ឧកញ៉ាសំពៅ

មកស្គាល់ពីប្រវត្តិខ្លះៗរបស់សម្តេច Pope Francis បុគ្គលមានឥទ្ធិពលបំផុតលើលោក

ឧកញ៉ាសំពៅ — Mon, 21 Apr 2025 09:05:00 +0000

យោងតាមបុរីវ៉ាទីកង់ បានប្រកាសជាផ្លូវការ នៅថ្ងៃទី២១ ខែមេសា ឆ្នាំ២០២៥នេះថា សម្តេចប៉ាប ហ្វ្រង់ស៊ីស (Pope Francis) បានទទួលមរណភាពហើយ ក្នុងជន្មាយុ ៨៨វស្សា ដោយសារឆ្លងជំងឺរលាកសួតធ្ងន់ធ្ងរ។ នេះបើតាមការចុះផ្សាយពីសារព័ត៌មានធំៗជាច្រើន។

លោកឪ Pope Francis ត្រូវបានចាត់ទុកថាជាបុគ្គលមានឥទ្ធិពលបំផុតមួយរូបលើពិភពលោក ហើយសារព័ត៌មាន Forbes បានចុះផ្សាយកាលពីឆ្នាំ២០១៨ ថា សម្ដេចគឺជា បុគ្គលមានឥទ្ធិពលបំផុតលើលោកទី ៦ ក្នុងចំណោមបុគ្គល ១០ រូប និងមានអ្នកគាំទ្រដល់ទៅ ១,៣ ពាន់លាននាក់ឯណោះ។

តើបុគ្គលដែលមានឥទ្ធិពលដ៏អស្ចារ្យរូបនេះ មានប្រវត្តិយ៉ាងណាខ្លះ?

សម្ដេចប៉ាប ហ្វ្រង់ស៊ីស មានឈ្មោះដើម Jorge Mario Bergoglio កើតនៅថ្ងៃទី១៧ ខែធ្នូ ឆ្នាំ១៩៣៦ នៅទីក្រុង Buenos Aires ប្រទេសអាហ្សង់ទីន និងមានឪពុកម្ដាយជាជនភៀសខ្លួនពីប្រទេសអ៊ីតាលី។

ក្រោយបញ្ចប់ការសិក្សាថ្នាក់វិទ្យាល័យ លោកមានបំណងចង់ក្លាយជាអ្នកជំនាញគីមី និងបានធ្វើការមួយរយៈខ្លី នៅវិស័យចំណីអាហារ ប៉ុន្តែនៅអាយុ ២១ ឆ្នាំ លោកមានជំងឺរលាកសួតធ្ងន់ធ្ងរ ដែលតម្រូវឲ្យលោកត្រូវកាត់សួតផ្នែកខាងស្ដាំចេញ។

នៅឆ្នាំ ១៩៥៨ លោកបានចូលរួមជាមួយក្រុម Jesuit (ក្រុមអ្នកស្រលាញ់ និងកាន់សាសនាយេស៊ូ) និងបានចូលរៀនផ្នែកមនុស្សសាស្ត្រនៅទីក្រុង Santiago ប្រទេសឈីលី និងទទួលបានសញ្ញាប័ណ្ណមានតម្លៃស្នើនឹងថ្នាក់អនុបណ្ឌិតផ្នែកទស្សនវិជ្ជានៅទីក្រុង Buenos Aires។

ក្រោយបញ្ចប់ការសិក្សា លោកក៏បានចូលបង្រៀនផ្នែកអក្សរសិល្ប៍ និងផ្នែកទស្សនវិជ្ជានៅវិទ្យាល័យមួយ រហូតដល់ឆ្នាំ ១៩៦៩ លោកក៏ត្រូវបានតែងតាំងជាអាចារ្យ និងបានចូលស្បថស្បែនៅឆ្នាំ ១៩៧៣ ដោយបានក្លាយជាប្រមុខនៃក្រុមគាំទ្រ Jesuit នៅអាហ្សង់ទីនពីឆ្នាំ ១៩៧៣ ដល់ ១៩៧៩។

លុះដល់អំឡុងទសវត្សឆ្នាំ ១៩៨០ លោក Bergoglio បានបម្រើការជាគ្រូបង្រៀនថ្នាក់សិក្ខាសាលា និងជាសកលវិទ្យាធិការ ក្នុងពេលកំពុងសិក្សាថ្នាក់ទ្រឹស្តីបទនៅអាល្លឺម៉ង់ និងនៅឆ្នាំ ១៩៩២ លោកត្រូវបានតែងតាំងជាជំនួយការអ្នកដឹកនាំសាសនា (Bishop) នៅ Buenos Aires។

