ថ្លែងទៅកាន់ភាគីពាក់ព័ន្ធក្នុងសិក្ខាសាលា លោក ហេង ណន រដ្ឋលេខាធិការ ក្រសួងសាធារណការ និងដឹកជញ្ជូន បានឱ្យដឹងថា សិក្ខាសាលានេះ មានគោលបំណងសំខាន់ នៃសិក្ខាសាលាគឺដើម្បីផ្សព្វផ្សាយ និងជំរុញការអនុវត្តផែនការមេគ្រប់ជ្រុងជ្រោយស្ដីពី ប្រព័ន្ធដឹកជញ្ជូនអន្តរមធ្យោបាយ និងភស្ដុភារកម្មកម្ពុជា ២០២៣-២០៣៣ ដល់ក្រសួង ស្ថាប័នពាក់ព័ន្ធ ដៃគូអភិវឌ្ឍន៍ វិស័យឯកជន និងអង្គភាពជំនាញពាក់ព័ន្ធ ដើម្បីធ្វើការទាក់ទាញអ្នកវិនិយោគ និងជំរុញការអនុវត្តផែនការមេនេះ ឱ្យកាន់តែមានប្រសិទ្ធភាពខ្ពស់បន្ថែមទៀត។

សូមបញ្ជាក់ថា ផែនការមេគ្រប់ជ្រុងជ្រោយ ត្រូវបានអនុម័តដោយរាជរដ្ឋាភិបាលកាលពីថ្ងៃទី២ ខែសីហា ឆ្នាំ២០២៣ ជាការសំយោគបញ្ចូលគ្នានូវផែនការមេផ្លូវថ្នល់ ផែនការមេផ្លូវដែក ផែនការមេផ្លូវទឹក ផែនការមេកំពង់ផែ ផែនការមេផ្លូវអាកាស ផែនការមេឡូជីស្ទីក និងផែនការអន្តរមធ្យោបាយ ប្រកបដោយភាពប្រទាក់ក្រឡានៅក្នុងវិស័យដឹកជញ្ជូនផង ហើយស្របតាមយុទ្ធសាស្រ្តបញ្ចកោណដំណាក់កាលទី១ ដែលផែនការមេគ្រប់ជ្រុងជ្រោយនេះ នឹងជួយរួមចំណែកសម្រេចគោលដៅរបស់រាជរដ្ឋាភិបាល ក្នុងការប្រែក្លាយប្រទេសកម្ពុជាឱ្យមានចំណូលកម្រិតខ្ពស់នៅឆ្នាំ២០៥០។

ផែនការមេកំណត់បាននូវគម្រោងអាទិភាពចំនួន១៧៤ ក្នុងនោះគម្រោងផ្លូវថ្នល់មានចំនួន៩៤ គម្រោង​​ផ្លូវ ដែក​មានចំនួន៨ គម្រោងដឹកជញ្ជូនតាមផ្លូវទន្លេមានចំនួន២៣ គម្រោងដឹកជញ្ជូនតាមផ្លូវ​សមុទ្រ​មាន​ចំនួន២០ គម្រោងផ្លូវអាកាសមានចំនួន១០ គម្រោងប្រព័ន្ធឡូជីស្ទីកមានចំនួន១៥ និងគម្រោងបន្ថែម​ផ្សេងៗ​មានចំនួន៤។ គម្រោងទាំងនោះ រួមបញ្ចូលនូវគម្រោងតភ្ជាប់ពីមធ្យោបាយ​ដឹកជញ្ជូនមួយ​ទៅ​មធ្យោ​បាយដឹកជញ្ជូនផ្សេងទៀត និងទៅកាន់មណ្ឌលឡូជីស្ទីក ព្រមទាំងបែងចែក​ជារយៈពេលខ្លី និង​មធ្យម​ចំនួន៩០គម្រោង និងរយៈពេលវែងចំនួន ៩១គម្រោង៕ អត្ថបទ៖ ហ្សាលីន

The post ស្ថាប័នជំនាញ ជំរុញការអនុវត្តផែនការមេប្រព័ន្ធដឹកជញ្ជូនអន្តរមធ្យោបាយ និងភស្ដុភារកម្មកម្ពុជា appeared first on .

កិច្ចប្រជុំពិនិត្យពិភាក្សាលើគម្រោងសិក្សាផ្លូវតភ្ជាប់ផ្នែកខាងកើត នៃគម្រោងស្ពានឆ្លងកាត់ទន្លេបាសាក់ (ចាក់អង្រែក្រោម-ព្រែកប្រា) បានធ្វើឡើង កាលថ្ងៃទី២២ ខែតុលា ឆ្នាំ២០២៤ ដោយមានការចូលរួមពី ថ្នាក់ដឹកនាំក្រសួងសារធារណការ តំណាងរដ្ឋបាលរាជធានីភ្នំពេញ តំណាងអគ្គនាយកដ្ឋានដោះស្រាយផលប៉ះពាល់ ក្រសួងសេដ្ឋកិច្ច តំណាងក្រុមហ៊ុនShanghai Construction Group Co., Ltd ក្រុមការងារជំនាញបច្ចេកទេស និងភាគីពាក់ព័ន្ធផងដែរ។

នាឱកាសនោះ លោក សួង ហេង រដ្ឋលេខាធិការក្រសួងសាធារណការ និងដឹកជញ្ជូន បានឱ្យដឹងថា កិច្ចប្រជុំនេះរៀបចំឡើងដើម្បីពិនិត្យកំណត់ខ្សែអ័ក្ស និងគំនូសប្លង់បច្ចេកទេសនៃគម្រោងផ្លូវតភ្ជាប់ពីគម្រោងស្ពានឆ្លងកាត់ទន្លេបាសាក់ (ចាក់អង្រែក្រោម-ព្រែកប្រា) ផ្នែកខាងកើត ទៅផ្លូវជាតិលេខ១ ស្ថិតនៅសង្កាត់ព្រែកប្រា ខណ្ឌច្បារអំពៅ រាជធានីភ្នំពេញ ធ្វើយ៉ាងណាឱ្យខ្សែផ្លូវថ្មីនេះមានផលប៉ះពាល់តិច ស្របតាមលក្ខណៈបច្ចេកទេស និងមានផលចំណេញខ្ពស់។ អង្គប្រជុំបានឯកភាពគ្នាលើជម្រើសខ្សែផ្លូវ ១ ក្នុងចំណោមជម្រើស ២ ខ្សែផ្លូវ ដែលក្រុមហ៊ុនបានសិក្សា ដោយផ្អែកលើទិដ្ឋភាពបច្ចេកទេស សេដ្ឋកិច្ច និងនយោបាយ ។

