ថ្លែងក្នុងឱកាសបើព្រឹទ្ធិការ នាព្រឹកថ្ងៃទី ១៦ ខែមិថុនា ឆ្នាំ២០២៦នេះ សម្តេចធិបតី ហ៊ុន ម៉ាណែត បានលើកឡើងថា កម្ពុជាទទួលបានកិត្តិយសធ្វើជាម្ចាស់ផ្ទះរៀបចំព្រឹត្តិការណ៍ មហាសន្និបាតកាយឫទ្ធិនារីពិភពលោក លើកទី៣៩ និង កិច្ចប្រជុំប្រចាំឆ្នាំលើកទី៤២ របស់សហគមន៍ The Olave Baden-Powell Society (OB-PS) ឆ្នាំ២០២៦ ដោយមាន ប្រតិភូ WAGGGS ចូលរួមពីតំណាងប្រទេសជាសមាជិកជាង ៨៥ ប្រទេស។

សម្តេចធិបតី បន្តថា នេះជាការឆ្លុះបញ្ចាំងពីការជឿទុកចិត្ត ការទទួលស្គាល់ និងការគាំទ្រពីសហគមន៍អន្តរជាតិចំពោះព្រះរាជាណាចក្រកម្ពុជា។ ជាពិសេស ការជ្រើសរើសកម្ពុជាជាម្ចាស់ផ្ទះ បានបង្ហាញពីតួនាទីកាន់តែសកម្មរបស់កម្ពុជាលើឆាកអន្តរជាតិ ក្រោមបរិយាកាសសន្តិភាព ស្ថិរភាព សុវត្ថិភាព និងការអភិវឌ្ឍរីកចម្រើនលើគ្រប់វិស័យ។

ជាមួយគ្នានេះ សម្តេចធិបតី បានបន្ថែមថា ការរៀបចំព្រឹត្តិការណ៍នេះនៅកម្ពុជា មិនត្រឹមតែជាកិត្តិយសសម្រាប់សមាគមកាយឫទ្ធិនារីកម្ពុជាប៉ុណ្ណោះទេ ប៉ុន្តែគឺជាកិត្តិយសសម្រាប់ប្រជាជនកម្ពុជាទាំងមូល ដែលបានទទួលស្វាគមន៍ មិត្តភក្តិអន្តរជាតិ ក្រុមកាយឫទ្ធិនារី ថ្នាក់ដឹកនាំស្ត្រី យុវនារី អ្នកគាំទ្រ និងដៃគូអភិវឌ្ឍមកពីបណ្តាប្រទេសនៅជុំវិញពិភពលោក។

សូមជម្រាបដែរថា សន្និបាតកាយឫទ្ធិនារីពិភពលោក លើកទី៣៩ ប្រចាំឆ្នាំ២០២៦ ដែលកំពុងធ្វើនៅខេត្តសៀមរាប ប្រទេសកម្ពុជានាពេលនេះ បានរៀបចំឡើងក្រោមប្រធានបទ “We See, We Care, We Act” ដែលយើងអាចយល់ជាភាសាខ្មែរថា “យើងឃើញ, យើងយកចិត្តទុកដាក់, យើងរួមគ្នាធ្វើសកម្មភាព”៕ អត្ថបទ៖ហ្សាលីន

The post សម្តេចធិបតី៖ ព្រឹត្តិការណ៍មហាសន្និបាតកាយឫទ្ធិនារីពិភពលោក បង្ហាញពីតួនាទីកាន់តែសកម្មរបស់កម្ពុជាលើឆាកអន្តរជាតិ appeared first on .

