នៅក្នុងកម្មវិធីនេះក៏មានការអញ្ជើញចូលរួមផងដែរពីសំណាក់លោកស្រី ច័ន្ទ ដាវី នាយិកាក្រុមហ៊ុនដាវីត្រាគ្រុប ឯកឧត្តម រដ្ឋលេខាធិការ អនុរដ្ឋលេខាធិការ លោកជំទាវ ឧកញ៉ា លោក លោកស្រី ប្រតិភូអមដំណើរ ក្រុមគ្រួសារគូស្វាមីភរិយាគូព្រេងព្រឹទ្ឋ និងភ្ញៀវកិត្តិយសជាច្រើនរូប។

ថ្លែងចំពោះមុខឯកឧត្ដម នេត្រ ភក្រ្ដា, លោកពេជ្រ ចិត្រា បានលើកឡើងថា កម្មវិធី«គូព្រេងព្រឹទ្ធ» ត្រូវបានបង្កើតឡើងកាលពីថ្ងៃទី៨ ខែមីនា ឆ្នាំ២០២៣។ កម្មវិធីនេះ គឺជា Platform មួយដើម្បី «បង្កើតសុភមង្គលគ្រួសារ» ហើយខ្លឹមសារសំខាន់គឺការបណ្ដុះនូវសុជីវធម៌ សីលធម៌ គុណធម៌ វប្បធម៌ និងទេសចរណ៍ និងការរស់នៅប្រកបដោយ ក្ដីស្រឡាញ់ សន្ដោសប្រណី គោរពឲ្យតម្លៃគ្នា ភាពស្មោះត្រង់ ភាពថ្លៃថ្នូរក្នុងសង្គមគ្រួសារ និងក្នុងសហគមន៍។

លោកពេជ្រ ចិត្រា បានបន្ដថា ក្រោយពីបង្កើតកម្មវិធីនេះមក គឺមានការគាំទ្រជាបន្តបន្ទាប់ និងច្រើនលើសលប់រហូតទទួលបានជាមាតិកាកម្មវិធីឈានមុខគេក្នុងប្រទេសកម្ពុជាស្ដីពី«សុភមង្គលគ្រួសារ» ដោយកម្មវិធីនេះមិនត្រឹមតែសម្រាប់ប្រជាជនខ្មែរនោះទេ គឺថែមទាំងបានពង្រីកទៅក្រៅប្រទេស ដោយមានការចូលរួមពីគូស្វាមីភរិយាជាជនជាតិ អាមេរិកកាំង អាល្លឺម៉ង់ បារំាង ថៃ ហើយទៅថ្ងៃអនាគត លោកមានបំណងពង្រីកឱ្យទៅជាកម្មវិធីសកល ដែលទទួលស្គាល់ពីប្រជាជនទូទាំងសកលលោក។

ប្រធានក្រុមប្រឹក្សាភិបាលក្រុមហ៊ុន កោះស្លាកែតស្ទូឌីយោ រូបនេះបានបន្ថែមទៀតថា ក្នុងការរៀបចំផលិតកម្មវិធី គូព្រេងព្រឹទ្ធ ចាប់ពីខែមករា ឆ្នាំ២០២៣ រហូតដល់ ខែមីនា ឆ្នាំ២០២៥នេះ គឺចំណាយថវិកាអស់ប្រមាណ140,000$មកហើយ។

