កម្ពុជា-ម៉ារ៉៉ុក

កម្ពុជា-ម៉ារ៉ុក ចុះMoU ក្នុងឱកាសមហាសន្និបាត IPU លើកទី១៥២ នៅប្រទេសតួកគីយ៉េ

Kem sinath — Fri, 17 Apr 2026 09:00:00 +0000

ក្នុងស្មារតីពង្រឹងកិច្ចសហប្រតិបត្តិការអន្តរសភាឱ្យកាន់តែស៊ីជម្រៅ នៅថ្ងៃទី១៦ ខែមេសា ឆ្នាំ២០២៦ គណៈប្រតិភូជាន់ខ្ពស់សភាកម្ពុជា ដឹកនាំដោយ លោក អ៊ុច បូររិទ្ធ អនុប្រធានទី១ នៃព្រឹទ្ធសភា បានអញ្ជើញចូលរួមក្នុងជំនួបទ្វេភាគី និងពិធីចុះអនុស្សរណៈនៃការយោគយល់ ជាមួយសភាម៉ារ៉ុក ក្នុងឱកាសនៃមហាសន្និបាតលើកទី១៥២ នៃសហភាពអន្តរសភា (IPU) នៅទីក្រុងអ៊ីស្តង់ប៊ុល ប្រទេសតួកគីយ៉េ។

ក្នុងឱកាសនោះ សភាកម្ពុជា និងម៉ារុក ក៏បានចុះអនុស្សរណៈជាមួយគ្នា(MOU)។ ដោយពិធីចុះអនុស្សរណៈនៃការយោគយល់ (MoU) នេះ ត្រូវបានធ្វើឡើងរវាង លោក អ៊ុច បូររិទ្ធ និងលោក ស៊ីឌី ម៉ូហាម៉េដ អ៊ូល អេរ៉ាស៊ីដ (Sidi Mohamed OULD ERRACHID) ប្រធានព្រឹទ្ធសភាម៉ារ៉ុក។

ក្រៅពីអញ្ជើញជួបពិភាក្សាការងារទ្វេភាគី និងចុះអនុស្សរណៈនៃការយោគយល់ជាមួយសភាម៉ារ៉ុក គណៈប្រតិភូសភាកម្ពុជាក៏បានអញ្ជើញចូលរួមកិច្ចប្រជុំគណៈកម្មាធិការអចិន្ត្រៃយ៍ ស្តីពីការអភិវឌ្ឍប្រកបដោយចីរភាពផងដែរ។ ក្នុងវេទិកានេះ កម្ពុជា បានថ្លែងបទអន្តរាគមន៍ និងពិភាក្សាលើសេចក្តីសម្រេចស្តីពី «ការកសាងសេដ្ឋកិច្ចពិភពលោកប្រកបដោយយុត្តិធម៌ និងចីរភាព» ដោយផ្តោតលើតួនាទីសភាក្នុងការប្រយុទ្ធប្រឆាំងនឹងការគាំពារនិយម ការកាត់បន្ថយពន្ធគយ និងការការពារការគេចពន្ធសាជីវកម្ម ដែលដឹកនាំដោយសភាអារ៉ាប់រួម។

បន្ថែមពីលើនេះ គណៈប្រតិភូកម្ពុជា ដឹកនាំដោយ លោក សម តារា ក៏បានអញ្ជើញចូលរួមក្នុងវេទិកាសមាជិកសភាវ័យក្មេងនៃ IPU ដឹកនាំដោយសភាហ្សកដង់។ វេទិកានេះក៏បានពិភាក្សាលើការធ្វើបច្ចុប្បន្នភាព និងលើកកម្ពស់ការចូលរួមរបស់យុវជននៅក្នុងសភា ព្រមទាំងប្រមូលធាតុចូល និងទស្សនៈរបស់យុវជន ដើម្បីបញ្ចូលទៅក្នុងប្រធានបទស្នូលនៃមហាសន្និបាតលើកទី១៥២ ឱ្យកាន់តែមានសព្វសុពលភាព និងបរិយាបន្នផងដែរ។

The post កម្ពុជា-ម៉ារ៉ុក ចុះMoU ក្នុងឱកាសមហាសន្និបាត IPU លើកទី១៥២ នៅប្រទេសតួកគីយ៉េ appeared first on .