លោកជំទាវបណ្ឌិត ពេជ ចន្ទមុន្នី អគ្គស្នងការសមាគមកាយឫទ្ធិនារីកម្ពុជា បានលើកឡើង​ថា​ ការ​ចូល​ជា​សមាជិក​របស់​សមា​​គ​មកាយឬទ្ធិកម្ពុជា ​គឺបានផ្ដល់ឱ្យសមាជិកនូវ​ចំណេះដឹងបទពិសោធន៍ទាំង​ជីវិត​ការងារ និងការងារសង្គម ផ្តល់​ឱកាស និង​​លទ្ធភាពធ្វើការរួមគ្នាដើម្បីផលប្រយោជន៍សង្គម។ លើស​​ពី​​នេះ​​កុមារី យុវតី និងសមាជិក​របស់​សមាគម​ត្រូវបាន​​បណ្ដុះ​​បណ្ដាលភាពជាអ្នកដឹកនាំ ធ្វើការ​ជាក្រុម​​ដើម្បីក្លាយជាធនធានដ៏ល្អជួយអភិវឌ្ឍប្រទេសជាតិ។ មិនតែ​ប៉ុណ្ណោះ​​សមា​ជិក​​​​ទាំងអស់ត្រូវបាន​ជំរុញ​​​លើកទឹកចិត្តឲ្យក្លាយជាកូនល្អ សិស្សល្អប្រជាពលរដ្ឋល្អ តាមគោលបំណង និងបេសកកម្ម និងពាក្យ​ស្លោក​​របស់សមាគមកម្លាំងស្ម័គ្រចិត្ត ដើម្បីកុមារីនិងយុវតីកម្ពុជា។

លោកជំទាវបណ្ឌិត បានថ្លែងអំណរគុណដល់សមាជិកាសមាជិកសកម្ម និងគាំទ្រដែលបាន​​ចូលរួមក្នុង​​ការគាំទ្រ​​ចែករំលែក​​ទាំង​​ចំណេះដឹង ពេលវេលា សម្ភារៈ និងថវិកាក្នុងការជូនដល់កុមារី យុវតីតាមរយៈ​​សមាគម​​កាយ​ឬទ្ធិនារីកម្ពុជា។

លោកជំទាវ បានបញ្ជាក់ថា តាមរយៈជំនួយពីសប្បុរសជននានា សមាគមនឹងយកមកបម្រើ​ដល់​សកម្មភាព និងគាំទ្រឱ្យ​​កិច្ចដំណើរការរបស់សមាគមមាន​​ប្រសិទ្ធភាពខ្ពស់ដើម្បី​ជួយអភិវឌ្ឍន៍​​ថាមពលកុមារី យុវតីរបស់កម្ពុជាមានអនាគតល្អ និងក្លាយជាធនធានដែលចាំបាច់​ក្នុងការ​កសាងប្រទេស​ជាតិតទៅមុខទៀត។

គួរបញ្ជាក់ថា នៅក្នុងអាណត្តិថ្មីនេះ ក្រោមការដឹកនាំរបស់លោកជំទាវបណ្ឌិត ពេជ ចន្ទមុន្នី សមាគម​​បានធ្វើសកម្មភាព​​ជាច្រើន និងបានចុះសំណេះសំណាលសួរសុខទុក្ខសមាជិកា សមាជិកតាមបណ្តា​​ខេត្ត និងបង្រៀនសម្ដែង​របាំប្រពៃណី​របស់កុមារី យុវតី រៀបចំកម្មវិធី Thinking Day កម្មវិធីបញ្ចូល​​សមាជិកថ្មីលើកទី២១ និងសកម្មភាពសង្គមសំខាន់ៗ​ជាច្រើនទៀត។

បន្ទាប់ពីប្រារព្ធពិធីសច្ចាបញ្ចូលសមាជិកថ្មីលើកទី២២រួចមក  លោកជំទាវបណ្ឌិត ពេជ ចន្ទមុន្នី បានដឹកនាំ​​ស្នងការ កុមារី យុវតី និងសមាជិកា សមាជិក​សមាគម​​ដាំដើមឈើនៅមុខប្រាសាទ​​អង្គរវត្តទុក​​​​ជាអនុស្សាវរី​​យ៍ប្រកបដោយ​បរិយា​កាស​រីករាយស្និទ្ធស្នាល​ផងដែរ៕

The post សមាគមកាយឫទ្ធិនារីកម្ពុជា ប្រារព្ធពិធី​សច្ចាបញ្ចូល​​សមាជិកថ្មីប្រមាណ​ជាង​២០០នាក់ appeared first on .