អ្នកស្នេហាវិស័យកីឡា សម្តែងការសោកសៅចំពោះមរណៈភាពឧកញ៉ា ឬទ្ធី សំណាង

ជុំវិញ​ឧកញ៉ា

អ្នកស្នេហាវិស័យកីឡា ​​ជាពិសេស​អ្នកគាំទ្របាល់ទាត់ រួម​ទាំង​កីឡាករ​​ជា​ច្រើន​ ​​បាន​សម្តែង​ការសោកសៅ​​នៅ​លើ​បណ្តាញ​សង្គម​ ចំពោះ​ឧកញ៉ា ឬទ្ធី សំណាង ​​​​ប្រធាន​ក្លិប​បាល់ទាត់ភ្នំពេញក្រោន ដែល​បាន​ទទួល​មរណៈភាព​ ដោយ​រោគាពាធ ​​កាល​ពី​ព្រឹក​មិញ។

សូមចុច Subscribe Channel Telegram Oknha news គ្រប់សកម្មភាពឧកញ៉ា សេដ្ឋកិច្ច ពាណិជ្ជកម្ម និងសហគ្រិនភាព

ឃឹម បូរី អតីត​ខ្សែ​ប្រយុទ្ធ​ក្រុម​ភ្នំពេញក្រោន និង​បច្ចុប្បន្ន​ជា​គ្រូបង្គោល​ក្រុម​ណាហ្គាវើលដ៏ ​​បាន​បង្ហោះ​សារ​ថា៖ “ខ្ញុំ​ពិតជាមានអារម្មណ៍តក់ស្លុតខ្លាំងមែនទែន ដោយទទួលដំណឹងថា លោកឧកញ៉ា ឬទ្ធី សំណាង បានទទួល​មរណៈភាព ក្នុងនាមខ្ញុំបាទជាអតីតកីឡាករបាល់ទាត់ភ្នំពេញក្រោន ខ្ញុំបាទសូមចូលរួមរំលែកទុក្ខ​ដ៏ក្រៀមក្រំ​នេះ​ផង។ គាត់ជាមេដ៏ល្អ តែងតែជួយជ្រោមជ្រែងមនុស្សជុំវិញខ្លួន ជាស្វាមី ជាឪពុក និងជាបុគ្គលដ៍គំរូ វាជាការ​បាត់បង់​ដ៏ធំមួយ សម្រាប់វិស័យកីឡាបាល់ទាត់កម្ពុជា យើងបានបាត់បង់បុរសដ៏អស្ចារ្យម្នាក់ ដែលបានបណ្តុះ​បណ្តាលបាល់ទាត់ដល់យុវជន​កម្ពុជា​ជាច្រើន។ មួយជីវិតរបស់គាត់​បានចំណាយពេលវេលាជាច្រើន​ជាមួយ​បាល់ទាត់។ សូមវិញ្ញានក្ខន្ធលោកឧកញ៉ា ឬទ្ធី សំណាង បានទៅដល់សុគតិភព”។

ចំណែក​ឯ​លោក​ ដួង ឆាយ ក៏​បាន​បញ្ចេញ​មតិ​ថា៖ “លារហូតហើយណាហ៊ា។ លាទាំងមិនបានលា។ លាទាំង​អាល័យ។ សូមវិញ្ញាណក្ខន្ធហ៊ាទៅកាន់សុគតិភព និងកើតជាតិណាៗកុំអោយអាយុខ្លីដូចជាតិនេះទៀតណាហ៊ា។ គោរពស្រលាញ់ ឌួងឆាយ”។

ដោយឡែក សហព័ន្ធកីឡាបាល់ទាត់កម្ពុជា ក៏​បាន​ចូលរួមរំលែកទុក្ខដ៏សែនក្រៀមក្រំ និងសោកស្តាយ​បំផុត​ជាមួយដំណឹងមរណភាពរបស់ លោកឧកញ៉ា ឬទ្ធី សំណាង ដែលជាសមាជិក​គណៈកម្មាធិការប្រតិបត្តិ​សហព័ន្ធកីឡាបាល់ទាត់កម្ពុជា។ ការបាត់បង់លោកឧកញ៉ា ឬទ្ធី សំណាង គឺជាការបាត់បង់នូវឥស្សរជនមួយរូប ដែលតែងតែចូលរួមក្នុងសកម្មភាពនៃការអភិវឌ្ឍន៍វិស័យបាល់ទាត់កម្ពុជានាពេលកន្លងមក ជាមួយនឹងស្នាដៃ និងការលះបង់ដ៏ធំធេង។

លើស​ពីនេះ​ សម្រាប់​ការ​ប្រកួត​ ​ស៊ីហ្គេម​លើក​ទី​៣១ រវាង​ក្រុមបាល់ទាត់​ជម្រើស​ជាតិ​កម្ពុជា ទល់​នឹង​ក្រុម​ជម្រើស​ជាតិ​សិង្ហបុរី វេលា​ម៉ោង​ ០៤:០០នាទី​​រសៀល​ថ្ងៃ​នេះ សហព័ន្ធកីឡាបាល់ទាត់កម្ពុជា បាន​សម្រេច​ឱ្យ​កីឡាករ​ជម្រើស​ជាតិ​កម្ពុជា​ទាំង​អស់​ ប្រើខ្សែដៃអាវខ្មៅ ដើម្បី​កាន់ទុក្ខ​ចំពោះ​មរណៈភាព​របស់​ឧកញ៉ា ឬទ្ធី សំណាង ផង​ដែរ៕