ក្រុមហ៊ុនទ្រីភាពគ្រុប

ក្រុមហ៊ុនខ្នាតយក្ស៥ បរិច្ចាគច្រើនជាងគេ ក្នុងមូលនិធិកសាងហេដ្ឋារចនាសម្ព័ន្ធតាមព្រំដែន

monyokn — Wed, 28 Aug 2024 03:15:56 +0000

ក្រោយពីមានការប្រកាសរបស់ខុទ្ទកាល័យនាយករដ្ឋមន្ត្រី ស្តីពីការបង្កើត «មូលនិធិកសាងហេដ្ឋារចនាសម្ព័ន្ធតាមព្រំដែន» គិតនៅត្រឹមថ្ងៃទី២៧ ខែសីហា ឆ្នាំ២០២៤ គេសង្កេតឃើញមានការចូលរួមបរិច្ចាគយ៉ាងច្រើនហូរហែរពីសំណាក់ប្រជាពលរដ្ឋខ្មែរទាំងក្នុងនិងក្រៅប្រទេស លោកអ្នកឧកញ៉ា អ្នកឧកញ៉ា ឧកញ៉ា សិល្បករសិល្បការនី ព្រមទាំងបណ្តាក្រុមហ៊ុនតូចធំជាច្រើន។

ជាការគួរឲ្យកត់សំគាល់ មានក្រុមហ៊ុនចំនួន ៥ ធំៗ បានបរិច្ចាគច្រើនជាងគេនៅក្នុង «មូលនិធិកសាងហេដ្ឋារចនាសម្ព័ន្ធតាមព្រំដែន» តួយ៉ាង ក្រុមហ៊ុន ទ្រីភាព គ្រុប របស់លោកអ្នកឧកញ៉ា ទ្រី ភាព បានចូលរួមបរិច្ចាគថវិការចំនួន ១លាន២សែនដុល្លារ, ក្រុមហ៊ុន រ៉ូយ៉ាល់ គ្រុប របស់អ្នកឧកញ៉ា គិត ម៉េង បានចូលរួមបរិច្ចាគចំនួន ១លានដុល្លារ, ក្រុមហ៊ុន ជីប ម៉ុង គ្រុប បានចូលរួមបរិច្ចាគចំនួន ១លានដុល្លារ, ក្រុមហ៊ុន OCIC របស់លោកអ្នកឧកញ៉ា ពុង ឃាវសែ បានចូលរួមបរិច្ចាគចំនួន ១លានដុល្លារ និងក្រុមហ៊ុន LYP Group របស់លោកអ្នកឧកញ៉ា លី យ៉ុងផាត់ បានចូលរួមបរិច្ចាគចំនួន ១លានដុល្លារផងដែរ៕

The post ក្រុមហ៊ុនខ្នាតយក្ស៥ បរិច្ចាគច្រើនជាងគេ ក្នុងមូលនិធិកសាងហេដ្ឋារចនាសម្ព័ន្ធតាមព្រំដែន appeared first on .

ក្រុមហ៊ុនខ្នាតយក្ស ៥ បរិច្ចាគច្រើនជាងគេ ក្នុងមូលនិធិកសាងហេដ្ឋារចនាសម្ព័ន្ធតាមព្រំដែន

ឧកញ៉ាដែនដី — Tue, 27 Aug 2024 08:32:03 +0000

សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា កាលពីថ្ងៃទី២២ ខែសីហា ឆ្នាំ២០២៤ កន្លងទៅ បានប្រកាសបង្កើតនូវ «មូលនិធិកសាងហេដ្ឋារចនាសម្ព័ន្ធតាមព្រំដែន» ក្នុងគោលបំណងកៀរគរនូវថវិកាបន្ថែម សម្រាប់ការកសាងហេដ្ឋារចនាសម្ព័ន្ធនានា តាមបណ្តោយព្រំដែន ព្រមទាំងដើម្បីផ្តល់ឱកាសឱ្យប្រជាពលរដ្ឋខ្មែរគ្រប់មជ្ឈដ្ឋានក្នុងនិងក្រៅប្រទេស បានរួមចំណែកដោយផ្ទាល់ជាមួយរាជរដ្ឋាភិបាល ក្នុងបុព្វហេតុរួមគ្នាកសាង និងការពារមាតុភូមិ។