ជាមួយគ្នានេះ លោករដ្ឋលេខាធិការ បានណែនាំដល់ភាគីពាក់ព័ន្ធធ្វើការផ្តល់ព័ត៌មានបន្ថែមទៀត ដើម្បីក្រុមហ៊ុនមានមូលដ្ឋានបញ្ចប់របាយការណ៍តាមការណែនាំរបស់អង្គប្រជុំ និងដាក់លទ្ធផលរបាយការណ៍នៃការសិក្សាជូនថ្នាក់ដឹកនាំពិនិត្យសម្រេចឱ្យបានឆាប់។

សូមជម្រាបជូនថា៖ គម្រោងផ្លូវតភ្ជាប់ផ្នែកខាងកើត នៃគម្រោងស្ពានឆ្លងកាត់ទន្លេបាសាក់(ចាក់អង្រែក្រោម-ព្រែកប្រា) ទៅផ្លូវជាតិលេខ១នេះ បានសិក្សាលើផ្លូវចំនួន២ខ្សែជាជម្រើស ក្នុងនោះជម្រើសផ្លូវទី១ មានប្រវែង១,៥៩៥គ.ម និងជម្រើសផ្លូវទី២ មានប្រវែង ១,៤៩០គ.ម ខ្សែផ្លូវទាំងពីរនេះ តភ្ជាប់ពីស្ពាន នៅក្នុងភូមិសាស្រ្តសង្កាត់ព្រែកប្រា ខណ្ឌច្បារអំពៅ ទៅកាន់ផ្លូវជាតិលេខ១ សង្កាត់វាលស្បូវ ខណ្ឌច្បារអំពៅ៕ អត្ថបទ៖ ហ្សាលីន

The post ស្ថាប័នជំនាញ កំពុងកំណត់ខ្សែអ័ក្ស និងគំនូសប្លង់បច្ចេកទេសនៃគម្រោងផ្លូវតភ្ជាប់ពីស្ពានទន្លេបាសាក់ appeared first on .

ថ្លែងក្នុងឱកាសដឹកនាំកិច្ចប្រជុំ កាលពីថ្ងៃពុធ ទី១៦ ខែតុលា ឆ្នាំ២០២៤ លោកប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន បានឱ្យដឹងថា កិច្ចប្រជុំនេះមានគោលបំណងដើម្បីពិនិត្យ ពិភាក្សាលើបញ្ហាប្រឈម សំណូមពរ តាមដានវឌ្ឍនភាពការងារ និងដំណោះស្រាយឆ្លើយតបទៅនឹងការលើកឡើងនានាពីផ្នែកឯកជន ដែលសភាពាណិជ្ជកម្មកម្ពុជាបានស្នើមកក្រសួង រួមទាំងផ្តល់ដំណោះស្រាយស្របតាមកម្មវិធីនយោបាយរបស់រាជរដ្ឋាភិបាលក្នុងការសម្រួលធុរកិច្ច ជំរុញលើកកម្ពស់កំណើនសេដ្ឋកិច្ចជាតិ និងទាក់ទាញវិនិយោគគិនទាំងក្នុង និងក្រៅប្រទេសផងដែរ។

គួរបញ្ជាក់ដែរថា ក្នុងរយៈពេល១ឆ្នាំ ពោលគឺចាប់ពីខែកញ្ញា ឆ្នាំ២០២៣ ដល់ខែសីហា ឆ្នាំ២០២៤  តាមរយៈក្រុមប្រឹក្សាអភិវឌ្ឍន៍កម្ពុជា (CDC) ក្នុងរយៈពេល១ឆ្នាំ នៃរាជរដ្ឋាភិបាលកម្ពុជា នីតិកាលទី៧ CDC បានអនុម័តគម្រោងវិនិយោគ ៣៩១ គម្រោង ដែលមានទុនវិនិយោគសរុបជាង ៧,៥ពាន់លានដុល្លារ និងអាចបង្កើតការងារ ៣៤១.០០០ កន្លែង។​

ក្នុងរយៈពេលពេញមួយឆ្នាំនេះដែរ ប្រភពទុនវិនិយោគមកពីប្រទេសចិនឈរនៅលំដាប់លេខរៀងទី១ ដោយបានរួមចំណែក ៦០.៤៤% នៃទុនវិនិយោគសរុប ខណៈដែលការវិនិយោគក្នុងស្រុកគ្របដណ្តប់ ៣២.៣១% នៃទុន វិនិយោគសរុប។

យ៉ាងណាមិញ ប្រមុខរាជរដ្ឋាភិបាលកម្ពុជា សម្តេចធិបតី ហ៊ុន ម៉ាណែត ធ្លាប់បានលើកឡើងថា កម្ពុជាបើកចំហស្វាគមន៍ការចូលរួមវិនិយោគពីគ្រប់តួអង្គពាក់ព័ន្ធទាំងជាតិ និងអន្តរជាតិ សំដៅឈានឆ្ពោះសម្រេចបាននូវការធ្វើសមាហរណកម្ម និងការតភ្ជាប់ខ្សែច្រវាក់ផ្គត់ផ្គង់ក្នុងតំបន់ប្រកបដោយភាពរស់រវើក និងប្រសិទ្ធភាពខ្ពស់៕ អត្ថបទ៖ ហ្សាលីន

The post ស្ថាប័នពាក់ព័ន្ធ រួមគ្នារកដំណោះស្រាយលើបញ្ហាប្រឈមរបស់វិស័យឯកជន ដើម្បីទាក់ទាញការវិនិយោគ appeared first on .

