សណ្ឋាគារ ហ្គ្រេនហូថែលអង្គរ គឺជាសណ្ឋាគារប្រណិតលំដាប់ផ្កាយ៥មួយនៅទឹកដីខេត្តសៀមរាបអង្គរដែលស្ថិតក្រោមការគ្រប់គ្រងដោយស្លាកសញ្ញា Raffles ជាបុត្រសម្ព័ន្ធជាមួយសណ្ឋាគារ រ៉ាហ្វលឡឺរ៉ូយ៉ាល់ ដែរ។
សណ្ឋាគារ Raffles Grand d’Angkor គ្រោង នឹង បើក ដំណើរការ វិញ នៅ ដើមខែក្រោយនេះ ពោលគឺនៅថ្ងៃទី១ ខែមិថុនា ឆ្នាំ២០២២ បន្ទាប់ពីត្រូវ បាន បិទ អស់ រយៈពេលជាង ២ឆ្នាំ។ ការបើកដំណើរការអាជីវកម្មឡើងវិញរបស់ហ្គ្រេនហូថែលអង្គរ គឺស្របពេលដែលមានទេសចរបរទេសចូលមកទស្សនានៅកម្ពុជាបណ្តើៗហើយ ក្រោមរដ្ឋាភិបាលបន្ធូរបន្ថយ ការ រឹតត្បិតនៃវិធានសុខាភិបាល។ នេះបើតាមប្រភពជិតស្និទ្ធនឹងអ្នកគ្រប់គ្រងទូទៅសណ្ឋាគារ ហ្គ្រេនហូថែលអង្គរ បង្ហើបប្រាប់ឱ្យសារព័ត៌មានឧកញ៉ាញូស៍ដឹងកាលពីពេលថ្មីៗកន្លងទៅ។
បើតាមក្រសួងទេសចរណ៍ ក្នុងរយៈពេលដើមឆ្នាំ២០២២នេះ មានភ្ញៀវទេសចរដើរកម្សាន្តច្រើននៅទូទាំងប្រទេសដែលអាចចាត់ទុកថាជាសញ្ញាវិជ្ជមាននៃការងើបឡើងវិញដ៏ឆាប់រហ័សនៃវិស័យទេសចរណ៍សម្រាប់ឆ្នាំ២០២២នេះ។
សណ្ឋាគារ Raffles Grand d’Angkor ដែលជាសម្បត្តិបេតិកភណ្ឌដ៏ល្បីល្បាញនៅអាស៊ីអាគ្នេយ៍មួយនេះ ត្រូវបានទទួលស្គាល់ជាសណ្ឋាគារល្អបំផុតមួយក្នុងពិភពលោកពី Travel + Leisure ក្នុងចំណោម ៥០០ សណ្ឋាគារនៃឆ្នាំ ២០២២។
សណ្ឋាគារ ហ្គ្រេនហូថែលអង្គរ ត្រូវបានក្រុមហ៊ុនមានមូលដ្ឋាននៅសិង្ហបុរី Lodgis ដែលបានធ្វើការវិនិយោគរួមគ្នារវាងក្រុមហ៊ុន សិង្ហបុរី Warburg Pincus និង ក្រុមហ៊ុនវៀតណាម Vinacapital បានទិញយក សណ្ឋារគារ ហ្គ្រេនហូថែលអង្គរ នេះកាលពីដើមខែ កក្កដា ឆ្នាំ២០១៨ ។
សណ្ឋាគារនេះ ត្រូវបានសាងសង់ឡើងដំបូងនៅទសវត្សរ៍ ១៩៣០ ហើយត្រូវបានស្ថាបនា និងដំណើរការឡើងវិញនៅឆ្នាំ ១៩៩៧ ដោយប្រតិបត្តិការក្រោមម៉ាកយីហោ ‘Raffles’ ដែលគ្រប់គ្រងដោយក្រុមហ៊ុនបារាំង ACCOR Hotels ៕
