លោក អេម៉ានុយអែល ម៉ាក្រុង កាលពីថ្ងៃសៅរ៍ ទី៧ ឧសភាម្សិលមិញ បានស្បថចូលកាន់តំណែងជាប្រធានាធិបតីបារាំងមួយអាណត្តិទៀត នាវិមានប្រធានាធិបតី ដោយមានការចូលរួមពីឥស្សរជននយោបាយជាន់ខ្ពស់របស់បារាំង ដែលក្នុងនោះមានអតីតប្រធានាធិបតីបារាំង លោក ហ្វ្រង់ស័រហូឡង់ និងលោកនីកូឡា សាកូហ្ស៊ី រួមទាំងអតីតនាយករដ្ឋមន្រ្តី និងរដ្ឋមន្រ្តី ក្រុមគ្រូពេទ្យ កងទ័ព និងអ្នកតំណាងអង្គការសមាគម សរុបជាង៤៥០នាក់។
ថ្លែងនៅក្នុងពិធីស្បថចូលកាន់តំណែង លោក ម៉ាក្រុង បានសន្យាដឹកនាំប្រទេសបារាំង ដោយប្រើវិធីសាស្រ្តថ្មី តាមរយៈការរៀបចំការធ្វើកំណែទម្រង់ ដោយមានការចូលរួមពីប្រជាជនបារាំង។ លោកម៉ាក្រុង បានសន្យាផងដែរថា នឹងប្រែក្លាយប្រទេសបារាំងឲ្យខ្លាំងពូកែ ឲ្យក្លាយជាទីកន្លែងដែលគេអាចរស់នៅបាន។
សូមជម្រាបថា បើទោះបីលោក អេម៉ានុយអែល ម៉ាក្រុង ស្បថចូលកាន់តំណែងប្រធានាធិបតី នៅថ្ងៃសៅរ៍ម្សិលមិញក៍ពិតមែន ប៉ុន្តែ អាណត្តិប្រធានាធិបតីរបស់លោកនឹងចាប់ផ្តើមជាផ្លូវការនៅសប្តាហ៍ក្រោយ ពោលគឺចប់អាណត្តិរដ្ឋាភិបាលចាស់ នៅថ្ងៃទី ១៣ ខែឧសភា ឆ្នាំ២០២២នេះ។
យ៉ាងណា សម្រាប់អាណត្តិ៥ឆ្នាំ ខាងមុខ ប្រធានាធិបតីម៉ាក្រុង នឹងអាចប្រឈម ជួបឧបសគ្គច្រើន ក្នុងដឹកនាំប្រទេស ជាពិសេស ក្នុងករណីដែលគណបក្សរបស់លោកមិនអាចទទួលជ័យជំនះលើសលុប នៅក្នុងការបោះឆ្នោតសភា នៅខែមិថុនាខាងមុខ។ គ្មានសំឡេងភាគច្រើន នៅរដ្ឋសភា លោកម៉ាក្រុងត្រូវបង្ខំចិត្តបង្កើតរដ្ឋាភិបាលចម្រុះជាមួយគណបក្សប្រឆាំងជាក់ជាមិនខាន៕
