ឧកញ៉ា សុខ ពិសិដ្ឋ សហស្ថាបនិក និងនាយកប្រតិបត្តិនៃក្រុមហ៊ុន ជីហ្គៀ គ្រុប (Ggear Group) បានដាក់ចេញនូវយុទ្ធសាស្ត្រថ្មីមួយ ធ្វើឱ្យក្រុមហ៊ុនរបស់លោក មិនត្រឹមតែមិនរងផលប៉ះពាល់ដោយសារវិបត្តិកូវីដ-១៩ រយៈពេលជាង ២ឆ្នាំមកនេះនោះទេ ថែមទាំងជោគជ័យមួយកម្រិតថែមទៀតផង។
ក្នុងកម្មវិធីជួបជុំដែលមានការចូលរួមយ៉ាងច្រើនកុះករពីថ្នាក់ដឹកនាំ ក្រុមប្រឹក្សាភិបាល បុគ្គលិក និងដៃគូអាជីវកម្ម របស់ក្រុមហ៊ុន ជីហ្គៀ គ្រុប ជិត ១ពាន់នាក់នាល្ងាចថ្ងៃទី ១៦ ខែកក្កដា ឆ្នាំ២០២២ កន្លងទៅនេះ ដែលប្រព្រឹត្តទៅ នៅសណ្ឋាគារសុខាភ្នំពេញ ឧកញ៉ា សុខ ពិសិដ្ឋ បានដាក់ចេញនូវយុទ្ធសាស្ត្រពង្រឹងកំលាំងស្មារតីនិយោជកក្រុមហ៊ុន ជីហ្គៀ គ្រុបដើម្បីភាពជោគជ័យគឺ “The Power of Re”។
លោកឧកញ៉ា សុខ ពិសិដ្ឋ បានថ្លែងនៅក្នុងកម្មវិធីទៅកាន់បុគ្គលិក ក្រុមហ៊ុន ជីហ្គៀ គ្រុបថាអំឡុងពេលវិបត្តិកូវីដ-១៩ ជាង២ឆ្នាំកន្លងមកនេះ បានធ្វើអោយ ក្រុមហ៊ុនទទួលបានបទពិសោធន៍ថ្មីពោលគឺជួបទាំងបញ្ហាប្រឈម ដែលមិនធ្លាប់បានជួបពីមុនមក និងទទួលបានភាពរីកចម្រើនទន្ទឹមនឹងគ្នានោះផងដែរ។ លោកបានបន្ថែមថា ជាក់ស្តែង កាលពីឆ្នាំ២០១៩ បុគ្គលិករបស់ក្រុមហ៊ុនជីហ្គៀគ្រុបមានប្រមាណជាង ៦០០នាក់ប៉ុណ្ណោះ ប៉ុន្តែបច្ចុប្បន្នចំនួនបុគ្គលិក បានកើនឡើងរហូតដល់ជាង ៨០០នាក់។
ដើម្បីឆ្លើយតបទៅនឹងបញ្ហាប្រឈមចំពោះមុខ និងជំរុញឱ្យនិយោជកបង្កើនផលិតភាពក្នុងការបំពេញការងារលោកឧកញ៉ាសុខ ពិសិដ្ឋ បានប្រើប្រាស់ The Power of RE ដើម្បីជាការលើកទឹកចិត្តចំពោះបុគ្គលិកធ្វើការពោរពេញដោយភាពជឿជាក់ និងទំនួលខុសត្រូវដូចខាងក្រោម៖
១. Re-focus៖ ការផ្តោតសំខាន់ទៅលើចក្ខុវិស័យ និងបេសកកម្មរបស់ក្រុមហ៊ុន ហើយដឹកនាំខ្លួនឯងទៅកាន់គោលដៅមួយ ដោយការខិតខំប្រឹងប្រែង។
២. Re-charge៖ ស្វែងរកហេតុផល និងកត្តាលើកទឹកចិត្តថ្មីមួយទៀត ដើម្បីឱ្យមានឥទ្ធិពលជំរុញខ្លួនឯងនិងបន្តគោលដៅទៅមុខទៀត។