កាន់តួនាទីជាជំនួយការបាន ៦ ឆ្នាំ លោកក៏ត្រូវបានតំឡើងតំណែងជាអ្នកដឹកនាំសាសនាជាន់ខ្ពស់ (Archbishop) នៅឆ្នាំ ១៩៩៨។ ក្នុងអំឡុងពេលវិបត្តិសេដ្ឋកិច្ចនៅអាហ្សង់ទីនដែលបានចាប់ផ្ដើមនៅចុងទសវត្សឆ្នាំ ១៩៩០ Bergoglio បានទទួលកេរ្តិ៍ឈ្មោះល្បីរន្ទឺអំពីភាពដាក់ខ្លួនរបស់លោក ដោយរស់នៅបន្ទប់តូចសាមញ្ញ ជាជាងភូមិគ្រឹះរបស់អ្នកដឹកនាំជាន់ខ្ពស់ និងធ្វើដំណើរតាមឡានក្រុងសាធារណៈ ជាជាងជិះឡានទំនើបមានតៃកុងផ្ទាល់ខ្លួន។

ឆ្នាំ ២០១៣ នៅពេលដែលសម្ដេច Pope Benedict XVI បានលាលែងតំណែង ក្រោមហេតុផលវ័យចាស់ជរា និងមានបញ្ហាសុខភាព ហើយលោក Bergoglio បានជ្រើសរើសជាអ្នកស្នងតំណែង ដោយបានសម្រេចយកឈ្មោះ Francis ដើម្បីរំលឹកដល់ St. Francis of Assisi នៃប្រទេសអ៊ីតាលី ដែលមានភាពចែករំលែកទៅកាន់ប្រជាជនក្រីក្រ ក៏ដូចជាឈ្មោះរបស់ St. Francis Xavier ដែលជាសមាជិកស្ថាបនិកក្រុម Jesuits ផងដែរ។

សម្រេច ហ្វ្រង់ស៊ីស បានគ្រប់គ្រងវិហារកាតូលិក Roman Catholics ដែលជាវិហារសាសនាធំបំផុតមួយលើលោក និងមានប្រជាជនប្រមាណ ១/៦ នៃប្រជាជនពិភពលោក ដែលគោរពបូជានៅទីនោះ។

សម្រាប់ការបង្ហាញខ្លួនជាសាធារណៈតំបូង សម្ដេច ហ្វ្រង់ស៊ីស បានអំពាវនាវ និងអធិដ្ឋានសុំឲ្យមានការយកចិត្តទុកដាក់បន្ថែមលើប្រជាជនក្រីក្រ ហើយសម្ដេចក៏បានស្នើឲ្យមានការយកចិត្តទុកដាក់បន្ថែមលើជនរងគ្រោះដែលត្រូវបានរំលោភបំពានផ្លូវភេទ ជាពិសេសគឺស្ត្រី។

តួយ៉ាងនៅចុងឆ្នាំ ២០១៣ អំឡុងពេលធ្វើទស្សនកិច្ចនៅហូឡង់ សម្ដេចហ្វ្រង់ស៊ីស បានជួបជាមួយអ្នកដឹកនាំសាសនានៅទីនោះ និងបានសុំឲ្យពួកគេទាក់ទងទៅកាន់ជនរងគ្រោះពីករណីរំលោភបំពានផ្លូវភេទ ដើម្បីផ្គត់ផ្គង់ជំនួយ។

នៅឆ្នាំ ២០១៥ សម្ដេចហ្វ្រង់ស៊ីស បានធ្វើទស្សនកិច្ចទៅកាន់សហរដ្ឋអាមេរិក និងបានសុំឲ្យមហាសន្និបាតអង្គការសហប្រជាជាតិយកចិត្តទុកដាក់លើការការពារសន្តិសុខពិភពលោក។ នៅឆ្នាំ ២០១៦ លោក និង Kirill I អយ្យកោនៃទីក្រុងមូស្គូ និងរុស្ស៊ីទាំងមូល បានជួបសំណេះសំណាលជាលើកដំបូងក្នុងប្រវត្តិសាស្ត្រ រវាងមេដឹកនាំ Roman Catholic និងវិហារ Orthodox របស់រុស្ស៊ី។

