ទិវាភាពជាអ្នកមានប្រចាំឆ្នាំ ត្រូវបានបង្កើតឡើងក្នុងគោលបំណងសំខាន់មួយ គឺជាការឧទ្ទិសដើម្បីឱ្យមនុស្សគ្រប់គ្នាសុទ្ធតែអាចក្លាយជាអ្នកមាន ឬនិយាយឱ្យសាមញ្ញថាយើងរួមគ្នាដើម្បីកសាងកម្ពុជា ដែលមនុស្សគ្រប់គ្នាសុទ្ធតែអាចក្លាយជាអ្នកមាន។ នេះបើតាមការលើកឡើងរបស់លោក ហោ ចាន់រដ្ឋា អ្នករៀបចំកម្មវិធី និងជាអ្នកស្រាវជ្រាវភាពជាអ្នកដឹកនាំ។
លោក ហោ ចាន់រដ្ឋា បានលើកឡើងថា៖ ក្នុងរយៈពេល៤ឆ្នាំនេះ យើងចាប់ផ្តើមតាំងពីឆ្នាំដំបូងនិយាយពី «ភាពជាអ្នកមានបានជាទូទៅ» ឆ្នាំទី២ និយាយពី «គំនិតអ្នកមាន» ឆ្នាំទី៣ និយាយពី «សកម្មភាពអ្នកមាន» ហើយឆ្នាំនេះ ជាឆ្នាំទី៤ ដែលយើងនិយាយអំពី «ទម្លាប់អ្នកមាន»។
លោកថា យើងដឹងហើយថា ទម្លាប់បែបណា គឺវាសនាយើងបែបហ្នឹង ដូច្នេះយើងនិយាយពីទម្លាប់អ្នកមាននេះ គោលបំណងដើម្បីចង់ឱ្យប្រជាជាតិខ្មែររបស់យើង រកឃើញទម្លាប់ជាអ្នកមាន មិនថាពួកគាត់ពេលនេះជាអ្នកក្រ បើសិនជាពួកគាត់រកឃើញទម្លាប់អ្នកមាន គឺគាត់កសាងទម្លាប់អ្នកមានទៅ នឹងអាចក្លាយជាអ្នកមាន។ បើសិនជាគាត់ជាអ្នកមាន គឺនឹងអាចរកឃើញទម្លាប់អ្នកមានពិតប្រាកដ ដើម្បីកសាងភាពមានបានឱ្យរឹងមាំ គង់វង់យូរអង្វែង។
លោកបន្ថែមទៀតថា គោលបំណងដ៏សំខាន់បំផុតនោះគឺ យើងចង់ឱ្យប្រទេសកម្ពុជារបស់យើង បង្កើតអ្នកមានដ៏ល្អ ដើម្បីចូលរួមជួយអភិវឌ្ឍសង្គមជាតិ។
សូមបញ្ជាក់ថា ទិវាភាពជាអ្នកមាន ប្រចាំឆ្នាំ២០២២ ត្រូវបានធ្វើឡើងនៅថ្ងៃទី៧ ខែកក្កដា ឆ្នាំ២០២២ ចាប់ពីវេលាម៉ោង៧ព្រឹក រហូតដល់ម៉ោង៧យប់ នៅមជ្ឈមណ្ឌលសហប្រតិបត្តិការកម្ពុជា-កូរ៉េ (CKCC) ដែលមានការចែករំលែកពីវាគ្មិន ជាអគ្គនាយកក្រុមហ៊ុន អគ្គនាយិកា និងឧកញ៉ា ជាច្រើនរូបផងដែរ៕
