អាជ្ញាធរហូជីមិញគ្រោងចាយលុយជាង ៤០០លានដុល្លារ កាត់បន្ថយភាពក្រីក្រក្នុងតំបន់

ឧកញ៉ាសំពៅ — Fri, 14 Apr 2023 00:17:00 +0000

កាលពីពេលថ្មីៗនេះ អាជ្ញាធរទីក្រុងហូជីមិញ ហៅកាត់ HCMC បានបញ្ចេញគម្រោងការធំមួយគឺ ចាយលុយប្រមាណ ១០,២ ទ្រីលានដុង ឬប្រហែល ៤៣៥លានដុល្លារ ដើម្បីកាត់បន្ថយភាពក្រីក្រនៅក្នុងឆ្នាំនេះ។

យោងតាមការចុះផ្សាយពី VNEXPRESS បានបង្ហាញថា អាជ្ញាធរក្រុងហូជីមិញនឹងនឹងផ្តល់ជូននូវកញ្ចប់ឥណទានដែលមានតម្លៃប្រហែល ១,៧ ទ្រីលានដុង (៧២,២ លានដុល្លារអាមេរិក) ក្នុងអត្រាការប្រាក់អនុគ្រោះ ជិត ៤២០ពាន់លានដុង (១៧,៨ លានដុល្លារ) ជាជំនួយឥតសំណង និង ១៦ពាន់លានដុង (៦៧៩ ២០០ដុល្លារ) នៅក្នុងកម្មវិធីកាត់បន្ថយភាពក្រីក្រ ប្រកបដោយនិរន្តរភាពនៅគ្រប់កម្រិតទាំងអស់។

ដោយឡែក Le Van Thinh អនុប្រធានអចិន្ត្រៃយ៍នៃគណៈកម្មាធិការដឹកនាំទីក្រុងសម្រាប់កម្មវិធីកាត់បន្ថយភាពក្រីក្រដោយចីរភាពបានបង្ហើបថា ទីក្រុងមានគោលបំណងកាត់បន្ថយចំនួនគ្រួសារក្រីក្រចំនួន ០,៣៨% និងចំនួនគ្រួសារជិតក្រីក្រចំនួន ០,២៨% និងបង្កើនប្រាក់ចំណូលជាមធ្យមសម្រាប់មនុស្សម្នាក់ៗរបស់ប្រជាជនក្រីក្រ។

គួររំលឹកដែរថា ស្តង់ដារភាពក្រីក្រនៃទីក្រុងហូជីមិញចន្លោះឆ្នាំ ២០២១-២០២៥ កំណត់ដោយគ្រួសារក្រីក្រជាមធ្យមមានចំនូលទាបជាង ៣៦លានដុង ឬ ១ ៥៣០ដុល្លារសម្រាប់មនុស្សម្នាក់ក្នុងរយៈពេលមួយឆ្នាំ ខណៈគ្រួសារជិតក្រីក្រត្រូវមានចំណូលចន្លោះពី ៣៦លានដុង ដល់ ៤៦លានដុង (១ ៩៥០ដុល្លារ)។

សូមជម្រាបដែរថា គិតត្រឹមដំណាច់ឆ្នាំកន្លងទៅ ទីក្រុងទាំងមូលមានគ្រួសារក្រីក្រជាង ២១ ៣០០ គ្រួសារ និងគ្រួសារជិតក្រីក្រចំនួន ១៨ ០៦៨ ដែលស្មើនឹង ០,៨៤% និង ០,៧១% នៃគ្រួសារសរុបរបស់ទីក្រុង៕

The post អាជ្ញាធរហូជីមិញគ្រោងចាយលុយជាង ៤០០លានដុល្លារ កាត់បន្ថយភាពក្រីក្រក្នុងតំបន់ appeared first on .

