រដ្ឋ អនុញ្ញាតិឲ្យអ្នកឧកញ៉ា ទ្រី ភាព អភិវឌ្ឍកោះត្បាល់ តម្លៃ១៧លានដុល្លារ

ឧកញ៉ាកោះក្របី — Fri, 30 Sep 2022 03:50:50 +0000

គណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា ហៅកាត់ CDC បានសម្រេចចេញវិញ្ញាបនបត្រចុះបញ្ជីគម្រោងវិនិយោគ ជូនដល់ក្រុមហ៊ុនរបស់អ្នកឧកញ៉ា ទ្រី ភាព ក្នុងការស្នើសុំអភិវឌ្ឍកោះត្បាល់ ស្ថិតក្នុងភូមិសាស្រ្តខេត្តកែប។

នៅព្រឹកថ្ងៃទី៣០ ខែកញ្ញានេះ ក្រុមប្រឹក្សាអភិវឌ្ឍន៍កម្ពុជា សម្រេចចុះបញ្ជីអនុញ្ញាតិឲ្យអ្នកឧកញ៉ា ទ្រី ភាព តាមរយៈក្រុមហ៊ុន TRY PHEAP KOH TUNSAY RESORTS CO., LTD” ដើម្បីអភិវឌ្ឍន៍កោះត្បាល់ ដែលមានទីតាំងវិនិយោគស្ថិតនៅភូមិកែប សង្កាត់កែប ក្រុងកែប ខេត្តកែប ក្នុងទុនវិនិយោគចំនួន ១៧លានដុល្លារអាមេរិក និងអាចបង្កើតការងារបានចំនួន ១០៥កន្លែង។

សូមជម្រាបជូនថា អ្នកឧកញ៉ា ទ្រី ភាព ជាពាណិជ្ជករកំពុងឈរជើងចាក់គ្រឹះយ៉ាងរឹងមាំនៅក្នុងទឹកដីខេត្តកែប ខណៈដែលកន្លងទៅរាជរដ្ឋាភិបាលសម្រេចផ្តល់ការអនុញ្ញាតិឲ្យធ្វើការអភិវឌ្ឍន៍នៅតាមបណ្តាកោះជាច្រើនកន្លែងរួចមកហើយ។

គួររម្លឹកថា កាលពីថ្ងៃទី០២ ខែកញ្ញា ឆ្នាំ២០២២ ក្រុមការងាររបស់ក្រុមប្រឹក្សាអភិវឌ្ឍន៍កម្ពុជា ក្រុមការងារគណៈកម្មាធិការជាតិគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជា និងមន្ត្រីរបស់រដ្ឋបាលខេត្តកែប បានចុះទៅពិនិត្យកោះត្បាល់ បន្ទាប់ពីមានការស្នើសុំវិនិយោគអភិវឌ្ឍន៍ពីក្រុមហ៊ុន TRY PHEAP KOH TUNSAY RESORTS CO., LTD របស់អ្នកឧកញ៉ា ទ្រី ភាព។

លោក សោម ពិសិដ្ឋ អភិបាលខេត្តកែប ថ្លែងឱ្យដឹងថា តាមរយៈការសហការគ្នារវាងវិស័យរដ្ឋ និងឯកជន ក្នុងការអភិវឌ្ឍន៍នៅខេត្តកែប ពិតណាស់នឹងជះឥទ្ធិពលជាវិជ្ជមានសម្រាប់វិស័យទេសចរណ៍ និងសេដ្ឋកិច្ចរបស់ខេត្តកែប ដើម្បីលើកកម្ពស់ជីវៈភាពរបស់ប្រជាពលរដ្ឋមូលដ្ឋាន ដែលអាចផ្តល់កន្លែងការងារ សំដៅកាត់បន្ថយការចំណាកស្រុក ដូចនេះការធ្វើអោយគម្រោងលេចចេញជារូបរាងឡើង គឺជារឿងដែលយើងខិតខំបន្ត។

សូមជម្រាបជូនថា ខេត្តកែប មានកោះចំនួន១២ និងថ្មប៉ប្រះទឹក១ ដែលសុទ្ធសឹងតែជាទីតាំងសក្តានុពលខ្ពស់ក្នុងការអភិវឌ្ឍន៍វិស័យទេសចរណ៍។ ចំណែកឯ កោះត្បាល់ ជាកោះធម្មជាតិមួយដែលមានចម្ងាយប្រហែល ៦គីឡូម៉ែត្រ ពីក្រុងកែប និងធ្វើដំណើរតាមទូកប្រមាណពី ៣៥-៤៥នាទី។ កោះត្បាល់ ក៏នៅជាប់នឹងកោះទន្សាយ ដែលស្ថិតក្នុងគម្រោងអភិវឌ្ឍន៍របស់ក្រុមហ៊ុន ទ្រី ភាព ផងដែរ ដោយមានចម្ងាយពីគ្នា តែ ១,៥ គីឡូម៉ែត្រប៉ុណ្ណោះ៕

The post រដ្ឋ អនុញ្ញាតិឲ្យអ្នកឧកញ៉ា ទ្រី ភាព អភិវឌ្ឍកោះត្បាល់ តម្លៃ១៧លានដុល្លារ appeared first on .