ទ្វីបអាស៊ី ប្រមូលផ្ដុំមហាសេដ្ឋីច្រើនបំផុតលើលោក

អន្តរជាតិ

បើនិយាយពីប្រទេស​ដែល​មាន​មហាសេដ្ឋី​រស់នៅច្រើន​បំផុត​លើលោក​គឺ សហរដ្ឋអាមេរិក​ដែល​មាន​មហាសេដ្ឋី​រស់នៅប្រមាណ​ជាង ៧០០ នាក់ ប៉ុន្តែ​បើ​សរុប​ស្ថិតិ​ប្រចាំ​ទ្វីបវិញ ទោះ​បូក​ចំនួន​មហាសេដ្ឋី​នៅ​អាមេរិក​ខាងជើង និង​អាមេរិកឡាទីន ក៏​មិនអាច​ស៊ី​ដាច់​ទ្វីបអាស៊ី​ដែរ។

សូមចុច Subscribe Channel Telegram Oknha news គ្រប់សកម្មភាពឧកញ៉ា សេដ្ឋកិច្ច ពាណិជ្ជកម្ម និងសហគ្រិនភាព

យោងតាម​ទិន្នន័យ​ផ្ដល់​ឲ្យ​ដោយ Nikkei Asia បាន​បង្ហាញ​ថា ទ្វីបអាស៊ី​គឺ​ជា​តំបន់​ដែល​ប្រមូល​ផ្ដុំ​មហាសេដ្ឋី​ច្រើន​បំផុតលើលោក ពោល​គិត​ត្រឹម​ចុងខែកញ្ញា​មាន​មហាសេដ្ឋី​ប្រមាណ ៩៥១ នាក់​កំពុង​រស់នៅ​ក្នុង​ទ្វីបអាស៊ី។

ក្នុងនោះ​ចិន និង​ឥណ្ឌា​សំបូរ​មហាសេដ្ឋី​ច្រើន​ជាងគេ ពោល​ចិន​មាន​ប្រមាណ ៤៤០ នាក់ ខណៈ​ឥណ្ឌា​មាន ១៦១ នាក់។ ចំណែក​ឯ​មហាសេដ្ឋីនៅ​តំបន់​អាស៊ីអាគ្នេយ៍​វិញ​មាន​សរុប ១១៤ នាក់ ​តៃវ៉ាន់​មាន ៤៥ នាក់ កូរ៉េខាងត្បូង​មាន ២៨ នាក់ និង​ជប៉ុន​មាន ២៧ នាក់។

បើទោះ​ជា​ចំនួន​មហាសេដ្ឋី​រស់នៅ​ទ្វីបអាស៊ី​មាន​ច្រើនជាង​គេ​លើលោក​ក្ដី ប៉ុន្តែ​បើ​ប្រៀបធៀប​ទំហំ​ទ្រព្យសម្បត្តិ​វិញ គឺ​នៅ​ចាញ់​អាមេរិក​ខាងជើង​ច្រើនសន្ធឹក ពោល​សរុប​ទ្រព្យសម្បត្តិ​មហាសេដ្ឋី​ជាង ៧០០ នាក់​នៅ​អាមេរិក​ខាងជើង​មាន​ជិត ៥ ទ្រីលាន​ដុល្លារ ប៉ុន្តែ​នៅ​អាស៊ី​មាន​តែ​ជាងពាក់កណ្ដាល ៣ ទ្រីលាន​ដុល្លារ​ប៉ុណ្ណោះ៕