នាយករដ្ឋមន្ត្រី​ថ្មី​ស្រីលង្កា ប្រកាស​ឲ្យ​ប្រជាជន​ត្រៀម​ប្រឈម​ជាមួយ​កង្វះ​ប្រេង និង​អគ្គិសនី

អន្តរជាតិ

នៅ​ថ្ងៃអង្គារ​ទី ១៧ ឧសភា​នេះ​ រដ្ឋាភិបាល​ស្រីលង្កា​បាន​ជួប​ប្រជុំ​​សភា​ជា​លើក​ដំបូង បន្ទាប់​ពី​មាន​ករណី​ផ្ទុះ​អំពើ​ហិង្សា​កាលពី​សប្ដាហ៍​មុន ស្របពេល​នាយករដ្ឋមន្ត្រី​ថ្មី​ស្រីលង្កា​បង្ហើប​ថា ប្រទេស​កំពុង​ជួប​វិបត្តិ​សេដ្ឋកិច្ច​ដ៏​ធ្ងន់ធ្ងរ​បំផុត។

សូមចុច Subscribe Channel Telegram Oknha news គ្រប់សកម្មភាពឧកញ៉ា សេដ្ឋកិច្ច ពាណិជ្ជកម្ម និងសហគ្រិនភាព

លោក Ranil Wickremesinghe ជា​នាយករដ្ឋមន្ត្រី​ថ្មី បាននិយាយ​ប្រាប់​តាម​រយៈ​ទូរទស្សន៍​កាលពី​ថ្ងៃច័ន្ទ​ថា ប្រទេស​ដីកោះ​មួយ​នេះ​ត្រូវតែ​ប្រឈម​នឹង​ការពិត​ដែល​គួរ​ឲ្យ​បារម្ភ​មួយ​នេះ គឺ​កង្វះ​ខាត​ប្រេង និង​អគ្គិសនី។

“​ពេល​នេះ ពួកយើង​គឺ​មាន​សល់​ប្រេង​ក្នុង​ស្តុក​អាច​ផ្គត់ផ្គង់​បាន​ត្រឹម​រយៈពេល ១ ថ្ងៃ​ប៉ុណ្ណោះ ហើយ​រយៈពេល​ប៉ុន្មាន​ខែ​ខាងមុខ នឹង​ក្លាយជា​ពេលវេលា​ដ៏​លំបាក​បំផុត​នៅ​ក្នុង​ជីវិត​របស់​យើង”។ នេះ​បើ​តាម​សម្ដី​របស់​នាយករដ្ឋមន្ត្រី​ស្រីលង្កា។

បញ្ជាក់​ដែរ​ថា ទុន​បម្រុង​ជាតិ​របស់​ប្រទេស​មួយ​នេះ​ គឺ​ស្ទើរ​តែ​មិនសល់​លុយ ខណៈ​កាលពី​ចុងឆ្នាំ ២០១៩ ពួកគេ​មាន​ថវិកា​បម្រុង ៧,៥ ពាន់​លាន​ដុល្លារ ស្របពេល​ពួកគេ​ត្រូវការ​លុយ​ប្រមាណ ៧៥ លាន​ដុល្លារ​ក្នុង​រយៈពេល​ប៉ុន្មាន​ថ្ងៃ​ខាងមុខ ដើម្បី​អាច​បន្ត​ដង្ហើម​សេដ្ឋកិច្ច។

ដោយឡែក អគ្គិសនី​នឹង​អាច​ផ្ដាច់​រហូត​ដល់ ១៥ ម៉ោង​ក្នុង​មួយ​ថ្ងៃ ដោយសារ​កង្វះ​ខាត​ផ្នែក​ប្រេង ដែល​ភាគច្រើន​គឺ​ជា​ការនាំចូល​ពី​បរទេស៕

ប្រភព: CNA