ក្លិបហ្គាឡាក់ស៊ី ណាវ៉ាត្រា អេភូថងគុនខ្មែរ ដាក់ឱ្យដំណើរការសង្វៀនប្រដាល់ថ្នាល និងសង្វៀនកម្រិតអន្តរជាតិ

ឧកញ៉ាកោះក្របី — Sat, 08 Jul 2023 04:13:20 +0000

ក្រុមហ៊ុន Galaxy Navatra Group សម្ពោធដាក់ដំណើរការក្លិប ហ្គាឡាក់ស៊ី ណាវ៉ាត្រា អេភូថង គុនខ្មែរ ដែលជាសង្វៀនប្រដាល់ថ្នាល និងសង្វៀនកម្រិតអន្តរជាតិ កាលពីរសៀលថ្ងៃទី៧ ខែកក្កដា ឆ្នាំ២០២៣ នៅក្រោយផ្សារព្រៃទទឹងតាមបណ្ដោយផ្លូវជាតិលេខ៣។

ពិធីសម្ពោធក្លិបប្រដាល់គុនខ្មែរដ៏ធំមួយនេះ មានការអញ្ជើញចូលរួមពីឧកញ៉ា ឡេង ប្រុស តំណាងអ្នកឧកញ៉ា ឡេង ណាវ៉ាត្រា អគ្គនាយកក្រុមហ៊ុន ហ្គាឡាក់ស៊ី ណាវ៉ាត្រា គ្រុប ឯកឧត្តម និន ភារម្យ អនុប្រធានសហព័ន្ធប្រដាល់គុនខ្មែរ ឯកឧត្តម ជា លីសែ ជំនួុយការអ្នកឧកញ៉ា ឡេង ណាវ៉ាត្រា ស្តេចប្រដាល់ អេភូថង រួមទាំងភ្ញៀវកិត្តិយស អ្នកសារព័ត៌មាន កីឡាករ-កីឡាការិនីគុនខ្មែរជាច្រើនរូប។

នៅក្នុងឱកាសសន្និសីទសារព័ត៌មាន ឧកញ៉ា ឡេង ប្រុស មានប្រសាសន៍ថា ក្លិបប្រដាល់គុនខ្មែរ កាឡាក់ស៊ី ណារ៉ាត្រា អេភូថង បានកំណត់គោលដៅច្បាស់លាស់ និងមានទស្សនវិស័យយ៉ាងវែងឆ្ងាយ ដោយកំណត់គោលដៅធ្វើយ៉ាងណាពង្រីកវិសាលភាពនៃក្បាច់គុនបុរាណដូនតាខ្មែរ ឆ្ពោះទៅកម្រិតស្តង់ដារអន្តរជាតិ និងឲ្យពិភពលោកស្គាល់កាន់តែច្បាស់។

លោកឧកញ៉ាបន្តថា ជាការពិតទស្សនវិស័យរបស់ក្លិបប្រដាល់ កាឡាក់ស៊ី ណារ៉ាត្រា អេភូថង គឺមានច្បាស់លាស់ដើម្បីលើកកម្ពស់ដល់វិស័យគុនខ្មែរឲ្យកាន់តែមានភាពរីកចំរើន ដែលមានដូចជាហេដ្ឋារចនាសម្ពន្ធសមរម្យ សង្វៀនត្រូវតាមស្តង់ដារអន្តរជាតិ មានបន្ទប់សម្រាកសម្រាប់កីឡាករ-កីឡាការិនីស្រស់ស្អាត និងអនាម័យ ព្រមទាំងមានការយកចិត្តទុកដាក់មើលថែកីឡាករ ដោយផ្ដល់ការហូបចុកគ្រប់គ្រាន់ ថែមទាំងមានប្រាក់បៀវត្សប្រចាំខែថែមទៀតផង។

បើតាមលោកឧកញ៉ា ដើមហេតុនៃការចុចយកក្លិបប្រដាល់អេភូថង ជាដៃគូ ព្រោះលោកមានគោលបំណងរក្សានូវតម្លៃ និងស្នាដៃរបស់លោកអេ ភូថង ក្នុងនាមជាស្ដេចប្រដាល់របស់កម្ពុជា។ លោកពិតជាស្រលាញ់ និងស្ងើចសរសើរដល់លោក អេ ភូថង កាលនៅជាកីឡាករគឺកម្រមានដៃគូយកឈ្នះលោកបានណាស់ ហេតុដូច្នេះក្នុងនាមជាអ្នកដែលស្រលាញ់ដល់ក្បាច់គុនដូនតាខ្មែរ និងមើលឃើញពីស្នាដៃដ៏ល្អរបស់លោក អេ ភូថង ទើបក្រុមហ៊ុន កាឡាក់ស៊ី សម្រេចចុចយកក្លិបអេភូថង ជាដៃគូសហការតែម្ដង។

ជុំវិញការចាប់ដៃគូរវាងក្រុមហ៊ុន និងលោក អេភូថង បានកំណត់យ៉ាងហោចណាស់មានរយៈពេល៥ឆ្នាំ ហើយក្នុងកំឡុងពេលនេះលោកឧកញ៉ា ឡេង ប្រុស ជឿថា នឹងអាចពង្រីកវិសាលភាពនៃក្បាច់គុនប្រដាល់ និងជួយពង្រឹងដល់ក្មេងៗជំនាន់ក្រោយឲ្យកាន់តែខ្លាំងពូកែ ដើម្បីប្រជែងប្រទេសជិតខាង។

ជាមួយគ្នានោះដែរលោក អេ ភូថង ក្នុងនាមជាបុគ្គលដែលមានបទពិសោធជោគជាំនៅលើវិថីប្រដាល់គុនខ្មែរ លោកមើលឃើញថា ការលូកដៃរបស់អ្នកឧកញ៉ា ឡេង ណារ៉ាត្រា និងក្រុមហ៊ុន កាឡាក់ស៊ី ក្នុងវិថីប្រដាល់នេះពិតជាអាចជួយដល់វិស័យគុនខ្មែរមួយផ្នែកធំ ពិសេសនោះលោកជឿថា ប្រដាល់គុនខ្មែរនឹងកាន់តែល្បីសុះសាយជាក់ជាមិនខានឡើយ។

ទន្ទឹមនេះ លោកបានធ្វើការសន្យាថា នឹងជ្រើសរើសយកកីឡាករពិសេសៗ និងខ្លាំងៗ មកប្រកួតនៅសង្វៀន ព្រៃទទឹង ដែលធ្វើការប្រកួតនៅរៀងរាល់ចុងសប្ដាហ៍ សៅរ៍-អាទិត្យ រាល់ខែ ដើម្បីធ្វើយ៉ាងណាឲ្យសង្វៀនប្រដាល់មួយនេះក្លាយជាសង្វៀនល្បីមួយនៅកម្ពុជា និងអន្តរជាតិនាពេលអនាគត៕

The post ក្លិបហ្គាឡាក់ស៊ី ណាវ៉ាត្រា អេភូថងគុនខ្មែរ ដាក់ឱ្យដំណើរការសង្វៀនប្រដាល់ថ្នាល និងសង្វៀនកម្រិតអន្តរជាតិ appeared first on .