នៅក្នុងរយៈពេល៣ខែដើមឆ្នាំ២០២២នេះ ការនាំចេញផលិតផលកសិកម្មកម្ពុជាទៅលក់នៅក្រៅប្រទេសមានបរិមាណសរុប ៣ ៤៣៤ ០៧០,៦៣តោន កើនឡើងជាង ១១% បើធៀបរយៈពេលដូចគ្នាក្នុងឆ្នាំ២០២១។
របាយការណ៍របស់អគ្គនាយកដ្ឋានកសិកម្មបានឲ្យដឹងថា កសិផលសំខាន់ៗដែលនាំចេញគឺមានអង្ករមានចំនួន ១៧០ ៥៣៩តោន កើនឡើងជាង ១០%។
ដោយឡែកការនាំចេញស្រូវក្នុងរយៈពេល៣ខែដើមឆ្នាំ២០២២ មានចំនួន ១ ៣៩០ ១៨១តោន ទៅកាន់ប្រទេស វៀតណាមមានការកើនឡើងចំនួន ១៦៨ ៥៣៦តោន (១៣,៨០%) បើធៀបនឹងរយៈពេលដូចគ្នានៅឆ្នាំ២០២១ ដែលមានចំនួន ១ ២២១ ៦៤៥តោន។
ក្រៅពីស្រូវ-អង្ករ ការនាំចេញផលិតផលកសិកម្មផ្សេងទៀតមានចំនួន ២ ៣៥៤ ៩០៦,៦៣តោន កើនឡើងចំនួន ៧៧ ៧៣៤,៧១តោន ស្មើនឹង ៣,៤១% បើធៀបនឹងរយៈពេលដូចគ្នាក្នុងឆ្នាំ២០២១ ដែលមានចំនួន ២ ២៧៧ ១៧១,៩២តោន។
បើតាមការប៉ាន់ស្មានតម្លៃនៃការនាំចេញកសិផលក្នុងរយៈពេល៣ខែដើមឆ្នាំ២០២២ ដែលទទួលបានពីការនាំចេញកសិផល (ឯកតាតម្លៃផ្អែកតាមវិក្កយបត្ររបស់អ្នកនាំចេញ) មានចំនួន ១ ២៦៨ ៥៩៣ ៧៨០,៧៣ដុល្លារអាមេរិក ដែលក្នុងនោះការនាំចេញអង្ករមានចំនួន ១៤៥ ៨១០ ៨៤៥ដុល្លារអាមេរិក ការនាំចេញស្រូវមានចំនួន ២៤៨ ៨៤២ ៣៩៩ដុល្លារអាមេរិក ការនាំចេញកសិផលក្រៅពីស្រូវ-អង្ករមានចំនួន ៨៧៣ ៩៤០ ៥៣៦,៧៣ដុល្លារអាមេរិក៕
