ក្រសួងសាធារណការ

ផ្លូវជាតិលេខ៤៨ តម្លៃជាង ៦៥ លានដុល្លារ សាងសង់បានជាង ៣៥% គិតត្រឹមចុងខែសីហា

កូនចៅឧកញ៉ា — Fri, 01 Sep 2023 08:28:00 +0000

ការដ្ឋានស្ថាបនាផ្លូវខេត្តលេខ១៤៨ ប្រវែងជាង ១៨គីឡូម៉ែត្រ ចាប់ពីរង្វង់មូលស្ទឹងហាវដល់កំពង់ផែស្វយ័តក្រុងព្រះសីហនុ សាងសង់សម្រេចបាន ៤០,៨៩% ហើយ។ នេះបើតាមដំណើរចុះពិនិត្យដោយគណ:ប្រតិភូអន្តរក្រសួង និងភាគីពាក់ព័ន្ធ ក្នុងកិច្ចពិនិត្យការដ្ឋានកាលថ្ងៃទី៣១ ខែសីហា។

លោក សូរ វ៉ិចទ័រ រដ្ឋលេខាធិការ ក្រសួងសាធារណការ និងដឹកជញ្ជូន បានឱ្យដឹងថា សកម្មភាពចុះពិនិត្យ គឺដើម្បីធ្វើការតាមដានការសាងសង់ ដើម្បីធានាថា ក្រុមហ៊ុនអនុវត្តបានត្រឹមត្រូវតាមបទដ្ឋានបច្ចេកទេសដែលបានកំណត់ សំដៅឱ្យខ្សែផ្លូវមានគុណភាព អាចប្រើប្រាស់បានយូរអង្វែង។

បើតាមក្រសួងសារធារណៈការ បានឱ្យដឹងថា គិតត្រឹមថ្ងៃទី៣១ ខែសីហា នេះ ផ្លូវជាតិលេខ៤៨ សម្រេចការសាងសង់បាន ជាង៣៥% ហើយ។ តួលេខនេះបង្ហាញឱ្យឃើញថា គម្រោងកំពុងមានវឌ្ឍនភាព បើទោះជាមានភាពយឺតយ៉ាវជាងផែនការបន្តិចក៏ដោយ។ ភាពយឺតយ៉ាវនេះបណ្តាលមកពីកត្តាភូមិសាស្រ្ត កត្តាអាកាសធាតុ បញ្ហាកូវីដ១៩ និងការប្រែប្រួលបន្ថែមទំហំការងារមួយចំនួន។ ជាការឆ្លើយតប ទៅលើភាពយឺតយ៉ាវ ក្រុមហ៊ុនអនុវត្តការសាងសង់បានស្នើសុំពន្យាពេលចំនួន ១០ខែ ដោយគ្រោងបញ្ចប់នៅខែមេសា ឆ្នាំ២០២៥ខាងមុខ។

នាឱកាសនោះ លោករដ្ឋលេខាធិការ ក្រសួងសារធារណៈ ក៏បានក្រើនរលឹកដល់ក្រុមហ៊ុនសាងសង់ និងក្រុមហ៊ុនទីប្រឹក្សាបច្ចេកទេស ត្រូវអនុវត្តការងារសាងសង់គម្រោងឱ្យបានចប់រួចរាល់ តាមផែនការដែលបានស្នើសុំ។

គួរបញ្ជាក់ថា ផ្លូវជាតិលេខ៤៨ មានប្រវែងសរុប ១៤៨គីឡូម៉ែត្រ ចាប់ផ្តើមពីចំណុចប្រសព្វជាមួយផ្លូវជាតិលេខ៤ ត្រង់ស្រុកស្រែអំបិល រហូតដល់ក្រុងខេមរភូមិន្ទ ខេត្តកោះកុង។ គម្រោងត្រូវបានបើកការដ្ឋានសាងសង់ជាផ្លូវការហើយ នៅថ្ងៃទី៣ ខែមករា ឆ្នាំ២០២២ នេះ។

ផ្លូវនេះ សាងសង់ដោយក្រុមហ៊ុនកូរ៉េ ILSUNG & HANIL Joint Venture និងត្រួតពិនិត្យបច្ចេកទេសដោយក្រុមហ៊ុន KCI & KECC Joint Venture គ្រោងចំណាយ ថវិកាសរុបប្រមាណ ៦៥.១៤លានដុល្លារ ក្រោមឥណទានសម្បទានពីរដ្ឋាភិបាលសាធារណរដ្ឋកូរ៉េ៕ អត្ថបទ៖ពិសី

The post ផ្លូវជាតិលេខ៤៨ តម្លៃជាង ៦៥ លានដុល្លារ សាងសង់បានជាង ៣៥% គិតត្រឹមចុងខែសីហា appeared first on .