​ក្រសួងសាធារណការ និងដឹកជញ្ជូន បានឱ្យដឹងថា ជំនួបពិភាក្សានេះ ធ្វើឡើងក្នុងគោលបំណងដើម្បីពិនិត្យលទ្ធភាពក្នុងការសិក្សាស្វែងយល់ពីការសាងសង់ហេដ្ឋារចនាសម្ព័ន្ធ ផ្លូវថ្នល់ឱ្យមានភាពធន់ទៅនឹងការប្រែប្រួលអាកាសធាតុ និងការផ្លាស់ប្តូរបទពិសោធន៍ ក៏ដូចជាសិក្សាឱកាសវិនិយោគបន្ថែមទៀតលើវិស័យហេដ្ឋារចនាសម្ព័ន្ធផ្លូវ ថ្នល់ ស្ពាន ផ្លូវដែក និងកំពង់ផែ នៅក្នុងប្រទេសកម្ពុជាផងដែរ។

ថ្លែងក្នុងជំនួបនោះ គណៈប្រតិភូក្រុមហ៊ុន Minconsult Sdn Bhd បានបង្ហាញចំណាប់អារម្មណ៍ចំពោះការអភិវឌ្ឍយ៉ាងឆាប់រហ័សលើវិស័យហេដ្ឋារចនាសម្ព័ន្ធនៅកម្ពុជា និងបានជម្រាបជូនអំពីលទ្ធផលការងាររបស់ខ្លួន ក្នុងនាមជាអ្នកត្រួតពិនិត្យ និងវាយតម្លៃបច្ចេកទេសលើគម្រោងសាងសង់ផ្លូវល្បឿនលឿនភ្នំពេញ-ក្រុងព្រះសីហនុ ដែលកំពុងបើកដំណើរការនាពេលបច្ចុប្បន្ន និងការងារនានាលើហេដ្ឋារចនាសម្ព័ន្ធផ្លូវថ្នល់ ដែលក្រុមហ៊ុនបានអនុវត្តកន្លងមក។

ជាការឆ្លើយតប លោកស្រី កុយ សុដានី រដ្ឋលេខាធិការប្រចាំការនៃក្រសួងសារធារណការ និងដឹកជញ្ជូន ក៏បានលើកឡើងពីបច្ចុប្បន្នភាពទាក់ទងនឹងការអភិវឌ្ឍហេដ្ឋារចនាសម្ព័ន្ធរបស់កម្ពុជា និងគម្រោងសំខាន់ៗមួយចំនួន ក៏ដូចជាដើម្បីជួយឱ្យក្រុមហ៊ុនបានស្វែងយល់អំពីកាលានុវត្តភាពនៃការអភិវឌ្ឍហេដ្ឋារចនាសម្ព័ន្ធប្រកបដោយគុណភាពខ្ពស់នៅកម្ពុជា សំដៅចូលរួមចំណែកដល់ការអភិវឌ្ឍសេដ្ឋកិច្ចកម្ពុជាឱ្យកាន់តែមានការរីកចម្រើនថែមទៀត។

សូមរម្លឹកដែរថា ​ថ្មីៗ​នេះ​រាជរដ្ឋាភិបាល​កម្ពុជា បានដាក់​ចេញ​ផែនទី​បង្ហាញផ្លូវ​រយៈពេល ១០​ ឆ្នាំ នៃ​ផែនការមេ​គ្រប់​ជ្រុងជ្រោយ​ស្តីពី​ប្រព័ន្ធដឹកជញ្ជូន​និង​ភ័ស្តុភារ​កម្ពុជា ឆ្នាំ​ ២០២៣-២០៣៣ លើ​គម្រោង​អាទិភាព​ចំនួន​ ១៧៤ ដែលមាន​តម្លៃ​វិនិយោគ​តាម​ការប៉ាន់ប្រមាណ​ ៣៦,៦៨​ ពាន់​លាន​ដុល្លារ​។

ក្នុងនោះ​គម្រោង​ផ្លូវថ្នល់ ៩៤, គម្រោង​ផ្លូវដែក ៨, គម្រោង​ដឹកជញ្ជូន​នៅតាម​ផ្លូវទឹក ២៣, គម្រោង​ដឹកជញ្ជូន​តាម​សមុទ្រ ២០, គម្រោង​ដឹកជញ្ជូន​ផ្លូវអាកាស ១០, គម្រោង​ប្រព័ន្ធ​ភ័ស្តុភារ ១៥, និង​គម្រោង​អភិវឌ្ឍន៍​ហេដ្ឋារចនាសម្ព័ន្ធ​ចំនួន ៤ ​ផ្សេងៗ​ទៀត​។​

​នៅក្នុង​ចំណោម​គម្រោង​ទាំងអស់​គឺមាន​ប្រហែល ៩០​ ជា​គម្រោង​អភិ​​វឌ្ឍន៍​រយៈពេល​ខ្លី និង​មធ្យម និង ៩១​ ផ្សេងទៀត​ជា​គម្រោង​អភិវឌ្ឍន៍​រយៈ​​ពេល​វែង​។ គម្រោង​ទាំងនេះ​ត្រូវបាន​ត​ភ្ជាប់​គ្រប់​មធ្យោបាយ​ទាំងអស់​នៃ​ការដឹកជញ្ជូន និង​បាន​ត​ភ្ជាប់​ជាមួយ​មជ្ឈមណ្ឌល​ភ័ស្ដុភារ​ផងដែរ​៕ អត្ថបទ៖​រង្សី

The post ក្រុមហ៊ុនធំមួយ កំពុងសិក្សាស្វែងរកឱកាសវិនិយោគលើវិស័យហេដ្ឋារចនាសម្ព័ន្ធដឹកជញ្ជូននៅកម្ពុជា appeared first on .

