ បុគ្គលខ្លះបានសម្រេចបោះបង់គោរម្យងា “ឧកញ៉ា” នេះ។
សម្ដេចតេជោ ហ៊ុន សែន កាលពីថ្ងៃទី ២៨ សីហា ២០១៩ បានដាក់ការហាមប្រាម មិនឲ្យកងកម្លាំងប្រដាប់អាវុធទាំងអស់មានដូចជាទាហាន នគរបាល និងកងរាជអាវុធហត្ថមានងារជា «ឧកញ៉ា» តទៅទៀត។ ហេតុនេះ ធ្វើឲ្យឧកញ៉ាខ្លះក្នុងរបាយការណ៍គិតត្រឹមឆ្នំា ២០១៤ បានសម្រេចចិត្តលះបង់ងារជា “ឧកញ៉ា” ក្នុងនោះ បើតាមភ្នំពេញប៉ុស្តិ៍ចុះថ្ងៃទី ២ កញ្ញា ២០១៩ មន្ត្រីជាន់ខ្ពស់ក្របខ័ណ្ឌអគ្គបញ្ជាការនៃកងយោធពលខេមរភូមិន្ទចំនួន ៤៥ បានសម្រេចបោះបង់ងារនេះ។
យ៉ាងណា មកទល់បច្ចុប្បន្ន មិនទាន់មានរបាយការណ៍ថ្មីពីចំនួនឧកញ៉ាដែលត្រូវបានដោយព្រះរាជក្រឹត្យរបស់ព្រះមហាក្សត្រ ត្រូវបានទម្លាយចេញនោះទេ។
និយាយពីលក្ខខណ្ឌដែលបុគ្គលសាមញ្ញម្នាក់ អាចទទួលគោរម្យងា “ឧកញ៉ា” បាន បើយោងតាមអនុក្រឹត្យលេខ១៥ អនក្រ ចុះថ្ងៃទី៥ មេសា ឆ្នាំ១៩៩៤ ដែលចុះហត្ថលេខាដោយនាយករដ្ឋមន្ត្រីទី១ និងទី២ ត្រង់មាត្រា២ ចែងថា “សប្បុរសជន ដែលបានធ្វើអំណោយជូនរដ្ឋជាថវិកា ឬសម្ភារ មានតម្លៃលើសពី១០មុឺនដុល្លារអាមេរិក (US$100.000) ឡើងទៅ នឹងត្រូវបានជូនមេដាយស្ថាបនាជាតិថ្នាក់លេខ១ និងត្រូវបានរាជរដ្ឋាភិបាលស្នើសុំព្រះរាជយោបល់ដ៏ខ្ពង់ខ្ពស់នៃព្រះករុណាជាអម្ចាស់ជីវិតតម្កល់លើត្បូង ដើម្បីទ្រង់ព្រះរាជទានគោរម្យងារជា «ឧកញ៉ា»៕
