អ្នកស្រី ឃី មុន្នី អគ្គនាយិកាក្រុមហ៊ុនAmru Rich Cambodia បានលើកឡើងថា ការទិញផលិតផលជាតិ គឺបងប្អូន ប្រជាពលរដ្ឋទាំងអស់កំពុងបានបង្កើតការងារដល់យុវជនខ្មែរ បង្កើតទីផ្សារដល់កសិករខ្មែរពិតប្រាកដ រក្សាលំនឹង សាច់ប្រាក់ក្នុងស្រុកមិនចាយចេញក្រៅតាមរយៈផលិតផលនាំចូល ។
អ្នកស្រី ឃី មុន្នី បានលើកឡើងថា សន្ទុះនៃការគាំទ្រសន្លឹកគុយទាវខ្មែររបស់អ្នកស្រី ពិតជាបានលើកទឹកចិត្តអ្នកស្រីដែលជាសហគ្រិនកូនខ្មែរក្នុងស្រុកម្នាក់មានទឹកចិត្តបន្ត ខណៈដែលសន្លឹកគុយទាវខ្មែរតាំងពីការចាប់ផ្តើមដាក់លក់ក្នុងស្រុកថ្ងៃដំបូង លក់តាំងពីម៉ាកនាំចេញ រហូតបង្កើតម៉ាកភាសាជាតិ ដែលដំបូងមិនបានគិតថាសន្លឹកកគុយទាវខ្មែរ ទទួលបានការគាំទ្រខ្លាំងនោះទេដោយកំរិតប្រកួតប្រជែងជាមួយប្រទេសជិតខាង ណាមួយផលិតផលសន្លឹកគុយទាវខ្មែរពីដើមមកគឺផលិតសំរាប់តែនាំចេញទៅទីផ្សារសហគមន៍អឺរ៉ុបនិងអាមេរិចប៉ុណ្ណោះ ព្រោះស្តងដារគុណភាពគឺទទួលស្គាល់ដោយបណ្តាប្រទេសនៅទីនោះ ហើយថ្លៃដើមក៏ខ្ពស់ ។
អ្នកស្រី បានបន្តថា មុនពេលសម្រេចចិត្តដាក់លក់សន្លឹកគុយទាវនេះ គឺអ្នកស្រីបានដាក់តំលៃទាបសមល្មមមួយដោយមិនរំពឹងថាចំនេញលុយពីបងប្អូនអតិថិជននោះទេ ។ការបង្កើនការលក់ក្នុងស្រុកនេះគឺចង់រក្សារការងារដល់ក្រុមការងារ បុគ្គលិកកម្មករនៅរោងចក្រនិងបន្តរខិតខំប្រើប្រាស់វត្ថុធាតុដើមក្នុងស្រុកអោយអស់លទ្ធភាព អំឡុងពេលវិបត្តិកូវីដ១៩ ដែល មានឧបសគ្គខ្លះក្នុងការនាំចេញដោយថ្លៃកប៉ាលឡើងថ្លៃខ្ពស់ពេក ហើយប្រទេសខ្លះបិទនាអំឡុងពេលនោះ ។
យ៉ាងណាមិញ អ្នកស្រីថាឥឡូវនេះសន្លឹកគុយទាវមូរម៉ាកភាសារជាតិ បានផ្តល់នូវឱជារសនិងគុណភាពអាហារសុខភាពក្នុងទីផ្សារដល់បងប្អូនអតិថិជនជាមួយតំលៃសមរម្យ ហើយអ្នកស្រីក៏អរគុណដល់អតិថិជនទាំងអស់ដែលនៅជាមួយ សន្លឹកគុយទាវ ខ្មែរ ប្រើប្រាស់ហូបដោយរីករាយជាមួយក្រុមគ្រួសារ។
គួរបញ្ជាក់ថា ក្រុមហ៊ុនAmru Rich Cambodia ជាក្រុមហ៊ុនលំដាប់ស្តង់ដារដ៏ធំមួយ ដែលបាននាំកិត្តិនាមកម្ពុជា ទៅកាន់ឆាក អន្តរជាតិ តាមរយៈការជំរុញ និងលើកកម្ពស់វិស័យកសិកម្ម។ក្រុមហ៊ុនមួយនេះ បានផលិតនូវ សន្លឹកគុយទាវសរីរាង្គខ្មែរ ដើម្បីជួយបំពេញតម្រូវការហូបចុកជូនអតិថិជនកម្ពុជា ក៏ដូចជាបណ្តាប្រទេសនៅប៉ែកអឺរ៉ុបជាដើម ៕ អត្ថបទ៖ ពុធិកា
