ប្រធានាធិបតីហ្វីលីពីន ស្នើឲ្យរោងចក្រក្នុងស្រុកកាត់បន្ថយតម្លៃស្ករសជិតពាក់កណ្ដាល

អន្តរជាតិ

នៅថ្ងៃពុធ ទី ១៧ សីហា ២០២២នេះ ប្រធានាធិបតីហ្វីលីពីន Ferdinand Marcos Jr បាន​ជួប​ចរចា​ជាមួយ​និង​រោងចក្រ​ស្ករស​ក្នុង​ស្រុក ដើម្បី​ស្នើ​ឲ្យ​ពួកគេ​កាត់បន្ថយ​តម្លៃទំនិញ​ប្រមាណ ៤០% ដើម្បី​សម្រួល​ដល់​ការប្រើប្រាស់​របស់​ប្រជាពលរដ្ឋ។ នេះ​បើតាម​ការ​ចុះផ្សាយ​ពី​ CNA។

សូមចុច Subscribe Channel Telegram Oknha news គ្រប់សកម្មភាពឧកញ៉ា សេដ្ឋកិច្ច ពាណិជ្ជកម្ម និងសហគ្រិនភាព

ប្រភពដដែល​បាន​បន្ថែម​ថា ទីផ្សារ​ស្ករស​ក្នុង​ប្រទេស​ហ្វីលីពីន​គឺ​កំពុង​ឡើង​ថ្លៃ​ខ្លាំង ពោល​តម្លៃ​របស់​វា​កើនឡើង​ស្ទើរ​ទ្វេដង​នៅ​ឆ្នាំ​នេះ ដោយ​ចន្លោះពី ១០០ ​ទៅ ១១៥ ប៉េសូ​/គក (ប្រមាណ ១,៧៩-២,០៦ ដុល្លារ)។

“​ពួកយើង​កំពុង​ចរចា​ជាមួយ​ក្រុម​ពាណិជ្ជករ ដោយ​ពួកគេ​សុំ​តម្លៃ​ឲ្យ​នៅ​សល់​ប្រហែល ៨០ ប៉េសូ/គក ប៉ុន្តែ​ខ្ញុំ​ស្នើ​ឲ្យ​ចុះ​ត្រឹម ៧០ ប៉េសូ/គក ហើយ​ពេលនេះ​ពួកយើង​កៀក​នឹង​សម្រេច​ជោគជ័យ​ហើយ”។ នេះ​បើតាម​សម្ដី​របស់​លោក Marcos បាន​ប្រាប់​ទៅ​កាន់​សារព័ត៌មាន។

សូមជម្រាប​ដែរ​ថា ថ្នាក់ដឹកនាំ​ខាងលើ​បាន​ទម្លាយ​ឲ្យ​ដឹង​ថា ហ្វីលីពីន​នឹងអាច​នាំចូល​ស្ករស​ប្រហែល ១៥០ ០០០ តោន​នៅ​ឆ្នាំ​នេះ ដើម្បី​បំពេញ​តម្រូវការ​ប្រើប្រាស់​ក្នុង​ស្រុក ក៏ដូចជា​សម្រួល​ដល់​តម្លៃ​ផង​ដែរ ខណៈ​ស្ករស​ដែល​នាំចូល​មក​ភាគច្រើន​គឺ ពី​ប្រទេស​ថៃ៕