ណែនាំឱ្យស្គាល់សិប្បកម្មកែច្នៃសាច់គ្រំ ចំពុះទានិងបង្គារក្រៀមមួយកន្លែង ដែលមានទីតាំងនៅភូមិពាមក្រសោប ឃុំពាមក្រសោប ស្រុកមណ្ឌលសីមា ខេត្តកោះកុង។ សហគ្រិនដ៏ចំណានពោរពេញដោយបទពិសោធនេះគឺលោក វង្ស តារា ម្ចាស់សហគ្រាស សាច់គ្រំចំពុះទានៅភូមិពាមក្រសោប ខេត្តកោះកុង។
ផ្ដល់បទសម្ភាសន៍ជាមួយឧកញ៉ាញូស៍ម្ចាស់សហគ្រាសសាច់គ្រំចំពុះទា លោក វង្ស តារា បានឲ្យដឹងថា លោកចាប់ផ្ដើមចិញ្ចឹមគ្រំចំពុះទាជាលក្ខណៈគ្រួសារមានរយៈពេល ២៧ឆ្នាំហើយ។ ថ្មីៗនេះលោកបានចាប់ផ្ដើមបើកជាសហគ្រាសផលិតនិងកែច្នៃសាច់គ្រំ ចំពុះទាជាលក្ខណៈស្ដង់ដារ ដើម្បីនាំចេញទៅក្រៅប្រទេស។
សាច់គ្រំចំពុះទារបស់លោក វង្ស ដារា៉ បាននាំចេញទៅលក់នៅក្រៅប្រទេសជាង ៨០% ក្នុងនោះមានទៅប្រទេសថៃ និងប្រទេសវៀតណាម។
ក្នុងដំណើរការកែច្នៃសាច់គ្រំដើម្បីនាំចេញ សិប្បកម្មរបស់លោកមានលក់ទាំងមូល លក់បកសំបកមួយចំហៀង និងលក់សាច់សុទ្ធ។ គ្រំចំពុះទាត្រូវចំណាយពេលចិញ្ចឹម ១០ខែទៅ១២ខែ ទើបអាចប្រមូលផលយកមកលក់នៅលើទីផ្សារបាន។
សហគ្រិនវ័យ ៥៧ ឆ្នាំ បានបញ្ជាក់ថា ក្នុងការលក់ទាំងមូលគឺនៅពេលប្រមូលគ្រំពីក្នុងទឹក ត្រូវយកមកលាងដុស កាត់ព្រុយឱ្យស្អាតកុំឱ្យជាប់ខ្យងច្រើនដែលលាយឡំមកជាមួយ។ ក្នុងការយកទៅលក់ទៀតសោតតម្រូវតាមទីផ្សារ គឺមានវេចខ្ចប់ពី ១ គីឡូក្រាម ទៅ ៥ គីឡូក្រាម ដែលអាចលក់បានក្នុងតម្លៃ១គីឡូ ៧០០០រៀល។
ការលក់ពុះសំបកមួយចំហៀងវិញ ការលក់បែបនេះតម្រូវលាងទឹកឱ្យស្អាតរួចចាប់ផ្ដើមពុះសំបកមួយចំហៀងចេញ ហើយរៀបចំវេចខ្ចប់ទៅតាមតម្រូវការទីផ្សារ មានដូចជា កន្លះគីឡូក្រាមនិង ១គីឡូក្រាម ដើម្បីងាយស្រួលដាក់កេះបញ្ជូនមកឱ្យអតិថិជន។ គ្រំលក់ក្នុងប្រភេទនេះមានតម្លៃ ២០០០០រៀលក្នុង១គីឡូក្រាម។
ចំណែកការលក់ជាសាច់សុទ្ធ មុននឹងអាចយកទៅលក់បានត្រូវលាងសម្អាតឱ្យស្អាត រួចដាក់ស្ងោរឱ្យឆ្អិន បន្ទាប់មកទៀតពុះសំបកចេញ យកសាច់ដែលពុះបានទៅលាងទឹកពីរឬបីដងទៀតឱ្យស្អាត។ សាច់គ្រំសុទ្ធនេះវេចខ្ចប់លក់ក្នុងទម្ងន់កន្លះគីឡូកា្រម ព្រោះងាយស្រួលក្លាសេឱ្យត្រជាក់សព្វសាច់ ហើយដែលអាចលក់បានតម្លៃ ៤០០០០រៀលក្នុងមួយគីឡូក្រាម។
បើតាមលោក វង្ស តារា សាច់គ្រំចំពុះទា គេអាចយកទៅច្នៃធ្វើជាម្ហូបបានច្រើនយ៉ាងដូចជា ស្ងោរស៊ុប ស្លរម្ជូរគ្រឿង ដាក់ជាមួយភីហ្សា ញាំ ឆាក្ដៅជាដើម។
ការចិញ្ចឹមសាច់គ្រំចំពុះទានេះ លោក វង្ស តារា ក៏បានលើកពីកត្តាប្រឈមខ្លះដែរគឺពេលចិញ្ចឹមបានមិនសូវមានទីផ្សារ។ មួយវិញទៀតកត្តាធម្មជាតិ នៅពេលដែលមានទឹកជំនន់ជន់មកម្ដងៗ បាននាំយកទឹកសាបមកជាហេតុធ្វើឱ្យគ្រំចំពុះទាងាប់ព្រោះមិនអាចរស់ក្នុងសាបបាន។
គួរបញ្ជាក់ថា សិប្បកម្មសាច់គ្រំ ចំពុះទារបស់វង្ស តារា ថ្មីៗនេះបានទទួលកញ្ចប់វិនិយោគមកពី UNIDO ដើម្បីគាំទ្រដំណើរការផលិតកម្ម ដើម្បីឈានទៅប្រកួតប្រជែង និងឆ្លើយតបបានតាមស្តង់ដាទីផ្សារនាំចេញ៕