នៅឆ្នាំ ២០១៩ សម្ដេចហ្វ្រង់ស៊ីស បានក្លាយជាសម្ដេចនៃសាសនាកាតូលិកតំបូងដែលបានទស្សនកិច្ចទៅកាន់ Arabian Peninsula ជាកន្លែងកំណើតនៃសាសនាអ៊ីស្លាម ជាមួយគោលបំណងលើកកម្ពស់ភាតរភាពសាសនា និងសន្តិភាព។

សូមជម្រាបដែរថា គិតមកទល់នឹងពេលនេះ សម្ដេចហ្វ្រង់ស៊ីសបានកាន់តួនាទីជាអ្នកដឹកនាំសាសនាកាតូលិកអស់រយៈពេលជិត ១ទសវត្សមកហើយ។

The post មកស្គាល់ពីប្រវត្តិខ្លះៗរបស់សម្តេច Pope Francis បុគ្គលមានឥទ្ធិពលបំផុតលើលោក appeared first on .

Samsung បន្តចាយលុយជិត ២ពាន់លានដុល្លារ វិនិយោគនៅប្រទេសវៀតណាម

ឧកញ៉ាសំពៅ — Mon, 23 Sep 2024 10:01:00 +0000

ក្រុមហ៊ុនអេឡិចត្រូនិកខ្នាតយក្ស Samsung បានប្រកាសពីគម្រោងវិនិយោគ ដែលមានតម្លៃ ១,៨ពាន់លានដុល្លារ នៅក្នុងរោងចក្រមួយកន្លែង នៃភាគខាងជើងប្រទេសវៀតណាម។

យោងតាមការចុះផ្សាយពីសារព័ត៌មាន Reuters បានបង្ហាញថា ការបណ្ដាក់ទុនថ្មីពីក្រុមហ៊ុន Samsung នឹងផ្ដោតសំខាន់លើការផលិតអេក្រង់ OLED សម្រាប់យានយន្ត និងឧបករណ៍បច្ចេកវិទ្យាផ្សេងៗ។

រោងចក្រថ្មីរបស់ក្រុមហ៊ុន Samsung នឹងលេចរូបរាងនៅក្នុងសួនឧស្សាហកម្ម Yen Phong នៅក្នុងខេត្ត Bac Ninh ភាគខាងកើតនៃទីក្រុងហាណូយ និងស្ថិតនៅក្បែររោងចក្រ Samsung មួយដែលមានស្រាប់នៅទីនោះ។

គួររំលឹកដែរថា បច្ចុប្បន្ន Samsung មានរោងចក្រចំនួន ៦កន្លែងនៅក្នុងប្រទេសវៀតណាម និងមានការវិនិយោគសរុបនៅទីនោះ ប្រមាណ ២២,៤ពាន់លានដុល្លារ៕

The post Samsung បន្តចាយលុយជិត ២ពាន់លានដុល្លារ វិនិយោគនៅប្រទេសវៀតណាម appeared first on .

ក្រុមហ៊ុនTSMC គ្រោងចាប់ដៃជាមួយ Samsung សាងសង់រោងចក្របន្ទះឈីបតម្លៃលើសពី ១០០ពាន់លានដុល្លារ

ឧកញ៉ាសំពៅ — Mon, 23 Sep 2024 09:01:00 +0000

ក្រុមហ៊ុនខ្នាតយក្សតៃវ៉ាន់ TSMC និងក្រុមហ៊ុនអេឡិចត្រូនិកធំបំផុតលើលោក Samsung Electronics បានជជែកគ្នា ពីគម្រោងសាងសង់រោងចក្រផលិតបន្ទះឈីបមួយ ដែលមានតម្លៃលើសពី ១០០ពាន់លានដុល្លារ។

យោងតាមការចុះផ្សាយពីសារព័ត៌មាន CNA បានបង្ហាញថា គម្រោងការណ៍ដ៏ធំសម្បើមនេះ មានផែនការសាងសង់នៅប្រទេសអារ៉ាប់រួម ជាមួយគោលបំណងកែប្រែទីនោះ ឲ្យក្លាយជាទីផ្សារបន្ទះឈីបធំបំផុតមួយលើពិភពលោក។

