កាលពីពេលថ្មីៗនេះ អ្នកប្រដាល់គុនចំរុះ Paddy Pimblett ទើបនឹងប្រកួតបានជ័យជំនះទៅលើគូប្រជែង Kazula Vargas នៅសង្វៀន UFC London ហើយក្រោយទទួលបានជោគជ័យមួយនេះ កីឡាករខាងលើបានបោះពាក្យសម្ដីទៅកាន់គូប្រជែងឯទៀត ដែលក្នុងនោះក៏មានឈ្មោះមហាសេដ្ឋីមួយរូបផងដែរ។
អ្នកមានបំផុតដែលត្រូវបាន The Baddy ចុចឈ្មោះនៅក្នុងបទសម្ភាសន៍គឺ Mark Zuckerberg ដោយ Pimblett បានអះអាងថា មូលហេតុដែលលោកចង់វាយ Mark គឺដោយសារក្រុមហ៊ុន Instagram របស់មហាសេដ្ឋីរូបនេះតែងតែបិទគណនីផ្លូវការរបស់ខ្លួនជាច្រើនដង។
” Mark Zuckerberg ខ្ញុំពិតជាចង់វាយជាមួយអ្នកខ្លាំងណាស់ ព្រោះខ្ញុំពិតជាធុញនឹងទង្វើរបស់អ្នក ធុញនឹងការបិទគណនី Instagram របស់ខ្ញុំ ខណៈអ្វីដែលខ្ញុំតែងតែធ្វើគឺ ជាការជួយដល់សប្បុរសធម៌ និងប្រជាជនដែលមានបញ្ហាស្មារតីប៉ុណ្ណោះ។ អ្នកគឺពិតជាមនុស្សគួរឲ្យស្អប់ខ្លាំងបំផុត”។ នេះបើតាមសម្ដីរបស់ Pimblett បានប្រាប់ទៅកាន់សារព័ត៌មានក្រោយចប់ការប្រកួត។
បញ្ជាក់ដែរថា បច្ចុប្បន្នប្រធានក្រុមហ៊ុន Meta លែងជាប់ឈ្មោះក្នុងបញ្ជីអ្នកមានបំផុតលើលោកទាំង ១០ រូបហើយ បន្ទាប់ពីតម្លៃហ៊ុននៃក្រុមហ៊ុនមួយនេះដាំក្បាលចុះជាខ្លាំងកាលពីប៉ុន្មានសប្ដាហ៍មុន ដែលធ្វើឲ្យមហាសេដ្ឋី Facebook ធ្លាក់តំណែងមកត្រឹមលេខ ១២ ជាមួយទ្រព្យសម្បត្តិប្រមាណ ៨០ ពាន់លានដុល្លារ៕
ប្រភព: essentallysports
