ក្ស័យធន

ក្នុងឆ្នាំ២០២៣ អត្រាក្ស័យធនរបស់ក្រុមហ៊ុនអាមេរិក កើនខ្ពស់កប់ពពក

ឧកញ៉ាសំពៅ — Thu, 04 Jan 2024 04:58:00 +0000

ការប្រកាសក្ស័យធនរបស់ក្រុមហ៊ុនអាមេរិកនៅក្នុងឆ្នាំ២០២៣ មានការកើនឡើងរហូតដល់ទៅ ១៨% បើធៀបនឹងឆ្នាំ២០២២ ដោយសារអត្រាការប្រាក់ខ្ពស់ ការផ្ដល់ប្រាក់កម្ចីមានភាពតឹងតែង និងចំហាយសេសសល់ពីវិបត្តិជំងឺរាតត្បាត នៅមិនទាន់ដោះស្រាយរួចរាល់នៅឡើយ។

យោងតាមការចុះផ្សាយពីសារព័ត៌មាន Reuters បានរាយការណ៍ថា អត្រាសរុបនៃការប្រកាសក្ស័យធនរបស់ក្រុមហ៊ុនអាមេរិក ក្នុងឆ្នាំ២០២៣ មានចំនួន ៤៤៥ ១៨៦ក្រុមហ៊ុន បានកើនឡើងពី ៣៧៨ ៣៩០ក្រុមហ៊ុនកាលពីឆ្នាំ២០២២។

ការប្រកាសក្ស័យធនរបស់ក្រុមហ៊ុនអាមេរិក ត្រូវបានគេរំពឹងថា នឹងអាចបន្តកើតមានទៀតនៅឆ្នាំ២០២៤ ប៉ុន្តែតួលេខខាងលើនេះ ត្រូវបានគេអះអាងថា មានតិចតួចជាងកាលពីឆ្នាំ២០១៩ ដែលមានក្រុមហ៊ុនប្រកាសក្ស័យធនរហូតដល់ ៧៥៧ ៨១៦ក្រុមហ៊ុនឯណោះ។

គួររំលឹកបន្តិចថា លក្ខខណ្ឌក្នុងការខ្ចីប្រាក់ពីធនាគារ សម្រាប់ក្រុមហ៊ុននីមួយៗ គឺត្រូវបានរឹតបន្តឹងជាខ្លាំងក្នុងរយៈពេល ២ឆ្នាំកន្លងមកនេះ ដោយសារតែធនាគារកណ្ដាលបានដំឡើងការប្រាក់ខ្ពស់ខ្លាំង ដើម្បីទប់ស្កាត់វិបត្តិអតិផរណា ប៉ុន្តែវាបានធ្វើឲ្យក្រុមហ៊ុនជាច្រើនជួបហានិភ័យ ដោយសារតែការប្រាក់ធនាគារមានកម្រិតខ្ពស់ខ្លាំងពេក និងពិបាកក្នុងការខ្ចីប្រាក់បន្ថែម៕

The post ក្នុងឆ្នាំ២០២៣ អត្រាក្ស័យធនរបស់ក្រុមហ៊ុនអាមេរិក កើនខ្ពស់កប់ពពក appeared first on .

ក្រុមហ៊ុនខ្នាតយក្សចិនមួយ ប្រកាសក្ស័យធន ក្រោយបំណុលកើនដល់ ៦៤ពាន់លានដុល្លារ

ឧកញ៉ាសាមញ្ញ — Fri, 24 Nov 2023 00:55:00 +0000

ក្រុមហ៊ុនលំដាប់ប្រទេសចិន Zhongzhi Enterprise Group បានប្រាប់ក្រុមវិនិយោគិនថា ខ្លួនកំពុងប្រកាសក្ស័យធន ជាមួយនឹងបំណុលសរុបកើនឡើងរហូតដល់ ៦៤ពាន់លានដុល្លារ ពោលគឺច្រើនជាងចំនួនទ្រព្យសម្បត្តិសរុបរបស់ខ្លួនទ្វេដង ខណៈដែលក្រុមហ៊ុនមួយនេះ កំពុងបន្តធ្លាក់ចូលក្នុងវិបត្តិវិស័យអចលនទ្រព្យកាន់តែជ្រៅទៅ។ នេះបើតាមការចុះផ្សាយពីសារព័ត៌មាន CNA។