បន្ទាប់ពីការប្រកាសបង្កើតមូលនិធិខាងលើនេះឡើង មានសប្បុរសជនពីគ្រប់មជ្ឈដ្ឋានបានបរិច្ចាគថវិកាជាហូរហែរ រួមមានទាំង ប្រជាពលរដ្ឋខ្មែរទាំងក្នុងនិងក្រៅប្រទេស មន្ត្រីរាជការ កងកម្លាំងប្រដាប់អាវុធ ថ្នាក់ដឹកនាំតាមក្រសួង ស្ថាប័ន ព្រមទាំង លោកអ្នកឧកញ៉ា អ្នកឧកញ៉ា និងឧកញ៉ាៗ វិស័យឯកជនជាច្រើនផងដែរ។ ជាមួយគ្នានេះ គិតនៅត្រឹមថ្ងៃទី២៧ ខែសីហា ឆ្នាំ២០២៤ គេឃើញមានក្រុមហ៊ុនយក្សធំៗចំនួន ៥ ដែលមានស្ថាបនិកសុទ្ធសឹងតែជាជនជាតិខ្មែរ បានចូលរួមបរិច្ចាគថវិកាច្រើនជាងគេ រួមមាន៖

១. ក្រុមហ៊ុន ជីប ម៉ុង គ្រុប ដែលមាន លោកអ្នកឧកញ៉ា ភាព ហៀក លោកអ្នកឧកញ៉ា លាង ឃុន និងអ្នកឧកញ៉ា លាង ម៉េង ជាសហស្ថាបនិក បានបរិច្ចាគចំនួន ១លានដុល្លារអាមេរិក

២. ក្រុមហ៊ុន រ៉ូយ៉ាល់ គ្រុប ដែលមាន អ្នកឧកញ៉ា គិត ម៉េង ជាប្រធានក្រុមប្រឹក្សាភិបាល និងលោកជំទាវអ្នកឧកញ៉ា ម៉ៅ ចំណាន ជាអនុប្រធានក្រុមប្រឹក្សាភិបាល បានបរិច្ចាគចំនួន ១លានដុល្លារអាមេរិក

៣. ក្រុមហ៊ុន ទ្រីភាព គ្រុប ដែលមាន លោកអ្នកឧកញ៉ា ទ្រី ភាព ជាអគ្គនាយកក្រុមហ៊ុន និងអ្នកឧកញ៉ា គៀន ស្រីនាង បានចូលរួមបរិច្ចាគចំនួន ១លាន២សែនដុល្លារអាមេរិក

៤. ក្រុមហ៊ុន អិលវ៉ាយភី គ្រុប ដែលមាន លោកអ្នកឧកញ៉ា លី យ៉ុងផាត់ ជាប្រធានក្រុមប្រឹក្សាភិបាល និងលោកជំទាវអ្នកឧកញ៉ា គីម ហ៊ាង បានចូលរួមបរិច្ចាគចំនួន ១លានដុល្លារអាមេរិក

៥. ក្រុមហ៊ុន អូស៊ីអាយស៊ី (OCIC) ដែលមាន លោកអ្នកឧកញ៉ា ពុង ឃាវសែ ជាប្រធានក្រុមប្រឹក្សាភិបាល បានចូលរួមបរិច្ចាគចំនួន ១លានដុល្លារអាមេរិក

ទោះយ៉ាងណា គេរំពឹងថានឹងមានក្រុមហ៊ុនធំៗជាបន្តបន្ទាប់ទៀត នឹងចូលរួមបរិច្ចាគថវិកាក្នុង “មូលនិធិកសាងហេដ្ឋារចនាសម្ព័ន្ធតាមព្រំដែន” ដើម្បីចូលរួមក្នុងការជំរុញការអភិវឌ្ឍនៅតាមតំបន់ព្រំដែន ឱ្យបានកាន់តែរឹងមាំ និងប្រកបដោយចីរភាព។

សម្រាប់លោកអ្នកចង់ចូលរួមតាមរយៈសាច់ប្រាក់ គឺអាចចូលរួមតាម លោក សេង ទៀង នាយករងខុទ្ទកាល័យ សម្តេចធិបតីនាយករដ្ឋមន្ត្រី ទូរស័ព្ទលេខ 012 961 971តាមរយៈទីតាំងនៅទីស្តីការគណៈរដ្ឋមន្ត្រី “អគារជាប់ផ្លូវកម្ពុជាក្រោម បន្ទប់លេខ ២០៦ ជាន់ទី២” ឬអាចបរិច្ចាគតាមរយៈគណនីធនាគារឈ្មោះ៖ «Foundation for Border Infrastructure Development»៕

The post ក្រុមហ៊ុនខ្នាតយក្ស ៥ បរិច្ចាគច្រើនជាងគេ ក្នុងមូលនិធិកសាងហេដ្ឋារចនាសម្ព័ន្ធតាមព្រំដែន appeared first on .