គួររំលឹកដែរថា បើនិយាយពីវិស័យផលិតបន្ទះឈីប ក្រុមហ៊ុនតៃវ៉ាន់ TSMC ឈរនៅលំដាប់លេខរៀងទី២ ជាក្រុមហ៊ុនមានតម្លៃថ្លៃបំផុតលើលោក ជាមួយមូលធនទីផ្សារ ៩០២ពាន់លានដុល្លារ ស្របពេល Samsung ជាប់នៅលេខរៀងទី៥ ជាមួយមូលធនទីផ្សារ ៣១០ពាន់លានដុល្លារ៕

The post ក្រុមហ៊ុនTSMC គ្រោងចាប់ដៃជាមួយ Samsung សាងសង់រោងចក្របន្ទះឈីបតម្លៃលើសពី ១០០ពាន់លានដុល្លារ appeared first on .

ក្រុមហ៊ុនកំពូលអ្នកមានបំផុតនៅវៀតណាម ប្រកាសពីការខាតបង់ជិត ៨០០លានដុល្លារ

ឧកញ៉ាសំពៅ — Mon, 23 Sep 2024 07:02:00 +0000

ក្រុមហ៊ុនរថយន្តអគ្គិសនី VinFast របស់មហាសេដ្ឋីមានបំផុតនៅវៀតណាម លោក Pham Nhat Voung បានប្រកាសពីការខាតបង់ប្រហែល ៧៧០លានដុល្លារ នៅត្រីមាសទី២ បើទោះជាប្រាក់ចំណូលមានការកើនឡើងក្ដី។

យោងតាមការឲ្យដឹងពីគេហទំព័រ Reuters បានបង្ហាញថា ប្រាក់ចំណូលប្រចាំត្រីមាសទី២ របស់ក្រុមហ៊ុន VinFast មានកំណើន ២៧% តែក្រុមហ៊ុនវៀតណាមនេះនៅតែជួបភាពខាតបង់ ដ៏ច្រើនសន្ធឺក។

ការខាតបង់ដ៏ធំរបស់ក្រុមហ៊ុនរថយន្តមួយនេះ គឺបណ្ដាលមកពីការពង្រីកវិសាលភាពក្រុមហ៊ុននៅក្រៅប្រទេស គួបផ្សំការជួសជុលរថយន្តជាច្រើនម៉ឺនគ្រឿង ដែលមានបញ្ហា ក៏ដូចជាការប្ដឹងផ្ដល់កន្លងមកជាដើម។

សូមជម្រាបដែរថា ក្រុមហ៊ុន VinFast គឺជាអ្នកផលិតរថយន្តអគ្គិសនីធំបំផុតនៅវៀតណាម ហើយបច្ចុប្បន្នកំពុងជ្រៀតខ្លួន ចូលប្រជែងលើទីផ្សារអន្តរជាតិ ជាពិសេសគឺនៅសហរដ្ឋអាមេរិក៕

The post ក្រុមហ៊ុនកំពូលអ្នកមានបំផុតនៅវៀតណាម ប្រកាសពីការខាតបង់ជិត ៨០០លានដុល្លារ appeared first on .

GM ប្រមូលរថយន្តចូលឃ្លាំងវិញ ជិតកន្លះលានគ្រឿង ក្រោយមានបញ្ហាបច្ចេកទេស

ឧកញ៉ាសំពៅ — Mon, 23 Sep 2024 06:00:00 +0000

ក្រុមហ៊ុន General Motors កំពុងប្រមែប្រមូលរថយន្តភីកអាប់ ៤៥០ ០០០គ្រឿង ចូលរោងចក្រវិញ នៅសហរដ្ឋអាមេរិក បន្ទាប់ពីរកឃើញនូវបញ្ហាបច្ចេកទេសមួយចំនួន ដែលអាចបង្កជាគ្រោះថ្នាក់ដល់អ្នកបើកបរ។

យោងតាមការចុះផ្សាយពីសារព័ត៌មាន Reuters បានបង្ហាញថា បញ្ហាដែលក្រុមហ៊ុន GM បានរកឃើញ គឺហានិភ័យនៃការលេចធ្លាយប្រេងហ្វ្រាំង និងបញ្ហាចង្កៀងភ្លើងសញ្ញាប្រកាសអាសន្ន។