លោក ផន រឹម អ្នកនាំពាក្យក្រសួងសាធារណការ និងដឹកជញ្ជូន កាលថ្ងៃទី៩ ខែកក្កដា បានឱ្យដឹងថា គម្រោងសាងសង់លើកកម្រិតគុណភាពផ្លូវជាតិលេខ៤៨ ប្រវែងសរុប១៤៨ គីឡូម៉ែត្រ ចាប់ពីចំណុចប្រសព្វជាមួយផ្លូវជាតិលេខ៤ ដល់ក្រុងខេមរភូមិន្ទ ខេត្តកោះកុង សម្រេចវឌ្ឍនភាពការងារសាងសង់ ៦២,១១% ហើយ ដោយគិតត្រឹមដើមខែកក្កដា ឆ្នាំ២០២៤នេះ។

ទន្ទឹងវឌ្ឍនភាព អ្នកនាំពាក្យរូបនេះ ក៏សុំការយោគយល់ និងអធ្យាស្រ័យខ្ពស់ ពីសំណាក់បងប្អូនប្រជាពលរដ្ឋអ្នកធ្វើដំណើរ និងប្រជាពលរដ្ឋរស់នៅតាមសងខាងផ្លូវដែលកំពុងសាងសង់ និងលើកកម្រិតគុណ ដោយមានកំណាត់ផ្លូវខ្លះ ត្រូវកែសម្រួលឱ្យកាន់តែប្រសើរឡើង និងមានសភាពបែកភក់ រអិលពិបាកធ្វើដំណើរ និងរំខានដល់ការរស់នៅ ប្រកបអាជីវកម្មប្រចាំថ្ងៃ ក្នុងដូវរវស្សាភ្លៀកធ្លាក់ជោគជាំនេះ ជាពិសេសនៅចំណុចចំណោតតាប៉ន ត្រង់គីឡូម៉ែតលេខ ១៤០ +៣០០-១៤០+៧០០ និងចំណុចបង្គោលអង់តែន៣ដើម ត្រង់គីឡូម៉ែត្រលេខ ១៣៧ -១៤០។

យ៉ាងណាមិញ លោកថា ក្រុមការងារការដ្ឋានតែងអន្តរាគមន៍បន្ទាប់ និងដោះស្រាយជាបណ្តោះអាសន្ន ដើម្បីសម្រួលដល់ការធ្វើដំណើររបស់ប្រជាពលរដ្ឋ និងបញ្ចៀសគ្រោះថ្នាក់ដោយប្រការយថាហេតុណាមួយពេលរអិលខ្លាំង។

បច្ចុប្បន្នគម្រោងលើកកម្រិតគុណភាពផ្លូវនេះ កំពុងដំណើរការយ៉ាងមមាញឹកលើការងារអ៊ុត AC ដោយគ្រោងនឹងបញ្ចប់នៅរដូវប្រាំង នាឆ្នាំ២០២៥ខាងមុខនេះ។នេះបើតាមការបញ្ជាក់បន្ថែមលោក ផន រឹម។

គួររំលឹកដែរថា គម្រោងសាងសង់ផ្លូវជាតិលេខ៤៨នេះ មានប្រវែងសរុប១៤៨គីឡូម៉ែត្រ ត្រង់ចំណុចប្រសព្វជាមួយផ្លូវជាតិលេខ៤ PK ១៤១+៧៥០ (ចំការហ្លួង-ស្រុកស្រែអំបិល)  រហូតដល់ក្រុងខេមរភូមិន្ទ ខេត្តកោះកុង ដែលបានបើកការដ្ឋានសាងសង់នៅថ្ងៃទី០៣ ខែមករា ឆ្នាំ២០២២ ដោយប្រើប្រាស់ថវិកាប្រមាណ ៧៨លានដុល្លារ៕ អត្ថបទ៖ រង្សី

The post ផ្លូវជាតិលេខ៤៨ តម្លៃ៧៨លានដុល្លារ នឹងសង់រួចរាល់នៅឆ្នាំ២០២៥ ខណៈបច្ចុប្បន្នសម្រេចជាង៦២% appeared first on .

ក្រសួងសាធារណការ និងដឹកជញ្ជូន កាលថ្ងៃទី០៣ ខែកក្កដា ឆ្នាំ២០២៤ បានឱ្យដឹងថា បើគ្មានការប្រែប្រួលទេ គម្រោងខ្សែផ្លូវដ៏សំខាន់នេះ នឹងសម្រេចមុនកិច្ចសន្យាមួយឆ្នាំ ដោយធានាកម្រិតគុណភាពតាមស្តង់ដារបច្ចេកទេសខ្ពស់។

ក្រសួងបានបន្ថែមថា បើយោងតាមរបាយការណ៍វឌ្ឍនភាពបានឱ្យដឹងថា ការងារអ៊ុតកៅស៊ូបេតុង AC ទាំង២ស្រទាប់ បានបញ្ចប់១០០ភាគរយ ចំណែកឯការងារបំពាក់សម្ភារសុវត្តិភាពចរាចរណ៍(គំនូសចរាចរណ៍ ផ្លាកសញ្ញា ផ្លាកបង្ហាញទិសផ្លូវ របារ-Guardrail និងការងារចាំបាច់ផ្សេងៗជាសំណូមពរក្រុមការងារ និងប្រជាពលរដ្ឋរស់នៅសងខាងផ្លូវ) ពោលគឺគ្រោងនឹងបញ្ចប់នៅចុងខែសីហា ឆ្នាំ២០២៤ខាងមុខនេះ។

សូមជម្រាបដែរថា ផ្លូវជាតិលេខ៣១ ដែលមានប្រវែងសរុបជិត ៥៤គីឡូម៉ែត្រ ចាប់ពីបែកគុស (ចំណុចប្រសព្វផ្លូវជាតិលេខ៣) ទៅដល់ទីរួមស្រុកកំពង់ត្រាច (ចំណុចតភ្ជាប់ទៅ ផ្លូវជាតិលេខ៣៣) កំពុងដំណើរការស្តារ និងលើកកម្រិតគុណភាព បន្ទាប់ពីបើកការដ្ឋានកាលពីខែធ្នូ ឆ្នាំ២០២២កន្លងទៅ ផ្លូវនេះកំពុងអនុវត្ដការសាងសង់ដោយក្រុមហ៊ុនសាជីវកម្មស្ពាន និងថ្នល់ចិន(CRBC) និងត្រួតពិនិត្យបច្ចេកទេស ដោយក្រុមហ៊ុនទីប្រឹក្សាបច្ចេកទេសក្វាងចូវវ៉ានអាន។

