រដ្ឋមន្រ្តីកសិកម្ម ស្នើ World Bank ជួយ ៣ ចំនុច ដើម្បីជំរុញ​គម្រោង​ពិពិធកម្មវិស័យកសិកម្មកម្ពុជា

សង្គម​និង​សេដ្ឋកិច្ច

រដ្ឋមន្រ្តីក្រសួងកសិកម្មកម្ពុជា ឯកឧត្តម វេង សាខុន បានស្នើទៅកាន់ World Bank ឲ្យជួយលើ៣ចំនុចធំៗ ដើម្បីជំរុញគម្រោងពិពិធកម្មវិស័យកសិកម្មកម្ពុជាឲ្យកាន់តែប្រសើរឡើង។

សូមចុច Subscribe Channel Telegram Oknha news គ្រប់សកម្មភាពឧកញ៉ា សេដ្ឋកិច្ច ពាណិជ្ជកម្ម និងសហគ្រិនភាព

ការស្នើនេះ ធ្វើឡើងនៅក្នុងជំនួបពិភាក្សាការងារ និងវាយតម្លៃលើលទ្ធផលគម្រោងពាក់កណ្តាលអាណត្តិ (MTR) និងបេសកកម្មគាំទ្រការអនុវត្តលើកទី៥ (ISM) សម្រាប់គម្រោងពិពិធកម្មវិស័យកសិកម្មកម្ពុជា (CASDP) កាលថ្ងៃទី២១ ខែមិថុនា ឆ្នាំ២០២២។

នៅក្នុងជំនួបនោះ ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានបង្ហាញការគាំទ្រឲ្យក្រុមការងារពាក់ព័ន្ធ និងក្រុមការងារ WB រួមសហការគ្នាធ្វើការសិក្សាលម្អិតបន្ថែមអំពីតម្រូវការជាក់ស្តែង និងបន្ទាន់របស់ប្រជាកសិករ ធ្វើយ៉ាង ណាឲ្យស្របទៅនឹងបរិបទនៃស្ថានភាពសេដ្ឋកិច្ចសកល និងជាពិសេសស្ថានភាពនៃវិបត្តិជំងឺឆ្លង កូវីដ-១៩ ដែលមានលក្ខណ:ល្អប្រសើរជាបន្តបន្ទាប់។

ជាមួយគ្នានេះ ឯកឧត្តម បានស្នើចំនួន ៣ ចំនុចធំៗ ទៅកាន់ធនាគារពិភពលោក ក្នុងនោះ រួមមាន៖

ទី១- ពិនិត្យលើប្រព័ន្ធស្រោចស្រពដែលប្រើថាមពលពន្លឺព្រះអាទិត្យ (សូឡា) ដើម្បីជួយកាត់ បន្ថយការចំណាយលើថ្លៃភ្លើង និងប្រេងឥន្ទន:។

ទី២- ពិនិត្យលទ្ធភាពជួយសាងសង់ហេដ្ឋារចនាសម្ព័ន្ធគាំទ្រលើផលិតកម្មដំណាំ មានបន្លែផងដែរ ដើម្បីលើកកម្ពស់ផលិតភាពផលិតកម្ម តម្លៃបន្ថែម រួមទាំងទីផ្សារ និងការកែច្នៃផងដែរ។

ទី៣- ជួយជាកម្ចីឲ្យដល់សមាគមចិញ្ចឹមសត្វ បណ្តុំកសិករចិញ្ចឹមមាន់ និងភ្ញាស់កូនមាន់ ដើម្បីយកទៅពង្រីកផលិតកម្មចិញ្ចឹមសត្វ លើកកម្ពស់ការផ្គត់ផ្គង់សាច់ និងស៊ុតឲ្យបានគ្រប់គ្រាន់តាមតម្រូវការទីផ្សារក្នុងស្រុក។

ជាការឆ្លើយតប លោកស្រី ចំរើន មុទិតា អ្នកដឹកនាំក្រុមការងាររបស់ធនាគារពិភពលោក ក៏បានបង្ហាញក្តីសង្ឃឹម និងជឿជាក់ថា គម្រោងនេះនឹងបង្កើតបានផ្លែផ្កាស្របតាមផែនការដែលបានគ្រោងទុក របស់ក្រសួងកសិកម្ម រុក្ខាប្រមាញ់ និងនេសាទ នៅពេលបញ្ចប់អាណត្តិ។

គួរបញ្ជាក់ដែរថា នៅក្នុងជំនួបខាងលើនេះដែរ រដ្ឋមន្រ្តីក្រសួងកសិកម្ម ក៏បានផ្តល់មតិឲ្យក្រុមការងារគម្រោងសិក្សាលើលទ្ធភាពរបស់សហគមន៍ដើម្បីជួយពង្រឹងសមត្ថភាព ចំណេះជំនាញ បទពិសោធន៍ ការងារដឹកនាំ និងគ្រប់គ្រង រដ្ឋបាល គណនេយ្យ និងហិរញ្ញវត្ថុ ក្នុងបំណងប្រែក្លាយសហគមន៍កសិកម្ម ឬសហគមន៍ចិញ្ចឹមសត្វឲ្យទៅ ជាសហគ្រា កសិធុរកិច្ចនៅជនបទ ក្នុងឆន្ទ:រក្សាឲ្យបាននូវនិរន្តរភាពផលិតកម្ម និងម្ចាស់ការក្រោយពេលគម្រោងត្រូវបានបញ្ចប់ផងដែរ៕

80 Shares