ចំពោះរថយន្តដែលក្រុមហ៊ុន GM នឹងប្រមែប្រមូលមកវិញនោះ រួមមាន Chevrolet Silverado 1500, GMC Sierra 1500 សេរីឆ្នាំ២០២៣ និងម៉ូដែល Chevrolet Tahoe, Suburban, GMC Yukon, Yukon XL, Cadillac Escalade និង Escalade ESV សេរីឆ្នាំ២០២៣ ដល់ឆ្នាំ២០២៤។

ក្រុមហ៊ុន GM បានអះអាងថា ដោយសារតែការរកឃើញនូវបញ្ហាបច្ចេកទេសទាំងនេះទាន់ពេលវេលា ទើបមកទល់ពេលនេះមិនមានករណីគ្រោះថ្នាក់ណាមួយកើតឡើងនោះឡើយ៕

The post GM ប្រមូលរថយន្តចូលឃ្លាំងវិញ ជិតកន្លះលានគ្រឿង ក្រោយមានបញ្ហាបច្ចេកទេស appeared first on .

ក្រុមហ៊ុន Meta បិទគណនីបណ្ដាញសង្គម របស់បណ្ដាញសារព័ត៌មានរុស្ស៊ីទាំងអស់

ឧកញ៉ាសំពៅ — Mon, 23 Sep 2024 03:25:54 +0000

ក្រុមហ៊ុន Meta បានប្រកាសថា រាល់គណនីបណ្ដាញសង្គម Facebook និង Instagram របស់បណ្ដាញសារព័ត៌មាន គ្រប់គ្រងដោយរដ្ឋាភិបាលរុស្ស៊ី នឹងត្រូវបានបិទ ក្រោយអះអាងថា ក្រុមហ៊ុនទាំងនេះបានប្រើល្បិចកល ធ្វើប្រតិបត្តិការខុសច្បាប់លើផ្លេតហ្វមរបស់ខ្លួន។

យោងតាមការចុះផ្សាយពីសារព័ត៌មាន BBC បានឲ្យដឹងថា សេចក្ដីប្រកាសរបស់ក្រុមហ៊ុន Meta បានបង្ហាញឲ្យឃើញ នូវការរារាំងប្រព័ន្ធផ្សព្វផ្សាយរបស់រុស្ស៊ី ទៅកាន់លោកខាងលិច និងពិភពលោក។

បច្ចុប្បន្ន បណ្ដាញសារព័ត៌មាន ដែលគ្រប់គ្រងដោយរដ្ឋាភិបាលរុស្ស៊ីរួមមាន Rossiya Segodnya និង RT ជាដើម សុទ្ធតែត្រូវបានបិទគណនីលើបណ្ដាញសង្គម Facebook, Instagram, Whatsapp និង Threads ដែលស្ថិតក្រោមការគ្រប់គ្រងពីក្រុមហ៊ុនមេ Meta Platforms៕

The post ក្រុមហ៊ុន Meta បិទគណនីបណ្ដាញសង្គម របស់បណ្ដាញសារព័ត៌មានរុស្ស៊ីទាំងអស់ appeared first on .

Coca-Cola ត្រៀមចាយលុយ ១ពាន់លានដុល្លារ វិនិយោគនៅប្រទេសនីហ្សេរីយ៉ា

ឧកញ៉ាសំពៅ — Fri, 20 Sep 2024 08:00:00 +0000

ក្រុមហ៊ុនភេសជ្ជៈកំពូល Coca-Cola មានគម្រោងចាយលុយ ១ពាន់លានដុល្លារ នៅក្នុងការសាងសង់រោងចក្រនៅប្រទេសនីហ្សេរីយ៉ា ក្នុងរយៈពេល ៥ឆ្នាំខាងមុខ។ នេះបើតាមការចុះផ្សាយពីសារព័ត៌មាន Reuters។

គម្រោងការណ៍មួយនេះ ត្រូវបានបង្ហើបឲ្យដឹងជាសាធារណៈ ក្នុងជំនួបរវាងប្រធានាធិបតីនីហ្សេរីយ៉ា Bola Tinubu និងលោក John Murphy ប្រធានផ្នែកហិរញ្ញវត្ថុ នៃក្រុមហ៊ុន Coca-Cola កាលពីពេលថ្មីៗនេះ។