រដ្ឋាភិបាលទីក្រុងហូជីមិញ បញ្ជូនរថយន្តដឹកប្រេង ៨០ ទៅផ្គត់ផ្គង់តាមស្ថានីយ៍ ក្រោយពលរដ្ឋត្អូញត្អែរ

ឧកញ៉ាសាមញ្ញ — Mon, 10 Oct 2022 09:55:00 +0000

ថ្មីៗនេះ រដ្ឋាភិបាលទីក្រុងហូជីមិញ បានបញ្ជូនរថយន្តដឹកប្រេងចំនួន ៨០ គ្រឿង ដើម្បីទៅធ្វើការផ្គត់ផ្គង់តាមស្ថានីយ៍ប្រេងឥន្ធន:នៅទូទាំងក្រុង ចំពេលមានការត្អូញត្អែរអំពីការដាច់ស្តុក ។

អគ្គនាយករងនៃនាយកដ្ឋានឧស្សាហកម្ម និងពាណិជ្ជកម្មទីក្រុង លោកស្រី Nguyen Thi Kim Ngoc បាននិយាយថា រថយន្តដឹកប្រេង ដែលជាកម្មសិទ្ធិរបស់ក្រុមហ៊ុន Petrolimex HCMC បានចាប់ផ្តើមបញ្ជូនចេញទៅចែកចាយប្រេងនៅតាមស្ថានីយ៍ប្រេងឥន្ធន:ផ្សេងៗរបស់ក្រុមហ៊ុន ។

មិនតែប៉ុណ្ណោះ លោកស្រី Nguyen បាននិយាយទៀតថា នាយកដ្ឋានក៏នឹងជំរុញឱ្យក្រុមហ៊ុនផ្គង់ផ្គង់ប្រេងផ្សេងទៀត បង្កើនការដឹកជញ្ជូនប្រេងរបស់ពួកគេ ទៅកាន់អ្នកលក់រាយផងដែរ ដើម្បីបំពេញតម្រូវការពលរដ្ឋ ។

គួរឱ្យដឹងថា យ៉ាងហោចណាស់ ស្ថានីយ៍ប្រេងឥន្ធនៈចំនួន ៥៤ នៅក្នុងទីក្រុង បានរាយការណ៍អំពីការអស់ទាំងប្រេងសាំង និងម៉ាស៊ូត គិតត្រឹមថ្ងៃអាទិត្យ ហើយសាធារណជនមិនសប្បាយចិត្តចំពោះបញ្ហានេះឡើយ ។

កង្វះខាតប្រេងឥន្ធនៈ បានក្លាយជាការឈឺក្បាលដដែលៗ សម្រាប់អាជ្ញាធរ ក្នុងពេលប៉ុន្មានសប្តាហ៍ថ្មីៗនេះ ខណ:អ្នកលក់រាយនិយាយថាតម្លៃលក់រាយ ដែលត្រូវបានកំណត់ដោយរដ្ឋាភិបាល គឺបានបង្ខំឱ្យពួកគេលក់ទាំងខាតបង់។

អ្នកលក់រាយនៅក្នុងទីក្រុងហូជីមិញ និយាយថា ពួកគេបានខាតបង់ពី ១០០ ទៅ ៣០០ លានដុង (៤ ១៦៦-១២ ៥០០ ដុល្លារ) សម្រាប់ស្ថានីយ៍ប្រេងឥន្ធនៈតូចៗ និង ៥០០ លានដុង សម្រាប់ស្ថានីយ៍ប្រេងឥន្ធនៈធំ ដោយសារតែកម្រៃជើងសារទាប ហើយពួកគេប្រហែលជាអាចត្រូវបិទទ្វារផងដែរ ប្រសិនបើអ្វីៗនៅតែមិនប្រសើរឡើងក្នុងសប្តាហ៍នេះ ៕

The post រដ្ឋាភិបាលទីក្រុងហូជីមិញ បញ្ជូនរថយន្តដឹកប្រេង ៨០ ទៅផ្គត់ផ្គង់តាមស្ថានីយ៍ ក្រោយពលរដ្ឋត្អូញត្អែរ appeared first on .