សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានថ្លែងបញ្ជាក់ថា ឥទ្ធិពលអាក្រក់ពីសង្គ្រាម រុស្ស៊ី និងអ៊ុយក្រែន បានធ្វើឱ្យប៉ះពាល់ដល់ពិភពលោកជាពិសេស គឺតម្លៃប្រេងដែលបច្ចុប្បន្នគ្រប់គ្រងលែងបានហើយ។ សម្ដេចតេជោ ហ៊ុន សែន ថ្លែងបញ្ជាក់បែបនេះ នៅក្នុងពិធីសម្ភោធដាក់ឱ្យប្រើប្រាស់ផ្លូវជាតិលេខ៥១(ឧត្ដុង្គ – ថ្នល់ទទឹង) ដែលពិធីធ្វើនៅក្នុងខេត្តកំពង់ស្ពឺ នៅថ្ងៃទី២៥ ខែមីនា ឆ្នាំ២០២២។
សម្ដេចតេជោ ក៏បានបង្ហាញក្តីបារម្ភប្រសិនជាប្រទេសរុស្ស៊ី ដែលអ្នកផលិតប្រេងធំមួយក្នុងពិភពលោកឈប់ ឬផ្អាកផលិតប្រេងលក់ ដែលនាំអោយតម្លៃប្រេងអន្តរជាតិ នឹងគ្រប់គ្រងលែងបានធ្វើឱ្យប៉ះពាល់ដល់ជីវភាពរស់នៅរបស់ពលរដ្ឋទូទាំងពិភពលោក ។
គួររម្លឹកថា នៅក្នុងពិធីប្រគល់-ទទួលជាផ្លូវការនូវជំនួយវ៉ាក់សាំងកូវីដ-១៩ ពីប្រជាជន និងរដ្ឋាភិបាល ហុងគ្រី ជូនប្រជាជន និងរាជរដ្ឋាភិបាលកម្ពុជា នៅវិមានសន្តិភាព នាថ្ងៃទី១៨ ខែមីនា ឆ្នាំ២០២២ សម្ដេចតេជោ ហ៊ុន សែន ក៏បានបង្ហើបថា រាជរដ្ឋាភិបាលកំពុងតាមដានករណីរុស្ស៊ី-អ៊ុយក្រែន ដើម្បីរៀបចំគោលនយោបាយ និងដាក់ចេញនូវវិធានការអន្តរាគមន៍ចាំបាច់ ឱ្យទាន់ពេលវេលា។
គួរបញ្ជាក់ថា សង្គ្រាមនៅអ៊ុយក្រែនដែលបានចាប់ផ្ទុះឡើងកាលពីថ្ងៃទី២៤កុម្ភៈ ឆ្នាំ២០២២ កំពុងបន្ត បណ្តលមានការបាត់បង់ជីវិត និងរបួសជនស៊ីវិល និងយោធា ហើយបច្ចុប្បន្ន ពិភព លោក កំពុងតែតាមដានមើលយ៉ាងយកចិត្តទុកដាក់ជាទីបំផុត ។ ជាមួយគ្នា ក្រោយ សង្គ្រាម ផ្ទុះឡើងរវាងរស្ស៊ី និងអ៊ុយក្រែន ជាង៣សប្ដាហ៍មកនេះ ក៏បានតម្លៃប្រេង នៅលើ ពិភពលោក បានហក់ឡើងកាន់តែខ្ពស់ ដែលកំពុងចោទជាបញ្ហាកាន់ តែច្រើនសេដ្ឋ កិច្ចពិភពលោក។