គួររំលឹកបន្តិចថា ចាប់តាំងពីឆ្នាំ២០១៣ ក្រុមហ៊ុន Coca-Cola បានចាយលុយប្រហែល ១,៥ពាន់លានដុល្លារ បន្តការបណ្ដាក់ទុននៅប្រទេសនីហ្សេរីយ៉ា ក្នុងការពង្រីកសង្វាក់ផលិតកម្ម និងហ្វឹកហ្វឺនបុគ្គលិកនៅទីនោះ។

សូមជម្រាបដែរថា ប៉ុន្មានឆ្នាំចុងក្រោយនេះ រដ្ឋាភិបាលនីហ្សេរីយ៉ា កំពុងព្យាយាមអូសទាញក្រុមហ៊ុនធំៗ មកបណ្ដាក់ទុនក្នុងប្រទេសខ្លួន តាមរយៈការផ្ដល់អត្ថប្រយោជន៍ជាច្រើន៕

The post Coca-Cola ត្រៀមចាយលុយ ១ពាន់លានដុល្លារ វិនិយោគនៅប្រទេសនីហ្សេរីយ៉ា appeared first on .

ស្វាមីកំពូលសេដ្ឋីនីនៅរុស្ស៊ី ត្រូវបានឃាត់ខ្លួនពីការចោទប្រកាន់បទឃាតកម្ម

ឧកញ៉ាសំពៅ — Fri, 20 Sep 2024 06:04:00 +0000

កាលពីពេលថ្មីៗនេះ លោក Vladislav Bakalchuk ស្វាមីរបស់ស្ត្រីមានបំផុតនៅរុស្ស៊ី អ្នកស្រីTatyana Bakalchuk ត្រូវបានក្រុមប៉ូលិសចាប់ខ្លួន និងចោទប្រកាន់ពីបទឃាតកម្ម ក្រោយកើតមានហេតុការណ៍បាញ់រះនៅទីក្រុងមូស្គូ។

យោងតាមការចុះផ្សាយពីគេហទំព័រ Reuters បានបង្ហាញថា យ៉ាងហោចណាស់មនុស្ស ២នាក់ បានបាត់បង់ជីវិតក្នុងហេតុការណ៍មួយនោះ ខណៈមនុស្ស ៧នាក់ទៀតរងរបួសធ្ងន់។

លោក Vladislav បានអះអាងថា នៅក្នុងហេតុការណ៍បាញ់រះក្នុងការិយាល័យរបស់លោក គឺកើតឡើងដោយសារបុគ្គលិកម្នាក់ ជាអ្នកបង្កហេតុ ដោយរូបលោកគឺកំពុងត្រៀមខ្លួនចូលប្រជុំប៉ុណ្ណោះ។

ទន្ទឹមនឹងនោះ មេធាវីរបស់លោក Vladislav ក៏បានលើកឡើងដែរថា ការចោទប្រកាន់កូនក្ដីរបស់លោក ពីបទឃាតកម្ម គឺជាការចោទប្រកាន់គ្មានក្បាលគ្មានកន្ទុយ ពោលកូនក្ដីរបស់លោក គឺជាជនរងគ្រោះតែប៉ុណ្ណោះ៕

The post ស្វាមីកំពូលសេដ្ឋីនីនៅរុស្ស៊ី ត្រូវបានឃាត់ខ្លួនពីការចោទប្រកាន់បទឃាតកម្ម appeared first on .

ក្រុមហ៊ុនលក់រាយខ្នាតយក្ស Target ចាត់តាំងថ្នាក់ដឹកនាំក្រុមហ៊ុន Pepsi ម្នាក់ ជាប្រធានផ្នែកហិរញ្ញវត្ថុ

ឧកញ៉ាសំពៅ — Fri, 20 Sep 2024 05:00:00 +0000

ក្រុមហ៊ុនលក់រាយខ្នាតយក្សនៅអាមេរិក Target បានប្រកាសកាលពីថ្ងៃទី១៩ ខែកញ្ញាថា ពួកគេនឹងចាត់តាំងលោក Jim Lee ថ្នាក់ដឹកនាំប្រចាំនៅក្រុមហ៊ុន PepsiCo មកកាន់តួនាទីជាប្រធានផ្នែកហិរញ្ញវត្ថុ ចាប់ពីថ្ងៃទី២២ ខែកញ្ញាតទៅ។