ចំពោះផ្លូវជាតិលេខ៣១ ចំណាយថវិកាប្រមាណជាង ៦០លានដុល្លារអាមេរិក ដែលជាឥណទានសម្បទានពីរដ្ឋាភិបាលនៃសាធារណរដ្ឋប្រជាមានិតចិន រួមជាមួយនឹងថវិកាបដិភាគរបស់រាជរដ្ឋាភិបាលកម្ពុជា សម្រាប់ការដោះស្រាយផលប៉ះពាល់និងពន្ធអាករផ្សេងៗ៕ អត្ថបទ៖ រង្សី

The post គម្រោងស្ដារគុណភាពផ្លូវជាតិលេខ៣១ តម្លៃជាង៦០លានដុល្លារ គ្រោងបញ្ចប់នៅចុងខែសីហា ឆ្នាំនេះ appeared first on .

ក្រសួងបានឱ្យដឹងថា គម្រោងស្ថាបនាផ្លូវជាតិលេខ១០ មានប្រវែងសរុប ១៩៨,២១៨ គ.ម (PK000+000 – PK១៩៨+៥១៨) សម្រេចបានលទ្ធផលជារួម ៨៨,៣៨%ហើយ បើគិតត្រឹមដំណាច់ខែមិថុនា ឆ្នាំ២០២៤ នេះ។ គម្រោងនេះ ចាប់ពីផ្លូវជាតិលេខ ៥៧-៧ ត្រង់ PK៣៥+៩០០ នៅភូមិកញ្ចាំង ឃុំស៊ុង ស្រុកសំឡូត ខេត្តបាត់ដំបង ឆ្លងកាត់ឃុំប្រម៉ោយ ស្រុកវាលវែង ខេត្តពោធិ៍សាត់ រហូតដល់ផ្លូវជាតិលេខ៤៨(ចាស់) ត្រង់ PK១+៧០០ ក្នុងសង្កាត់ស្មាច់មានជ័យ ក្រុងខេមរភូមិន្ទ ខេត្តកោះកុង។

ក្រសួង បានឱ្យដឹងទៀតថា វឌ្ឍនភាពនេះរួមមាន៖ ការងារផ្លូវថ្នល់សម្រេចបាន ៨០,២៦% ការងារស្ពានសម្រេចបាន ៩៣,២៣% ការងារស្ពានខ្ពស់ជាងគេប្រវែង ៥៣០ម៉ែត្រ សម្រេចបាន ៤៣,៥០% (គ្រោងដាក់ឱ្យប្រើប្រាស់សាកល្បងនៅចុងខែមីនា ឆ្នាំ២០២៥ ខាងមុខ) ការងារលូកាត់ទទឹងថ្នល់សម្រេចបាន ៩៩,៨២% និងការងារលូបណ្តោយថ្នល់ និងជញ្ជាំងការពារជើងទេរអនុវត្តបាន ៨៩,៨៤%។

យ៉ាងណាមិញ បើតាមក្រសួង បានអះអាងដែរថា នៅរដូវវស្សានេះផ្លូវជាតិលេខ១០ ប្រជាពលរដ្ឋអាចធ្វើដំណើរបានដោយរលូន តែត្រូវមានការប្រុងប្រយ័ត្ន ដោយសារកំណាត់ផ្លូវខ្លះនៅជាក្រួសក្រហម និងកំណាត់ផ្លូវខ្លះទៀត អាចរអិលដោយអន្លើពេលមានភ្លៀងធ្លាក់ខ្លាំង។

គួរបញ្ជាក់ថា ផ្លូវជាតិលេខ១០នេះ ជាប្រភេទផ្លូវ Grade III ក្រាលកៅស៊ូពីរស្រទាប់ (DBST) មានប្រវែងផ្លូវសរុប១៩៨,៥១៨គីឡូម៉ែត្រ និងទទឹង ៩ម៉ែត្រ ត្រូវបានសាងសង់ឡើងក្រោមហិរញ្ញប្បទានពីរដ្ឋាភិបាលចិន មានទំហំទឹកប្រាក់សរុបប្រមាណជាង ១៨៨លានដុល្លារ។ គម្រោងសាងសង់ផ្លូវនេះមានរយៈពេល ៦៦ខែ និងបានចាប់ផ្ដើមសាងសង់ពីថ្ងៃទី១៨ ខែធ្នូ ឆ្នាំ២០១៩ មកហើយគ្រោងនឹងបញ្ចប់នាខែមិថុនា ឆ្នាំ២០២៥ ខាងមុខនេះ៕ អត្ថបទ៖ រង្សី

The post ផ្លូវជាតិលេខ១០ ភ្ជាប់ភូមិសាស្រ្តខេត្ត ៣ ក្នុងតម្លៃជាង ១៨៨លានដុល្លារ សាងសង់បានជាង៨៨%ហើយ appeared first on .

នេះបើយោងតាមកិច្ចប្រជុំពិភាក្សារវាងតំណាងក្រុមហ៊ុនខាងលើ ជាមួយលោក លឹម ស៊ីដេនីន រដ្ឋលេខាធិការ ក្រសួងសាធារណការ និងដឹកជញ្ជូន នាទីស្តីការក្រសួង កាលចុងសប្តាហ៍នេះ។

នាឱកាសនោះ តំណាងក្រុមហ៊ុន (CFOCN) បានឱ្យដឹងថា តំណាងក្រុមហ៊ុន បានឱ្យដឹងទៀតថា កិច្ចប្រជុំនេះ ធ្វើឡើងក្នុងគោលបំណងដើម្បីពិនិត្យបទបង្ហាញដោយក្រុមហ៊ុន CFOCN ស្តីពីការជីក និងខួងកាត់ទទឹងផ្លូវជាតិសំខាន់ៗ ដើម្បីរាយបណ្តាញខ្សែកាប្លិ៍អុបទិកក្នុងភូមិសាស្ត្រខេត្តចំនួន០៩ ដោយផ្តោតទៅលើផែនការលម្អិត បច្ចេកទេស និងផលប៉ះពាល់ ដោយត្រូវអនុវត្តតាមបទបញ្ញត្តិបច្ចេកទេសស្ដីពីការរចនា និងដំឡើងប្រព័ន្ធបរិក្ខារសាធារណៈនៅតាមដងផ្លូវ ដើម្បីធានាបាននូវសុវត្ថិភាព ប្រសិទ្ធភាព និងនិរន្តរភាព នៃប្រព័ន្ធខ្សែកាប្លិ៍ ជាពិសេសការរៀបចំប្រព័ន្ធបរិក្ខារក្រោមដីឱ្យមានសណ្ដាប់ធ្នាប់។