រដ្ឋមន្ត្រី ស៊ុន ចាន់ថុល សម្ពោធគម្រោងមួយ គាំទ្រដល់មនុស្សថ្លង់ និងប្រយុទ្ធប្រឆាំងអំពើជួញដូរមនុស្ស

កូនចៅឧកញ៉ា — Mon, 20 Jan 2020 04:49:39 +0000

ភ្នំពេញ ៖ ឯកឧត្តមទេសរដ្ឋមន្ដ្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានអញ្ជើញជាអធិបតីក្នុងពិធីសម្ពោធជាផ្លូវការគម្រោង Grab for Good គាំទ្រដល់មនុស្សថ្លង់ និងប្រយុទ្ធប្រឆាំងអំពើជួញដូរមនុស្ស នាពេលថ្មីៗនេះ។

ឯកឧត្តមទេសរដ្ឋមន្ដ្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន មានប្រសាសន៍ថា គម្រោងនេះមានគោលបំណង ជំរុញលើកទឹកចិត្ត និងផ្តល់ឱកាសដល់បងប្អូនថ្លង់ មានបញ្ហាក្នុងការស្តាប់ និងពិការភាព អាចទទួលបាននូវឱកាសការងារ ក្នុងការរកប្រាក់ចំណូលផ្គត់ផ្គង់ជីវភាព និងការលើកកម្ពស់បងប្អូនមានពិការភាព ពីសំណាក់រាជរដ្ឋាភិបាល ក្រុមហ៊ុនឯកជន ក៏ដូចជាភាគីពាក់ព័ន្ធ។

ឯកឧត្តមទេសរដ្ឋមន្ត្រី បន្តថា គម្រោងនេះគឺជាគម្រោងដ៏សំខាន់មួយ ដែលនឹងផ្តល់ផលល្អសម្រាប់សង្គមកម្ពុជា និងជាគម្រោងដំបូងគេបង្អស់នៅកម្ពុជា ដែលអាចចូលរួមចំណែកជាមួយរាជរដ្ឋាភិបាល ក្នុងនាមភាពជាដៃគូក្នុងការបង្កើនឱកាសសម្រាប់ជនពិការ និងការប្រយុទ្ធប្រឆាំងអំពើជួញដូរមនុស្សនៅកម្ពុជា។

ឯកឧត្តម បន្ថែមទៀតថា តាមរយៈកិច្ចខិតខំប្រឹងប្រែងរបស់រាជរដ្ឋាភិបាល ជាមួយនឹងការចូលរួមពីដៃគូ និងក្រុមហ៊ុននានា ជាពិសេសក្រុមហ៊ុន បានបង្កើតឱកាសរកចំណូល និងការងារធ្វើជូនមនុស្សថ្លង់ និងអ្នកមានបញ្ហាក្នុងការស្តាប់នៅកម្ពុជា ដែលពួកគាត់តែងជួបប្រទះកង្វះខាតជម្រើសនៃការធ្វើទំនាក់ទំនងមិនមែនតាមរយៈពាក្យសម្តី ដែលជាឧបសគ្គសម្រាប់ពួកគាត់ក្នុងក្នុងការស្វែងរកឱកាសការងារធ្វើ។

ឯកឧត្ដម បានបញ្ជាក់ផងដែរថា ក្រសួងមានភាពជាដៃគូដ៏រឹងមាំជាមួយក្រុមហ៊ុន Grab តាមរយៈគម្រោង SUMAI របស់កម្មវិធីអភិវឌ្ឍន៍អង្គការសហប្រជាជាតិ (UNDP) ជាសហដៃគូ ក្នុងការជួយឧបត្ថម្ភដល់សកម្មភាពសុវត្ថិភាពចរាចរណ៍នៅកម្ពុជា តាមរយៈការឧបត្ថម្ភមួកសុវត្ថិភាព និងឧបករណ៍ចំណាំងផ្លាត សម្រាប់យុទ្ធនាការសុវត្ថិភាពចរាចរណ៍នៅក្នុងព្រឹត្តិការណ៍នានា នៅតាមបណ្តោយផ្លូវជាតិក្នុងទីក្រុង និងការបណ្តុះបណ្តាលអំពីច្បាប់ចរាចរណ៍ផ្លូវគោក ដល់អ្នកបើកបរម៉ូតូកង់បីផងដែរ។

លើសពីនេះទៀត ក្រសួងកំពុងសហការយ៉ាងជិតស្និទ្ធជាមួយក្រុមហ៊ុន Grabទាក់ទងនឹងការចែករំលែកទិន្នន័យ (Data Sharing) ការរៀបចំសេចក្តីព្រាងគោលនយោបាយជាតិស្តីពីការដឹកជញ្ជូន ការអភិវឌ្ឍមុខងារកម្មវិធីថែទាំផ្លូវ (ROAD CARE Mobile App) ដែលអាចរាយការណ៍អំពីគ្រោះថ្នាក់ចរាចរណ៍នៅតាមដងផ្លូវ និងការបង្កើនចំនួនការប្រើប្រាស់យានយន្តមិនសូវបញ្ចេញផ្សែងពុល (Cleaner Vehicle) នៅក្នុងទីក្រុងភ្នំពេញ ព្រមជាមួយនឹងការពិនិត្យលទ្ធភាពក្នុងការចេញបណ្ណបើកបរជូនជនពិការ ដើម្បីធ្វើឱ្យពួកគាត់អាចទទួលបាននូវភាពស្របច្បាប់ក្នុងការបើកបរផងដែរ៕

The post រដ្ឋមន្ត្រី ស៊ុន ចាន់ថុល សម្ពោធគម្រោងមួយ គាំទ្រដល់មនុស្សថ្លង់ និងប្រយុទ្ធប្រឆាំងអំពើជួញដូរមនុស្ស appeared first on .