កាលពីថ្ងៃសុក្រទី ២៩ កក្កដាកន្លងទៅ មហាសេដ្ឋី Jeff Bezos បានឆ្លៀតកើបលុយប្រមាណ ១៣ ពាន់លានដុល្លារមុនបិទបញ្ជីខែកក្កដា ដោយសារតម្លៃហ៊ុនរបស់ Amazon បានហក់ឡើងខ្លាំងនាពេលនោះ។
ការកើនឡើងនៃទ្រព្យសម្បត្តរបស់ Jeff Bezos នេះគឺបានធ្វើឲ្យលោកខិតកាន់តែកៀក ជាមួយនឹងការដណ្ដើមតំណែងជាមហាសេដ្ឋីមានបំផុតទី ២ លើលោក ពីមហាសេដ្ឋីមានបំផុតនៅអឺរ៉ុប Bernard Arnault។ នេះបើតាមការចុះផ្សាយ Nairametrics។
ប្រភពដដែលនោះបន្ថែមទៀតថា ទិន្នន័យលក់រយៈពេល ៣ ខែចុងក្រោយដែលគិតត្រឹមខែមិថុនា បានកើនឡើង ៧% ដល់ ១២១,២៣ ពាន់លានដុល្លារ ដែលលើសពីការរំពឹងទុកពី Wall Street ដែលធ្លាប់សន្និដ្ឋានថា អាចឈានដល់ ១១៩,០៩ ពាន់លានដុល្លារ។
សូមជម្រាបដែរថា គិតត្រឹមបើកទំព័រខែសីហានេះ Jeff Bezos មានទ្រព្យសម្បត្តិប្រមាណ ១៦០ ពាន់លានដុល្លារ ឈរនៅតំណែងលេខ ៣ ងារជាមហាសេដ្ឋីមានបំផុតលើលោក ខណៈ Bernard Arnault មានទ្រព្យសម្បត្តិ ១៦៨ ពាន់លានដុល្លារឈរនៅលេខ ២ ស្របពេល Elon Musk មាន ២៧១ ពាន់លានដុល្លារឈរនៅកំពូលតារាង៕
