ការប្តេជ្ញានេះ បានធ្វើឡើងនៅក្នុងជំនួបរវាងងលោក អ៊ុត វុទ្ធី អគ្គលេខាធិការ គណៈកម្មាធិការសហប្រតិបត្តិការអភិវឌ្ឍន៍ នៃក្រុមប្រឹក្សាអភិវឌ្ឍន៍កម្ពុជា ជាមួយ គណៈប្រតិភូអាល្លឺម៉ង់ ដឹកនាំដោយ លោកស្រី Christina Laun ប្រធានផ្នែកប្រចាំតំបន់អាស៊ីអាគ្នេយ៍នៃក្រសួង សហព័ន្ធអាល្លឺម៉ង់សម្រាប់សហប្រតិបត្តិការសេដ្ឋកិច្ច និងការអភិវឌ្ឍ (BMZ) ដែលមកបំពេញទស្សនកិច្ចនៅកម្ពុជា ចាប់ពីថ្ងៃទី៣០ ខែវិច្ឆិកា ដល់ថ្ងៃទី០៤ ខែធ្នូ ឆ្នាំ២០២៤។

កិច្ចពិភាក្សារវាងភាគទាំងពីរ គឺធ្វើឡើងក្នុងគោលបំណង ដើម្បីសម្តែងការគួរសម និងពិភាក្សាពីវឌ្ឍនភាពនៃកិច្ចសហប្រតិបត្តិការ អភិវឌ្ឍន៍រវាងកម្ពុជា និងសាធារណរដ្ឋសហព័ន្ធអាល្លឺម៉ង់ ក៏ដូចជាផ្លាស់ប្តូរយោបល់ និងបទពិសោធន៍ ដើម្បីបន្ត ពង្រឹងកិច្ចសហប្រតិបត្តិការអភិវឌ្ឍន៍ និងភាពជាដៃគូនាពេលអនាគត ។

ជារួមមក ក្នុងឱកាសនោះ ភាគីទាំងពីរ ក៏បានវាយតម្លៃខ្ពស់ចំពោះវឌ្ឍនភាពនៃកិច្ចសហប្រតិបត្តិការអភិវឌ្ឍន៍ទ្វេភាគី ។ ជាមួយគ្នានេះ ក្នុងនាមរាជរដ្ឋាភិបាលកម្ពុជា លោក អ៊ុត វុទ្ធី អគ្គលេខាធិការ គណៈកម្មាធិការសហប្រតិបត្តិការ អភិវឌ្ឍន៍កម្ពុជានៃ ក្រុមប្រឹក្សាអភិវឌ្ឍន៍កម្ពុជា ក៏បានថ្លែងអំណរគុណយ៉ាងជ្រាលជ្រៅចំពោះរដ្ឋាភិបាល និង ប្រជាជនអាល្លឺម៉ង់ ដែលបានប្តេជ្ញាបន្តផ្តល់ការគាំទ្រដល់កម្ពុជាដើម្បីសម្រេចបានការអភិវឌ្ឍន៍សេដ្ឋកិច្ចប្រកបដោយ ចីរភាព និងបានចាត់ទុកកម្ពុជាជាដៃគូរយៈពេលវែងក្នុងកិច្ចសហប្រតិបត្តិការអភិវឌ្ឍន៍ ៕ អត្ថបទ៖ ហ្សាលីន

The post CDC និងសហព័ន្ធអាល្លឺម៉ង់ ប្តេជ្ញាពង្រឹងកិច្ចសហប្រតិបត្តិការអភិវឌ្ឍន៍ និងភាពជាដៃគូនាពេលអនាគត appeared first on .