លោកសង្កត់ធ្ងន់ថា «កម្មវិធី គូព្រេងព្រឹទ្ធ»នេះមិនមែនជាកម្មវិធីសប្បុរសធម៌សង្គមលើកទី១នោះទេ ព្រោះកន្លងមក ក្រុមហ៊ុនបុត្រសម្ព័ន្ធដទៃទៀតរបស់កោះស្លាកែតស្ទូឌីយោ កុ្រមការងារបានចូលរួមយ៉ាងសកម្ម ជាមួយរាជរដ្ឋាភិបាលជាច្រើនដូចជា៖ យុទ្ធនាការចុះចែកអំណោយសប្បុរសធម៌ កំឡុងពេលពេលជំងឺរាលត្បាតសកល កូវីត១៩ , កសាងឧបដ្ឋានសាលា,ឧបត្ថម្ភសម្រាប់សកម្មភាពសមាគមសិស្ស-និសិ្សត អ.ម.ត ,ឧបត្ថម្ភដល់រដ្ឋបាលខេត្តកណ្ដាលក្នុងកម្មវិធីប្រណាំងទូក, ផលិតបទភ្លេង និងចម្រៀងជូនក្រសួងវប្បធម៌ និងវិចិត្រសិល្បៈ ក្រុមនិសិ្សត អ.ម.ត និងផលិតចម្រៀងជាច្រើនបទទៀត ជូនថ្នាក់ដឹកនាំតាមស្ថាប័នផ្សេងៗ។ បន្ថែមពីនោះ ក៏បានចូលរួមឧបត្ថម្ភសម្រាប់ការកសាងហេដ្ឋារចនាសម្ព័ន្ធក្នុងមូលដ្ឋាន និងបណ្ដុះបណ្ដាលវគ្គខ្លីៗឥតគិតថ្លៃ ពីជំនាញសិល្បៈជូនដល់សហគមន៍ផងដែរ។

ជាមួយគ្នានោះ លោកពេជ្រ ចិត្រា ក៏បានថ្លែងអំណរគុណយ៉ាងជ្រាលជ្រៅជាទីបំផុតចំពោះ ឯកឧត្តម ជាថ្នាក់ដឹកនាំ ក្រសួងព័ត៌មាន ដែលបានផ្តល់សេចក្តីទុកចិត្តជឿជាក់ ទៅលើជំនាញ វិជ្ជាជីវៈ និងបទពិសោធន៍ក្រុមការងារកោះស្លាកែតស្ទូឌីយោ ពិសេសក្រុមការងារផលិតកម្មវិធី គូព្រេងព្រឹទ្ឋ ដែលសកម្មភាពនេះបានសបញ្ជាក់ឱ្យឃើញថាកម្មវិធីនេះ ពិតជាមានសារៈសំខាន់ និងបានចូលរួមចំណែកក្នុងការកសាងសុភមង្គល និងភាពសុខុដុមរមនាជូនមនុស្សជាតិ ។

សូមជម្រាបជូនថា លោកពេជ្រ ចិត្រា មិនត្រឹមតែជាផលិតករដែលមានទេព្យកោសល្យ ផ្នែកផលិតកម្មវិធី ផលិតបទចំរៀង រឿងកប្លែងខ្លី និងរឿងអប់រំខ្លីៗ ប៉ុណ្ណោះទេ ប៉ុន្តែថែមទាំងជាពានិជ្ជករមួយរូបដែលបានទាក់ទាញវិនិយោគិនបរទេស និងបានបង្កើតឱកាសការងារជាច្រើនកន្លែងជូនដល់កូនខ្មែរ តាមរយៈក្រុមហ៊ុនកោះស្លាកែតស្ទូឌីយោ ឯក ផលិតកម្មចំរៀងដាវីត្រា មេឌៀរ និងក្រុមហ៊ុនបុត្រសម្ព័ន្ធផ្សេងទៀតរបស់លោក។ ក្រៅពីស្នាដៃផលិតកម្មវិធី«គូព្រេងព្រឹទ្ធ» គឺមានស្នាដៃផលិតបទចំរៀងល្បីៗដែលកំពុងតែពេញនិយមគឺបទ «គូពីព្រេងព្រឹទ្ធ» ដែលដកស្រង់ចេញពីកម្មវិធីគូព្រេងព្រឹទ្ធ «អូនលែងប្ដី» ជាចំរៀងបែបអប់រំពីជីវីតគូ និងការកាត់បន្ថយហិង្សាក្នុងគ្រួសារ ដែលទទួលពានរង្វាន់ពីកម្មវិធី Pleng Music Awards 2023 និងស្នាដៃដទៃផ្សេងៗទៀតក្នុងក្របខណ្ឌក្រសួងវប្បធម៌ សមាគមន៍និស្សិតអ.ម.ត និងស្ថាប័ននានា៕

The post ក្រសួងព័ត៌មាន ប្រកាសទទួលស្គាល់ជាផ្លូវការកម្មវិធី «គូព្រេងព្រឹទ្ធ» របស់លោកពេជ្រ ចិត្រា appeared first on .