ក្រុមហ៊ុន ដែលបានរងផលប៉ះពាល់យ៉ាងខ្លាំង ដោយសារតែការធ្លាក់ចុះនៃវិស័យអចលនទ្រព្យរបស់ប្រទេសចិនមួយនេះ បានធ្វើការសុំទោសទៅកាន់ក្រុមវិនិយោគិនរបស់ខ្លួន នៅក្នុងលិខិតមួយ ដែលបាននិយាយថា បច្ចុប្បន្នក្រុមហ៊ុន កំពុងមានបំណុលសរុបចន្លោះពី ៤២០ពាន់លានយ៉ន់ (៥៨ពាន់លានដុល្លារ) ដល់ ៤៦០ពាន់លានយ៉ន់ (៦៤ពាន់លានដុល្លារ)។

គួរឲ្យដឹងថា ចំពោះចំនួនបំណុលនេះ គឺច្រើនជាងទ្រព្យសម្បត្តិសរុបរបស់ក្រុមហ៊ុន Zhongzhi ទ្វេរដង ដែលមានប្រហែល ២០០ពាន់លានយ៉ន់ (២៧ពាន់លានដុល្លារ) ។នេះបើយោងតាមលិខិតដែលត្រូវបានចេញផ្សាយកាលពីថ្ងៃពុធ។

ចំពោះវិបត្តិក្នុងវិស័យអចលនទ្រព្យកាន់តែអាក្រក់ទៅៗ ធ្វើឲ្យក្រុមហ៊ុន Zhongzhi ដែលអាស្រ័យផលប្រយោជន៍ពីអាជីវកម្មដែលខ្លួនមាន ចាប់ពីការជីកយករ៉ែ រហូតដល់ការគ្រប់គ្រងអចលនទ្រព្យ បាននិយាយនៅក្នុងលិខិតនោះថា ដោយសារទ្រព្យសកម្មរបស់ក្រុមមានចំនួនតិចជាងបំណុល ចាំបាច់ត្រូវប្រកាសក្ស័យធន ដើម្បីគ្រប់គ្រងហានិភ័យលើប្រតិបត្តិការរបស់ខ្លួនជាបន្តបន្ទាប់។

លើសពីនេះ ក្រុមហ៊ុន Zhongzhi បាននិយាយថា ៖”ក្រុមហ៊ុនសូមអភ័យទោសយ៉ាងជ្រាលជ្រៅចំពោះការខាតបង់ ដែលប៉ះពាល់យ៉ាងខ្លាំងដល់អ្នកវិនិយោគ។ យើងយល់ច្បាស់អំពីភាពបន្ទាន់ សារៈសំខាន់ និងភាពធ្ងន់ធ្ងរនៃការដោះស្រាយហានិភ័យទាំងមូល” ៕

The post ក្រុមហ៊ុនខ្នាតយក្សចិនមួយ ប្រកាសក្ស័យធន ក្រោយបំណុលកើនដល់ ៦៤ពាន់លានដុល្លារ appeared first on .

អត្រាក្រុមហ៊ុនក្ស័យធននៅប្រទេសហូឡង់ កំពុងបង្ហាញក្ដីបារម្ភខ្លាំងនៅអឺរ៉ុប

ឧកញ៉ាសំពៅ — Wed, 12 Apr 2023 06:56:00 +0000

ចំនួនក្រុមហ៊ុនដែលបានប្រកាសក្ស័យធននៅប្រទេសហូឡង់ កំពុងធ្វើឲ្យស្ថានការណ៍នៅសហភាពអឺរ៉ុបកាន់តែច្របូកច្របល់ខ្លាំង ពោលវាមានច្រើនជាងទ្វេដងគិតត្រឹមត្រីមាសទីមួយនេះ។

យោងតាមការចុះផ្សាយពី NL Times បានរាយការណ៍ថា ហាងកាហ្វេ ភោជនីយដ្ឋាន ហាងលក់ទំនិញរាយ ជាច្រើនទទួលផងប៉ះពាល់ជាខ្លាំង ឈានដល់ការប្រកាសក្ស័យធនបញ្ចប់អាជីវកម្មតែម្ដង។