តំណាងក្រុមហ៊ុនដដែលបានបន្តថា គម្រោងស្នើសុំជីក និងខួងកាត់ទទឹងផ្លូវរាយបណ្ដាញខ្សែកាប្លិ៍អុបទិកក្នុងភូមិសាស្ត្រខេត្តចំនួន៩ រួមមាន៖ ខេត្តកណ្ដាល កំពត កំពង់ស្ពឺ កំពង់ធំ កែប ព្រះសីហនុ កោះកុង តាកែវ និងខេត្តស្វាយរៀង។

ជាការឆ្លើយតបវិញ លោក លឹម ស៊ីដេនីន រដ្ឋលេខាធិការក្រសួងសាធារណការ  បានបង្ហាញនូវចំណាប់អារម្មណ៍ និងណែនាំដល់ភាគីក្រុមហ៊ុន និងមន្ទីរសាធារណការ ដឹកជញ្ជូនខេត្តទាំង៩ ដែលជាសេនាធិការរបស់ក្រសួង រួមទាំងអង្គភាពពាក់ព័ន្ធទាំងអស់ ត្រូវចូលរួមសហការគ្នា និងផ្ដល់ព័ត៌មានគ្នាទៅវិញទៅមកឱ្យបានគ្រប់ជ្រុងជ្រោយ ដើម្បីជួយពន្លឿនការងារនេះឱ្យបានកាន់ឆាប់ទៅតាមផែនការគ្រោងទុក។

សូមរម្លឹកដែរថា ប្រមុខរាជរដ្ឋាភិបាល សម្តេចធិបតី ហ៊ុន ម៉ាណែត ធ្លាប់បានលើកឡើងថា ហេដ្ឋារចនាសម្ព័ន្ធ នៃបណ្តាញខ្សែកាបអ៊ុបទិច បានដើរតួយ៉ាងសំខាន់ ដែលធ្វើឱ្យមានលំហូរនៃព័ត៌មាន និងទំនាក់ទំនងពិភពលោក ដែលជះឥទ្ធិពល ទៅលើការ អភិវឌ្ឍសេដ្ឋកិច្ចនៅក្នុងតំបន់​​​ និងក្នុងប្រទេស។​

សម្តេចធិបតីបន្តថា កម្ពុជាត្រូវការការវិនិយោគ ដើម្បីពង្រឹកបន្ថែមលើហេដ្ឋារចនាសម្ព័ន្ធ បណ្តាញខ្សែកាបអុបទិក ដើម្បីឆ្លើយតបទៅនឹងយុទ្ធសាស្ត្រអភិវឌ្ឍន៍សេដ្ឋកិច្ចឌីជីថលរបស់រាជរដ្ឋាភិបាលកម្ពុជា៕ អត្ថបទ៖ រង្សី

The post ក្រុមហ៊ុន CFOCN ស្នើសុំជីក និងរាយបណ្ដាញខ្សែកាប្លិ៍អុបទិកកាត់ផ្លូវក្នុងភូមិសាស្ត្រខេត្តចំនួន៩ appeared first on .

យោងតាមសេចក្ដីប្រកាសនេះ បានឱ្យដឹងថា ការកំណត់សម្គាល់ប្រភេទលេខសម្គាល់យានជំនិះសម្បត្ដិរដ្ឋ តាមក្រសួងស្ថាប័ន គឺធ្វើឡើងតាមលេខរៀងបន្ដបន្ទាប់គ្នា។ ថ្ងៃនេះ គេហទំព័រឧកញ៉ាញូស៍សូមលើកមករំលឹកពីលេខសម្គាល់យានជំនិះរបស់រដ្ឋ ដែលបានកំណត់ដោយក្រសួងសាធារណការ ដូចខាងក្រោម។

ប្រភេទលេខសម្គាល់ រដ្ឋ01.2-0001 សម្រាប់រថយន្តជាសម្បត្តិរដ្ឋ ដែលប្រើប្រាស់ដោយ អគ្គលេខាធិការដ្ឋានព្រឹទ្ធសភា, លេខសម្គាល់ រដ្ឋ02.2-0001 ប្រើប្រាស់ដោយ អគ្គលេខាធិការដ្ឋានរដ្ឋសភា, លេខសម្គាល់ រដ្ឋ03.2-0001 ប្រើប្រាស់ដោយ អគ្គលេខាធិការដ្ឋានក្រុមប្រឹក្សា ធម្មនុញ្ញ, លេខសម្គាល់ រដ្ឋ04.2-0001 ប្រើប្រាស់ដោយ អង្គភាពប្រឆាំងអំពើពុករលួយ, លេខសម្គាល់ រដ្ឋ05.2-0001 ប្រើប្រាស់ដោយ ទីស្តីការគណៈរដ្ឋមន្ត្រី, លេខសម្គាល់ រដ្ឋ06.2-0001 ប្រើប្រាស់ដោយ ក្រសួងការពារជាតិ, លេខសម្គាល់ រដ្ឋ07.2-0001 ប្រើប្រាស់ដោយ ក្រសួងមហាផ្ទៃ, លេខសម្គាល់ រដ្ឋ08.2-0001 ប្រើប្រាស់ដោយ ក្រសួងអធិការកិច្ច។