លោកអ្នកឧកញ៉ា ទ្រី ភាព ចុះពិនិត្យការដ្ឋានកំពង់ផែកំពត និងចែកថវិកាដល់បុគ្គលិក ៣០០នាក់

ឧកញ៉ាដែនដី — Fri, 07 Jun 2024 02:05:46 +0000

កាលព្រឹកថ្ងៃទី៦ ខែមិថុនា ឆ្នាំ២០២៤ លោកអ្នកឧកញ៉ា ទ្រី ភាព អគ្គនាយកក្រុមហ៊ុន ទ្រីភាព គ្រុប បានចុះពិនិត្យការដ្ឋានសាងសង់កំពង់ផែកំពត ព្រមទាំងបានចែកថវិកាដល់បុគ្គលិក-កម្មករប្រមាណជា ៣០០នាក់ ដែលកំពុងបម្រើការនៅក្នុងការដ្ឋាននេះផងដែរ ដោយក្នុងម្នាក់ៗទទួលបានថវិកាចំនួន ១០ម៉ឺនរៀល។

តាមការបង្ហាញឱ្យដឹងពីក្រុមហ៊ុន ទ្រីភាព គ្រុប កំពង់ផែកំពត របស់លោកអ្នកឧកញ៉ា ទ្រី ភាព កំពុងតែមានវឌ្ឍនភាពលើការសាងសង់ជាវិជ្ជមាន ខណៈដែលអគាររដ្ឋបាល និងហេដ្ឋារចនាសម្ព័ន្ធមួយចំនួនធំ ត្រូវបានសាងសង់រួចរាល់ជាបណ្តើរៗ ហើយអាចឈានទៅដល់ការសម្ពោធដាក់ឱ្យប្រើប្រាស់ ក្នុងពេលឆាប់ៗខាងមុខនេះ។

គួររំឭកថា ក្រុមហ៊ុន ទ្រីភាព គ្រុប បានចុះកិច្ចព្រមព្រៀងក្របខណ្ឌសហប្រតិបត្តិការស្ដីពីកំពង់ផែកំពត ជាមួយក្រុមហ៊ុនចិន Guangxi Beibu Gulf International កាលថ្ងៃទី២៤ ខែមេសា ឆ្នាំ២០១៨។ នៅក្នុងដំណាក់កាលដំបូង ក្រុមហ៊ុនទាំងពីរ បានសម្រេចសាងសង់កំពង់ផែទឹកជ្រៅមួយ ដែលអាចឱ្យនាវាធំផ្ទុកទំនិញពី ១ម៉ឺនតោន ទៅ៣ម៉ឺនតោនចូលចត ផ្ទេរ និងផ្ទុកទំនិញបាន។ ក្រុមហ៊ុនទាំងពីររំពឹងថាគម្រោងនេះនឹងផ្ដល់ឱកាសការងារប្រមាណជាង ៥០០កន្លែង។

សូមជម្រាបថា ខេត្តកំពត មានកំពង់ផែសំខាន់ៗចំនួន៥ រួមមានកំពង់ផែពហុបំណងកំពត របស់អ្នកឧកញ៉ា វិញហួរ ដែលទើបសម្ពោធ កាលពីថ្ងៃទី៦ ខែមិថុនា ឆ្នាំ២០២៤ ម្សិលមិញនេះ មានជម្រៅទឹករហូតដល់១៣ម៉ែត្រ អាចសម្រាប់ដឹកជញ្ជូនទំនិញតាមកប៉ាល់ធំៗ។ ទី២ កំពង់ផែកំពត របស់លោកអ្នកឧកញ៉ា ទ្រី ភាព សម្រាប់ដឹកជញ្ជូនប្រេងចូល។ ទី៣ កំពង់ផែរបស់ជំទាវ កែវ ម៉ាលី សម្រាប់ដឹកជញ្ជូននាំចេញស្រូវ និងផលិតផលផ្សេងៗ។ ទី៤ កំពង់ផែទេសចរណ៍អន្តរជាតិខេត្តកំពត និងទី៥ កំពង់ផែពហុបំណងកម្រិតអន្តរជាតិ កំពត ឡូជីស្ទិក អេន ផត (Kampot Logistics and Port) តម្លៃប្រមាណ ១៥០០ លានដុល្លារ៕

