ឧកញ៉ាបណ្ឌិត គីម ហ៊ាង បន្តសាងសង់បុរី ចំនួន២ ក្នុងនោះ បុរី ខេអេស រ៉េស៊ីដេន បញ្ចប់ការសាងសង់ ១០០% ជូនអតិថិជន

ជុំវិញ​ឧកញ៉ា

ឧកញ៉ាបណ្ឌិត គីម ហ៊ាង អគ្គនាយកបុរី វិមានសំណាង ​​ហ៊ាន​សាងសង់​បុរី​ធំៗ​ចំនួន​ពីរ ​គឺ​បុរី ខេអេស រ៉េស៊ីដេន (Borey KS Residence)​ ​​និង​បុរី វិមានសំណាង (Borey Vimean Samnang) នៅ​អំឡុង​ពេល​មាន​វិបត្តិ​ជំងឺ​កូវីដ-១៩ ​​ខណៈ​ដែល​​​អ្នក​អភិវឌ្ឍន៍​ភាគ​ច្រើន បាន​សម្រេច​ចិត្ត​ផ្អាក ឬ​ពន្យាពេល​គម្រោង​របស់​ខ្លួន។

សូមចុច Subscribe Channel Telegram Oknha news គ្រប់សកម្មភាពឧកញ៉ា សេដ្ឋកិច្ច ពាណិជ្ជកម្ម និងសហគ្រិនភាព

លោកឧកញ៉ា គីម ហ៊ាង ​​​​បាន​មាន​ប្រសាសន៍​កាល​ពី​ពេល​ថ្មីៗ​នេះ​ថា នៅ​ក្នុង​​ពេល​មាន​វិបត្តិ លោក​​​បាន​មើល​ឃើញ​ឱកាស ​​ដែល​អាច​បាន​ផល​ចំណេញ​ច្រើន ​​​ដោយសារ​​តែ​​សម្ភារៈ​សំណង់​ចុះ​ថ្លៃ និងតម្លៃ​ពលកម្ម​ថោក ជា​ដើម។

លោក​ឧកញ៉ា ​​បាន​បញ្ជាក់​បន្ថែម​ថា៖ “នៅពេលមានវិបត្តិ ហើយយើងនៅតែ​សាងសង់ នៅតែវិនិយោគ វា​នឹងបញ្ជាក់ថា អ្នកណាខ្លាំងពិតប្រាកដ។ ដូច្នេះទើបខ្ញុំចាប់ឱកាសក្នុងវិបត្តិ និងមិនសូវចាប់ឱកាសនៅពេល​ដែលគ្រប់គ្នា មើលឃើញជាឱកាសនោះទេ ព្រោះពេលនោះ ជាពេលដែលមានផលចំណេញតិច។ នៅពេល​ទាំងអស់គ្នាពិបាកលក់ ខ្ញុំនៅតែលក់បានជាហូរហែរ បើទោះជាបុរីភាគច្រើនលក់មិនបានច្រើនក្តី។ យើង​សាងសង់ដោយផ្តោតលើគុណតម្លៃ និងផ្តល់នូវគុណតម្លៃដល់អតិថិជន ព្រោះយើងបានបំពេញតាម​លក្ខខណ្ឌ​អាកាសធាតុ ធម្មជាតិ និងបែបផែននៃ​ការរស់នៅសម័យថ្មីដល់អតិថិជន”។

គួរ​បញ្ជាក់​ថា បុរីទី១ ខេអេស រ៉េស៊ីដេន ​​​របស់​ឧកញ៉ា គីម ហ៊ាង មាន​ទីតាំង​នៅ​ស្រុកកៀន​ស្វាយ ខេត្ត​កណ្តាល។ បុរីនេះ ផ្តោតសំខាន់លើការអភិវឌ្ឍលំនៅដ្ឋានប្រភេទផ្ទះលីងវីឡា (Link Villa) និងវីឡា​កូនកាត់ ដើម្បីឆ្លើយតបទៅនឹងតម្រូវការទីផ្សារ ដែលមានការកើនឡើងកាន់តែខ្លាំង សម្រាប់​លំនៅដ្ឋាន​ប្រភេទនេះ។

គម្រោងបុរីដ៏ស្រស់ស្អាតនេះ មានលំនៅដ្ឋានសរុបចំនួនជាង ២០០ យូនីត ដែល​អភិវឌ្ឍ​​លើផ្ទៃដី​ទំហំ ៣៤,០៩៧ ម៉ែត្រការ៉េ ហើយផ្ទះទាំងជាង ២០០នោះ បានបញ្ចប់ការសាងសង់ ១០០%។ អតិថិជន ដែលទិញផ្ទះក្នុងគម្រោងបុរី KS Residence នឹងទទួលសោរចូលរស់នៅតែម្ដង។

ចំណែក​ឯ​បុរី​ទី​២ គឺ​បុរី វិមានសំណាង ​​​ស្ថិតនៅខាងជើងក្រសួងដែនដី ២៥០០ ម៉ែត្រ សាងសង់លើដី ២៥ហិកតា ជាវីឡាព្រីនបែបក្លាសិក វីឡាឃ្វីន​បែបក្លាសិក និងជាវីឡាឃីងបែបក្លាសិក ឬបែបបារាំង ដែលចំណាយ​ថ្លៃសាងសង់ច្រើនជាង និងប្រណិតជាងការសាងសង់វីឡាបែបទំនើបនានា។ បុរី មានសួន​ច្បារ កន្លែងហាត់​ប្រាណ កន្លែងលេង​កីឡា ផ្លូវធំ ដើមឈើច្រើន និងព្រែកធម្មជាតិ ស្មើជិត ៤០% នៃផ្ទៃដី​សរុប ដែលសាក​សម​បំផុត សម្រាប់​គ្រួសារ​អភិជនកម្ពុជាស្នាក់នៅប្រចាំថ្ងៃ៕