បន្ថែមទៀតនោះ សម្រាប់លេខសម្គាល់ រដ្ឋ09.2-0001 សម្រាប់រថយន្តជាសម្បត្តិរដ្ឋ ដែលប្រើប្រាស់ដោយ ក្រសួងការបរទេស និងសហប្រតិបត្តិការអន្តរជាតិ, លេខសម្គាល់ រដ្ឋ10.2-0001 ប្រើប្រាស់ដោយ ក្រសួងសេដ្ឋកិច្ច និងហិរញ្ញវត្ថុ, លេខសម្គាល់ រដ្ឋ11.2-0001 ប្រើប្រាស់ដោយ ក្រសួងព័ត៌មាន, លេខសម្គាល់ រដ្ឋ12.2-0001 ប្រើប្រាស់ដោយ ក្រសួងសុខាភិបាល, លេខសម្គាល់ រដ្ឋ13.2-0001 សម្រាប់រថយន្តជាសម្បត្តិរដ្ឋ ដែលប្រើប្រាស់ដោយ ក្រសួងរ៉ែ និងថាមពល, លេខសម្គាល់ រដ្ឋ14.2-0001 ប្រើប្រាស់ដោយ ក្រសួងផែនការ, លេខសម្គាល់ រដ្ឋ15.2-0001 ប្រើប្រាស់ដោយ ក្រសួងពាណិជ្ជកម្ម, លេខសម្គាល់ រដ្ឋ16.2-0001 ប្រើប្រាស់ដោយ ក្រសួងអប់រំ យុវជន និងកីឡា។

ទន្ទឹមនឹងនោះ សម្រាប់លេខសម្គាល់ រដ្ឋ17.2-0001 សម្រាប់រថយន្តជាសម្បត្តិរដ្ឋ ដែលប្រើប្រាស់ដោយ ក្រសួងកសិកម្ម រុក្ខាប្រមាញ់ និងនេសាទ, លេខសម្គាល់ រដ្ឋ18.2-0001 ប្រើប្រាស់ដោយ ក្រសួងវប្បធម៌ និងវិចិត្រសិល្បៈ, លេខសម្គាល់ រដ្ឋ19.2-0001 ប្រើប្រាស់ដោយ ក្រសួងបរិស្ថាន, លេខសម្គាល់ រដ្ឋ20.2-0001 ប្រើប្រាស់ដោយ ក្រសួងអភិវឌ្ឍន៍ជនបទ, លេខសម្គាល់ រដ្ឋ21.2-0001 ប្រើប្រាស់ដោយ ក្រសួងសង្គមកិច្ច អតីតយុទ្ធជន និងយុវនីតិសម្បទា, លេខសម្គាល់ រដ្ឋ222-0001 ប្រើប្រាស់ដោយ ក្រសួងប្រៃសណីយ៍ និង ទូរគមនាគមន៍, លេខសម្គាល់ រដ្ឋ23.2-0001 ប្រើប្រាស់ដោយ ក្រសួងធម្មការ និងសាសនា, លេខសម្គាល់ រដ្ឋ24.2-0001 ប្រើប្រាស់ដោយ ក្រសួងកិច្ចការនារី, លេខសម្គាល់ រដ្ឋ25.2-0001 ប្រើប្រាស់ដោយ ក្រសួងសាធារណការ និង ដឹកជញ្ជូន, លេខសម្គាល់ រដ្ឋ26.2-0001 ប្រើប្រាស់ដោយ ក្រសួងយុត្តិធម៌, លេខសម្គាល់ រដ្ឋ27.2-0001 ប្រើប្រាស់ដោយ ក្រសួងទេសចរណ៍, លេខសម្គាល់ រដ្ឋ28.2-0001 ប្រើប្រាស់ដោយ ក្រសួងរៀបចំដែនដី នគរូប នីយកម្ម និងសំណង់, លេខសម្គាល់ រដ្ឋ29.2-0001 ប្រើប្រាស់ដោយ ក្រសួងធនធានទឹក និងឧតុនិយម, លេខសម្គាល់ រដ្ឋ30.2-0001 ប្រើប្រាស់ដោយ ក្រសួងព្រះបរមរាជវាំង, លេខសម្គាល់ រដ្ឋ31.2-0001 ក្រសួងមុខងារសាធារណៈ, លេខសម្គាល់ រដ្ឋ32.2-0001 ប្រើប្រាស់ដោយ រដ្ឋលេខាធិការដ្ឋានអាកាសចរស៊ីវិល, លេខសម្គាល់ រដ្ឋ33.2-0001 ប្រើប្រាស់ដោយ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍, លេខសម្គាល់ រដ្ឋ34.2-0001 ប្រើប្រាស់ដោយ ក្រសួងការងារ និងបណ្តុះបណ្តាលវិជ្ជាជីវៈ, លេខសម្គាល់ រដ្ឋ35.2-0001 ប្រើប្រាស់ដោយ ធនាគារជាតិនៃកម្ពុជា និងលេខសម្គាល់ រដ្ឋ36.2-0001 សម្រាប់រថយន្តជាសម្បត្តិរដ្ឋ ដែលប្រើប្រាស់ដោយ អង្គការរបស់ជាតិ។

ក្រសួងសាធារណការ និងដឹកជញ្ជូន បានឱ្យដឹងបន្ថែមទៀតថា ផ្លាកលេខសម្គាល់យានជំនិះរបស់អគ្គលេខាធិការដ្ឋាន សាលារាជធានី ខេត្ត និងសហគ្រាសសាធារណៈ ដែលស្ថិតក្រោមឱវាទរបស់ក្រសួង ស្ថាប័នណាមួយ ត្រូវប្រើប្រាស់ប្រភេទលេខសម្គាល់យានជំនិះរបស់ក្រសួង ស្ថាប័ននោះ។

ទន្ទឹមនឹងនោះ សម្រាប់ការចុះបញ្ជីផ្តល់បណ្ណសម្គាល់ និងបំពាក់ផ្លាកលេខសម្គាល់យានជំនិះជាសម្បត្តិរដ្ឋ ត្រូវបង់កម្រៃ សេវាសាធារណៈតាមការកំណត់ក្នុងប្រកាសរួមរបស់រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងរដ្ឋមន្ត្រីក្រសួង សាធារណការ និងដឹកជញ្ជូន៕

The post ក្រសួងសាធារណការ និងដឹកជញ្ជូន ចេញសេចក្ដីប្រកាសលេខសម្គាល់យានជំនិះរដ្ឋតាមក្រសួងស្ថាប័នពាក់ព័ន្ធ appeared first on .