The post លោកអ្នកឧកញ៉ា ទ្រី ភាព ចុះពិនិត្យការដ្ឋានកំពង់ផែកំពត និងចែកថវិកាដល់បុគ្គលិក ៣០០នាក់ appeared first on .

អ្នកឧកញ៉ា ទ្រី ភាព ផ្តល់អគារព្យាបាលមួយខ្នងតម្លៃ ៧ម៉ឺនដុល្លារ នៅតំបន់ដាច់ស្រយាលមួយ

ឧកញ៉ាដែនដី — Mon, 21 Nov 2022 01:20:00 +0000

អ្នកឧកញ៉ា ទ្រី ភាព អគ្គនាយកក្រុមហ៊ុន ទ្រីភាពគ្រុប និងភរិយារបស់លោក គឺលោកស្រីអ្នកឧកញ៉ា គៀន ស្រីនាង បានផ្ដល់អគារសម្រាកព្យាបាលជំងឺមួយខ្នង និងបន្ទប់ទឹកមួយខ្នង សម្រាប់មណ្ឌលសុខភាព ហ៊ុន សែន ថ្មដា ស្ថិតនៅឃុំថ្មដា ស្រុកវាលវែង ខេត្តពោធិ៍សាត់។

អគារសម្រាកព្យាបាលជំងឺនេះ គ្រោងនឹងចំណាយថវិកាអស់ជាង ៧ម៉ឺនដុល្លារសហរដ្ឋអាមេរិក មានទំហំ ២១ម៉ែត្រ គុណនឹង ១៥.៥ម៉ែត្រ ស្មើនឹង ៩បន្ទប់។ ក្នុងនោះមានបន្ទប់សម្រាកព្យាបាលជំងឺ៨បន្ទប់ ដែលអាចដាក់គ្រែបាន ២៤គ្រែ បន្ទប់សម្រាប់ក្រុមគ្រូពេទ្យ ១បន្ទប់ និងបន្ទប់រង់ចាំ ១បន្ទប់ ព្រមទាំងបន្ទប់ទឹក ១ខ្នង ស្មើនឹង ៦បន្ទប់។

យ៉ាងណាមិញ នៅថ្ងៃទី២០ ខែវិច្ឆិកា ឆ្នាំ២០២២ អ្នកឧកញ៉ា ទ្រី ភាព បានចាត់ដល់ក្រុមការងារក្រុមហ៊ុនរបស់លោក ទៅសិក្សាអំពីទីតាំងផ្ទាល់ដើម្បីបើកដំណើរការសាងសង់រួចហើយ ក្នុងនោះក៏មានការអញ្ជើញចូលរួមពីអាជ្ញាធរមូលដ្ឋាននៃស្រុកវាលវែង លោកគ្រូ អ្នកគ្រូពេទ្យ ព្រមទាំងលោកប្រធានមន្ទីរសុខាភិបាលខេត្តពោធិ៍សាត់ផងដែរ។

លោកប្រធានមន្ទីរសុខាភិបាលខេត្តពោធិ៍សាត់ បានថ្លែងអំណរគុណដល់អ្នកឧកញ៉ា ទ្រី ភាព និងភរិយា ដែលបានផ្តល់អគារដ៏មានសារសំខាន់ សម្រាប់ជួយដល់ប្រជាជននៅតំបន់ដាច់ស្រយាលមួយនេះ ខណៈដែលមណ្ឌលសុខភាព ហ៊ុន សែន ថ្មដា មានទីតាំងនៅជិតព្រំដែនថ្មដា ជាប់ប្រទេសថៃ និងមានចម្ងាយឆ្ងាយពីទីប្រជុំជន៕

The post អ្នកឧកញ៉ា ទ្រី ភាព ផ្តល់អគារព្យាបាលមួយខ្នងតម្លៃ ៧ម៉ឺនដុល្លារ នៅតំបន់ដាច់ស្រយាលមួយ appeared first on .