យោងតាមការចុះផ្សាយពីសារព័ត៌មាន Reuters បានបង្ហាញថា ក្រុមហ៊ុន Target សម្រេចចិត្តតែងតាំងលោក Lee មកកាន់តួនាទីជាក្បាលម៉ាស៊ីនក្រុមហ៊ុនបែបនេះ គឺដោយសារមើលឃើញពីបទពិសោធន៍ ជាង ២៥ឆ្នាំ នៅលើវិស័យហិរញ្ញវត្ថុ យុទ្ធសាស្ត្រ និងធុរកិច្ចរបស់គាត់។

ចំពោះកាតព្វកិច្ចនៅកន្លែងថ្មីវិញ លោក Lee នឹងមើលការខុសត្រូវទាំងស្រុង លើការរៀបចំ និងវិភាគកញ្ចប់ហិរញ្ញវត្ថុ ដែលត្រូវចំណាយ សវនកម្មផ្ទៃក្នុង និងការអភិវឌ្ឍន៍សាជីវកម្មជាដើម។

គួររំលឹកបន្តិចថា ការតែងតាំងប្រធានផ្នែកហិរញ្ញវត្ថុថ្មីនៅ Target ធ្វើឡើងក្រោយក្រុមហ៊ុននេះ ជួបប្រទះការលក់ទាបមិនធ្លាប់មាន ខណៈបច្ចុប្បន្នផ្សារលក់រាយធំបំផុតមួយនៅអាមេរិកនេះ បានធ្វើការបញ្ចុះតម្លៃលើទំនិញពេញនិយមច្រើនជាង ៥ ០០០មុខ ដើម្បីបង្កើនស្ថិតិលក់របស់ខ្លួនវិញ៕

The post ក្រុមហ៊ុនលក់រាយខ្នាតយក្ស Target ចាត់តាំងថ្នាក់ដឹកនាំក្រុមហ៊ុន Pepsi ម្នាក់ ជាប្រធានផ្នែកហិរញ្ញវត្ថុ appeared first on .

ស្ដេចម៉ាឡេស៊ី បំពេញទស្សនកិច្ចផ្លូវរដ្ឋទៅចិន រយៈពេល ៤ថ្ងៃ

ឧកញ៉ាសំពៅ — Fri, 20 Sep 2024 03:16:58 +0000

ព្រះមហាក្សត្រនៃប្រទេសម៉ាឡេស៊ី Sultan Ibrahim បានធ្វើដំណើរទស្សនកិច្ចផ្លូវរដ្ឋ ទៅកាន់ប្រទេសចិនរយៈពេល ៤ថ្ងៃ ដើម្បីអបអរគម្រប់ខួប ៥០ឆ្នាំ នៃការបង្កើតទំនាក់ទំនងការទូតផ្លូវការ រវាងប្រទេសទាំង២។ នេះបើតាមការចុះផ្សាយពីសារព័ត៌មាន SCMP។

ក្នុងដំណើរទស្សនកិច្ចមួយនោះ មេដឹកនាំកំពូលចិន លោក ស៊ី ជិនពីង នឹងរៀបចំពិធីស្វាគមន៍ និងរាក់ទាក់ស្ដេចម៉ាឡេស៊ីយ៉ាងកក់ក្ដៅជាទីបំផុត មុននឹងជួបជជែកការងារផ្សេងៗ។

ជំនួបរវាងថ្នាក់ដឹកនាំប្រទេសទាំង២ ត្រូវបានគេរំពឹងទុកថា នឹងជជែកពីកិច្ចសហប្រតិបត្តិការ លើវិស័យរថភ្លើងល្បឿនលឿន បានបានចុះកិច្ចព្រមព្រៀងជាមួយគ្នា កាលពីដើមឆ្នាំនេះ ខណៈកិច្ចសហប្រតិបត្តិការថ្មីៗ ទំនងមិនកើតមានឡើយ។

សូមជម្រាបដែរថា ដំណើរទស្សនកិច្ចរបស់ស្ដេចម៉ាឡេស៊ី ទៅកាន់ប្រទេសចិន ត្រូវបានសង្ឃឹមថា នឹងជួយឲ្យទំនាក់ទំនងសេដ្ឋកិច្ចប្រទេសទាំង២ កាន់តែមានភាពរឹងមាំ ក៏ដូចជាទទួលបានជំនួយលើផ្នែកនយោបាយផ្សេងៗជាដើម៕

The post ស្ដេចម៉ាឡេស៊ី បំពេញទស្សនកិច្ចផ្លូវរដ្ឋទៅចិន រយៈពេល ៤ថ្ងៃ appeared first on .