៣. Re-engage៖ រួបរួមគ្នាពង្រឹងប្រាស្រ័យទាក់ទង សម្ព័ន្ធភាព និងត្រឡប់មកធ្វើការជុំគ្នាផ្ទាល់វិញ ដើម្បីពង្រឹងការទំនាក់ទំនង និងអនុវត្តការងារក្រុម។
៤. Re-novate៖ ត្រូវតែស្វែងយល់ពីបច្ចេកវិទ្យាដែលបង្កើតឡើងថ្មីៗ ព្រមទាំងទទួលយកការផ្លាស់ប្ដូរ ត្រូវចេះបត់បែនតាមស្ថានភាពការងារ និងបរិស្ថានបែបថ្មីផ្សេងៗទៀត ដើម្បីឲ្យការងារពោរពេញទៅដោយភាពឆ្នៃប្រឌិត។
លោកឧកញ៉ា សុខ ពិសិដ្ឋ ក៏បានឱ្យដឹងតាមរយៈទំព័រហ្វេសប៊ុក កាលពីថ្ងៃអង្គារម្សិលមិញផងដែរថា ក្រុមហ៊ុន ជីហ្គៀ គ្រុប បានបង្កើតឡើងជាង ១០ឆ្នាំ ហើយប្អូនៗអាចមើលឃើញថារាល់ការរៀបចំរចនាសម្ព័ន្ធការងារ ការវិនិយោគទៅលើហេដ្ឋារចនាសម្ព័ន្ធទាំងជំនាញទន់ និងជំនាញរឹងទាំងឡាយ ដូចជាការបណ្ដុះបណ្ដាលធនធានមនុស្ស ការរៀបចំ សាខាក្រុមហ៊ុនទាំងខេត្ត ក្រុងទាំងអស់ រួមទាំងការបំពេញកាតព្វកិច្ចច្បាប់អោយបានពេញលេញ គឺសំរាប់ត្រៀមការវិនិយោគរយៈពេលវែង និងផ្ដល់ឱកាសអោយយុវជនជំនាន់ក្រោយអាចបញ្ចេញស្នាដៃរបស់ពួកគេដោយមោទនភាព និងភាពជឿជាក់។
ក្រុមហ៊ុនជីហ្គៀគ្រុប គឺជាដៃគូផ្ដាច់មុខនៃជណ្ដើរយន្ត Hyundai Elevator ប្រព័ន្ធចំណតរថយន្ត AJ ហើយក៏ជាអ្នកផ្គត់ផ្គង់ធំបំផុតនូវផលិតផលអេឡិចត្រូនិច LG នៅប្រទេសកម្ពុជា ដែលបានបង្កើតឡើងនៅក្នុងឆ្នាំ ២០១១ ។ ក្រុមហ៊ុនផ្ដល់ជូននូវឧបករណ៍អេឡិចត្រូនិចគ្រប់សណ្ឋានចាប់តាំងពី ឧបករណ៍កម្សាន្ត និងឧបករណ៍ប្រើប្រាស់នៅក្នុងផ្ទះ ដូចជាម៉ាស៊ីនត្រជាក់គ្រប់ប្រភេទជាដើម។ បច្ចុប្បន្នក្រុមហ៊ុនមាន ១៧ សាខានៅក្នុងប្រទេសកម្ពុជាដូចជា៖ ១.សាខាព្រះមុនីវង្ស ២.សែនសុខ ៣.ផ្សារដើមគោរ ៤.ស្ទឹងមានជ័យ ៥.ទួលគោក ៦.ក្រុងតាខ្មៅ ៧.ខេត្តសៀមរាប ៨.ខេត្តបាត់ដំបង ៩.ខេត្តកំពង់ចាម ១០.ក្រុងព្រះសីហនុ ១១.ខេត្តកំពត ១២.ខេត្តកំពង់ធំ ១៣.ខេត្តកំពង់ស្ពឺ ១៤.ខេត្តតាកែវ ១៥.ខេត្តស្ទឹងត្រែង ១៦.ខេត្តស្វាយរៀង និង ១៧.ក្រុងសួង៕