លោក ប៉េង ពោធិ៍នា ស្នើដូច្នេះ នៅក្នុងឱកាសចូលរួមកិច្ចប្រជុំក្រុមប្រឹក្សារដ្ឋមន្ត្រីដឹកជញ្ជូនលើកទី១៦ ក្នុងកិច្ចប្រជុំកំពូលឆ្នាំ២០២៤ នៃវេទិកាដឹកជញ្ជូនអន្តរជាតិ (ITF) នៅទីក្រុង ឡែបហ្សិក ប្រទេសអាល្លឺម៉ង់ កាលថ្ងៃទី២៣ ខែឧសភា ឆ្នាំ២០២៤។

នាឱកាសនោះ រដ្ឋមន្រ្តីដឹកជញ្ជួនកម្ពុជា បានលើកឡើងថា ថ្វីត្បិតតែការបញ្ចេញឧស្ម័នកាបូនិកក្នុងវិស័យដឹកជញ្ជូនរបស់កម្ពុជាមិនទាន់ដល់កម្រិតធ្ងន់ធ្ងរ តែរាជរដ្ឋាភិបាលកម្ពុជាមានការតាំងចិត្តខ្ពស់ ក្នុងការចូលរួមកាត់បន្ថយការបញ្ចេញឧស្ម័នកាបូនិកក្នុងវិស័យដឹកជញ្ជូន។

លោកថា ៖”រដ្ឋាភិបាលបានប្តេជ្ញាចិត្តខ្ពស់លើរឿងនេះ តាមរយៈការដាក់ចេញនូវយុទ្ធសាស្រ្តអភិវឌ្ឍន៍រយៈពេលវែង និងឯកសារផ្សេងៗទៀតដើម្បីសម្រេចគោលដៅអព្យាក្រិត្យកាបូននៅឆ្នាំ២០៥០  តាមរយៈការជំរុញការប្រើប្រាស់យានយន្តអគ្គិសនី សិក្សាគម្រោងដឹកជញ្ជូនសាធារណៈ ដែលនឹងរួមចំណែកក្នុងការកាត់បន្ថយប្រេងឥន្ទនៈ លើកកម្ពស់សុខភាពរស់នៅរបស់ប្រជាពលរដ្ឋ”។

បន្ថែមពីនេះ លោករដ្ឋមន្រ្តី ក៏បានសង្តត់ធ្ងន់ថា ជាមួយនឹងការតាំងចិត្តខ្ពស់ កម្ពុជា ក៏ត្រូវការកិច្ចសហប្រតិបត្តិការជាមួយបណ្តាប្រទេសនានា ពិសេសជាមួយប្រទេសជាសមាជិក ITF ខណៈលោកក៏បានស្នើដល់បណ្តាប្រទេសជាសមាជិក ដៃគូអភិវឌ្ឍន៍ អង្គការអន្តរជាតិ ជួយគាំទ្រដល់កម្ពុជាក្នុងការបំពេញបេសកកម្មដ៏មានសារៈសំខាន់មួយនេះផងដែរ។

គូរបញ្ជាក់ថា កិច្ចប្រជុំក្រុមប្រឹក្សារដ្ឋមន្ត្រីដឹកជញ្ជូន គឺជាកិច្ចប្រជុំដ៏សំខាន់ នៃវេទិកាដឹកជញ្ជូនអន្តរជាតិដែលប្រព្រឹត្តទៅមួយឆ្នាំម្តង ដើម្បីពិនិត្យទៅលើការវិវត្តិនៃវិស័យដឹកជញ្ជូននៅក្នុងសាកលលោក។ កិច្ចប្រជុំឆ្នាំ២០២៤ នេះ បានប្រព្រឹត្តទៅក្រោមប្រធានបទ  ការដឹកជញ្ជូនបៃតង   និងមានរបៀបវារៈ ចំនួន ៥៖ ១. ពិនិត្យវឌ្ឍនភាពការងាររបស់ ITF ដែលបានអនុវត្តនាឆ្នាំកន្លងមក, ២. រៀបចំ និងអនុម័តផែនការសកម្មភាពសម្រាប់អនុវត្តបន្ត, ៣. កំណត់ទិសដៅ និងយុទ្ធសាស្រ្តក្នុងកែលម្អវិស័យដឹកជញ្ជូន និងគំនិតផ្តួចផ្តើមថ្មីៗសំដៅកែលម្អបម្លាស់ទី (Mobility) , ៤.កៀរគរការគាំទ្រពីសំណាក់ដៃគូអភិវឌ្ឍន៍, អង្គការអន្តរជាតិ និងវិស័យឯកជន និង ៥.អនុម័តសមាជិកភាពថ្មី របស់ ITF។

អង្គប្រជុំនេះដែរ ក៏បានផ្តោតការពិភាក្សាលើការរួមចំណែករបស់វិស័យដឹកជញ្ជូនក្នុងការរក្សានិរន្តរភាពបរិសា្ថន និងផលប៉ះពាល់លើអាកាសធាតុ សុខភាព និងភូមិសាស្រ្តនយោបាយ។ ជាការកត់សម្គាល់ ប្រទេសជាសមាជិកទាំងអស់ទទួលស្គាល់ថាសុវត្ថិភាពចរាចរណ៍គីជាប្រធានបទដ៏សំខាន់ ហើយរដ្ឋាភិបាលនៃប្រទេសទាំងអស់កំពុងបន្តរួមគ្នាធ្វើយ៉ាងណាកាត់បន្ថយអត្រាគ្រោះថា្នក់ចរាចរណ៍នៅក្នុងប្រទេសឱ្យបានជាអតិបរមា៕ អត្ថបទ៖ រង្សី

The post កម្ពុជា ស្នើបណ្តារប្រទេសនានា គាំទ្របេសកកម្មកាត់បន្ថយការបញ្ចេញឧស្ម័នកាបូនិកក្នុងវិស័យដឹកជញ្ជូន appeared first on .