កាលពីថ្ងៃពុធកន្លងទៅ ប្រធានាធិបតីហ្វីលីពីនលោក Ferdinand Marcos Jr បានទម្លាយឲ្យដឹងថា ប្រទេសរបស់លោក ប្រហែលជាត្រូវងាកទៅចរចាទិញប្រេងពីរុស្ស៊ី ដើម្បីបំពេញតម្រូវការក្នុងស្រុក ដ្បិតតម្លៃប្រេងទូទាំងសកលលោកកំពុងឡើងថ្លៃ។
ក្រៅពីប្រេង ហ្វីលីពីនក៏ទំនងនឹងចរចានាំចូលជីពីខាងរុស្ស៊ីបន្ថែមផងដែរ។ នេះបើតាមសម្ដីរបស់លោក Marcos បាននិយាយទៅកាន់ Manila Overseas Press Club។
“ពួកយើងនឹងពិចារណាឲ្យបានដិតដល់ពីចំនុចមួយនេះ ហើយយើងក៏ប្រហែលជាត្រូវនិយាយជាមួយរុស្ស៊ីពីការនាំចូលប្រេង និងនាំចូលជីផងដែរ”។
គួររំលឹកដែរថា ហ្វីលីពីនក៏ដូចជាប្រទេសដទៃទៀតដែលកំពុងឈឺក្បាលនឹងការប្រឈមជាមួយវិបត្តិអតិផរណា ដ្បិតទំនិញភាគច្រើនមានការរាំងស្ទះដោយសារសង្គ្រាមរវាងរុស្ស៊ី និងអ៊ុយក្រែន។
សូមជម្រាបថា ហ្វីលីពីនគឺជាប្រទេសទី ៣ នៅអាស៊ីអាគ្នេយ៍ដែលបានបង្ហាញពីការចង់ទិញប្រេងពីរុស្ស៊ីដោយបើកចំហរ បន្ទាប់ពីមីយ៉ាន់ម៉ា និងឥណ្ឌូណេស៊ី៕