កម្ពុជា-ម៉ារ៉ុក ប្តេជ្ញាពង្រឹងទំនាក់ទំនងទ្វេភាគី និងពង្រីកកិច្ចសហប្រតិបត្តិការលើវិស័យនានាបន្ថែមទៀត

Kem sinath — Tue, 10 Feb 2026 05:41:49 +0000

កម្ពុជា និងម៉ារ៉ុក បានបញ្ជាក់ជាថ្មីនូវការប្តេជ្ញាចិត្តក្នុងការពង្រឹងបន្ថែមទៀតនូវទំនាក់ទំនងទ្វេភាគី និងពង្រីកកិច្ចសហប្រតិបត្តិការលើវិស័យផ្សេងៗទៀត ដែលជាប្រយោជន៍រួមនៃប្រទេសទាំងពីរ។ នេះបើតាមក្រសួងការបរទេស និងសហប្រតិបត្តិការអន្តរជាតិ ។

កិច្ចពិភាក្សាកាលពីថ្ងៃទី៦ ខែកុម្ភៈ ឆ្នាំ២០២៦ លោក ចាយ ណាវុធ អនុរដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ ជាមួយ លោក Omar KADIRI ប្រធាននាយកកិច្ចការអាស៊ី និងអូសេអានី នៃក្រសួងការបរទេស សហប្រតិបត្តិការអាហ្វ្រិក និងជនអន្តោប្រវេសន៍ម៉ារ៉ុក នៅទីក្រុងរ៉ាបាត បានស្វាគមន៍ចំពោះវឌ្ឍនភាពនៃទំនាក់ទំនងកម្ពុជា-ម៉ារ៉ុក។

ភាគីទាំងពីរបានរំលឹកឡើងវិញនូវកិច្ចប្រជុំប្រកបដោយផ្លែផ្កា នៅថ្ងៃទី២១ ខែតុលា ឆ្នាំ២០២៥ តាមប្រព័ន្ធវីដេអូ រវាងឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្រ្តីការបរទេស និងសហប្រតិបត្តិការអន្តរជាតិ និងឯកឧត្តម ណាសឺរ ប៊ូរីតា រដ្ឋមន្ត្រីក្រសួងការបរទេស នៃព្រះរាជាណាចក្រម៉ារ៉ុក ពិសេសការចុះហត្ថលេខា លើសេចក្តីថ្លែងការណ៍រួម ដែលជាផែនទីបង្ហាញផ្លូវច្បាស់លាស់ សម្រាប់ការពង្រឹងកិច្ចសហប្រតិបត្តិការបន្ថែមទៀតរវាងប្រទេសទាំងពីរ។

ជាមួយគ្នានោះ ភាគីទាំងពីរ ក៏បានពិភាក្សាអំពីការរៀបចំកិច្ចប្រជុំពិគ្រោះ យោបល់ទ្វេភាគីលើកទី៥ រវាងក្រសួងការបរទេសទាំងពីរ ដែលនឹងប្រព្រឹត្តទៅនៅទីក្រុងរ៉ាបាត ប្រទេសម៉ារ៉ុក ក្នុងឆ្នាំ២០២៦ ។ លើសពីនេះ ភាគីទាំងពីរក៏បានបញ្ជាក់ជាថ្មីនូវការប្តេជ្ញាចិត្តក្នុងការពង្រឹងបន្ថែមទៀតនូវទំនាក់ទំនងទ្វេភាគី និងពង្រីកកិច្ចសហប្រតិបត្តិការលើវិស័យផ្សេងៗទៀត ដែលជាប្រយោជន៍រួមនៃប្រទេសទាំងពីរផងដែរ៕

The post កម្ពុជា-ម៉ារ៉ុក ប្តេជ្ញាពង្រឹងទំនាក់ទំនងទ្វេភាគី និងពង្រីកកិច្ចសហប្រតិបត្តិការលើវិស័យនានាបន្ថែមទៀត appeared first on .