ភ្នំពេញ៖ ការនាំចូលសម្ភារសំណង់ រួមមានបរិក្ខាសំណង់ផ្សេងៗ ដូចជា ស៊ីម៉ង់តិ៍ និងដែក ត្រូវបានព្យាករណ៍ថា នឹងនៅតែបន្តកើនឡើងនៅឆ្នាំ២០២០ ដែលឆ្លុះបញ្ជាំងពីកំណើននៃវិស័យសំណង់នៅកម្ពុជា ខណៈគម្រោងសាងសង់ក្នុងឆ្នាំ២០១៩ មានសន្ទុះកើនឡើងខ្ពស់។នេះបើតាមរបាយការណ៍របស់ធនាគារជាតិនៃកម្ពុជា ។
ធនាគារជាតិនៃកម្ពុជា បានបង្ហាញពីរបាយការណ៍ស្តីពី «វឌ្ឍនភាពម៉ាក្រូសេដ្ឋកិច្ច និងវិស័យធនាគារឆ្នាំ២០១៩ និងទស្សនវិស័យឆ្នាំ២០២០» កាលពីដើម ខែមករាកន្លងទៅ បានឲ្យដឹងថា វិស័យសំណង់នឹងនៅតែជាសសរស្តម្ភមួយនៃការជំរុញកំណើនសេដ្ឋកិច្ចកម្ពុជាសម្រាប់ឆ្នាំ២០២០។
ធនាគារជាតិនៃកម្ពុជា សរសេរនៅក្នុងរបាយការណ៍ថា៖មានកតាលីករ២សំខាន់ ដែលជួយជម្រុញឲ្យវិស័យសំណង់ និងអចលនព្រទ្យឆ្នាំ២០២០ បន្តកើនឡើង គឺនិន្នាការកើនឡើងនៃការនាំចូលសម្ភារសំណង់ និងគម្រោងសាងសង់ដែលទទួលបានការអនុម័ត ដែលធាតុចូលទាំងពីរនេះ គឺជាការឆ្លុះបញ្ចាំងវិស័យសំណង់ និងអចលនទ្រព្យបន្តកើនឡើង។
ធគារជាតិបានឲ្យដឹងបន្តថា សម្រាប់ឆ្នាំ២០២០ ការនាំចូលសម្រាប់ផ្គត់ផ្គង់ដល់វិស័យសំណង់ ត្រូវបានព្យាករណ៍ថា មានតម្លៃប្រមាណជាង ២,៣០០ លានដុល្លារ។
ទន្ទឹមគ្នានេះ ធនាគារជាតិនៃកម្ពុជា ក៏បានបញ្ជាក់នៅក្នុងរបាយការណ៍ទស្សនវិស័យនេះដែរថា ការនាំចូលបរិក្ខារសំណង់ផ្សេងៗ តំណាងជិតជាង៥០ភាគរយ ធៀបនឹងការនាំចូលសម្ភារសំណង់សរុប ឬមានទំហំទឹកប្រាក់នាំចូល ប្រមាណជិត ១ ៤០០លានដុល្លារ។ ចំណែកការនាំចូលស៊ីម៉ងត៍ តំណាងជិត១០ភាគរយ ឬស្មើប្រមាណជិត ២០០លានដុល្លារ។ដោយឡែក ការនាំចូលដែកតំណាងជិត ៤០ភាគរយ ឬស្មើនឹងតម្លៃសម្រាប់នាំចូល ប្រមាណជិត ៨០០លានដុល្លារ។
យោងតាមរបាយការណ៍នៃក្រសួងរៀបចំដែនដី នគរូបនីយកម្ម និងសំណង់ នៅឆ្នាំ២០១៩ វិស័យសំណង់មានសន្ទុះកំណើនយ៉ាងខ្លាំង ជាមួយនឹងគម្រោងសាងសង់មានចំនួន ៤ ៤៤៦ គម្រោង មានកំណើន ៥៥ភាគ ធៀបនឹងឆ្នាំ២០១៨ ខណៈទុនវិនិយោគលើវិស័យសំណង់ មានចំនួនប្រមាណ ៩,៣ ពាន់លានដុល្លារ ដែលកើនឡើងប្រមាណ ៧៨ ភាគរយ។
បើតាមរបាយការណ៍ធនាគារជាតិដដែលបានបង្ហាញថា នៅក្នុងឆ្នាំ២០១៩ ការនាំចូលសម្ភារសំណង់មានតម្លៃប៉ាន់ស្មាន ១ ៥០០ លានដុល្លារ ក្នុងនោះការនាំចូលបរិក្ខារសំណង់ផ្សេងៗ មានតតម្លៃជាង ៩០០លានដុល្លារ ការនាំចូលស៊ីម៉ង់តិ៍មានតម្លៃជាង ១០០លានដុល្លារ និងការនាំចូលដែកមានតម្លៃ ៥០០លានដុល្លារ។
បើតាមការព្យាករណ៍របស់ធនគារជាតិនៃកម្ពុជា សេដ្ឋកិច្ចកម្ពុជា នឹងសម្រេចបានក្នុងរង្វង់ ៧ភាគរយ នៅឆ្នាំ២០២០ ធ្លាក់ចុះពីកំណើនដែលគេប៉ាន់ប្រមាណ ៧,១ភាគរយ ក្នុងឆ្នាំ២០១៩៕ អត្ថបទ៖ សិរីកា