ក្រុមហ៊ុនប្រមាណ ៧៨១ បានប្រកាសក្ស័យធន គិតចន្លោះពីខែមករា ដល់ខែមីនា ដែលច្រើនជាងឆ្នាំទៅដែលមានត្រឹម ៥០៦ ប៉ុណ្ណោះ ខណៈចំពោះហាងកាហ្វេ និងភោជនីយដ្ឋានវិញ កើនឡើងជិត ៣ដង ដែលបានបិទទ្វារមានរហូតដល់ ៥៤ហាង។

មូលហេតុចំបងដែលធ្វើឲ្យក្រុមហ៊ុនជាច្រើនមិនអាចបន្តដំណើរអាជីវកម្មនៅប្រទេសមានសេដ្ឋកិច្ចធំបំផុតទី ៥ ប្រចាំ EU ដោយសារការកើនឡើងនៃតម្លៃប្រេងឥន្ធនៈ និងអត្រាអតិផរណាខ្ពស់ខ្លាំងពេក៕

The post អត្រាក្រុមហ៊ុនក្ស័យធននៅប្រទេសហូឡង់ កំពុងបង្ហាញក្ដីបារម្ភខ្លាំងនៅអឺរ៉ុប appeared first on .

ស្ដេចត្រាញ់អចលនទ្រព្យហុងកុងប្រកាសក្ស័យធនតាមសាលក្រម ក្រោយគ្មានលទ្ធភាពសងបំណុល

ឧកញ៉ាសំពៅ — Thu, 14 Jul 2022 08:11:32 +0000

កាលពីពេលថ្មីៗនេះ លោក Pan Sutong វិនិយោគិនលើវិស័យអចលនទ្រព្យដ៏មានមុខមាត់នៅហុងកុង ត្រូវបានតុលាការសម្រេចឲ្យលោកប្រកាសក្ស័យធន ក្រោយគ្មានសមត្ថភាពសងបំណុលបាន។

នៅក្នុងសាលក្រមប្រកាសដោយតុលាការ គឺតម្រូវឲ្យលោក Pan ត្រូវតែបោះបង់ក្រុមហ៊ុន Silver Starlight Ltd បន្ទាប់ពីមិនអាចសងបំណុលគេបាន រាប់ទាំងការជំពាក់ធនាគារ China Citic Bank Corp ៨ ពាន់លានដុល្លារហុងកុង ឬប្រមាណ ១ ពាន់លានដុល្លារអាមេរិកកាលពីឆ្នាំ ២០១៩។

សូមជម្រាបដែរថា ក្នុងចំណោមមហាសេដ្ឋីអាស៊ីទាំងអស់ លោក Pan រៀងដុនដាបជាងគេបន្តិច ដោយសារទ្រព្យសម្បត្តិរបស់លោកមានការថយចុះខ្លាំង ក៏ព្រោះតែតម្លៃភាគហ៊ុន Goldin Financial Holdings Ltd ដាំក្បាលចុះ ដ្បិតទីផ្សារអចលនទ្រព្យនៅហុងកុងកំពុងផ្ដល់សញ្ញាអវិជ្ជមាន។

ជាលទ្ធផល អតីតមហាសេដ្ឋីម្នាក់នេះរបូតលុយប្រមាណ ២៧ ពាន់លានដុល្លារ ហើយកាលពីខែមុនលោកបានលាឈប់ពីតំណែងជាប្រធានក្រុមហ៊ុននៃក្រុមហ៊ុន Goldin Financial ទៀតផង។

គួសរំលឹកដែរថា ចាប់ពីខែឧសភា ២០១៧ មកទល់ខែកញ្ញា ២០២០ លោក Pan និង Goldin Financial បានជំពាក់បំណុលប្រមាណ ៣៨ ពាន់លានដុល្លារហុងកុង ឬប្រហែលជិត ៥ ពាន់លានដុល្លារ ពីការលក់អចលនទ្រព្យ ៤ កន្លែងនៅហុងកុង។ នេះបើតាមទិន្នន័យពីផ្សារហ៊ុន និង Bloomberg៕

The post ស្ដេចត្រាញ់អចលនទ្រព្យហុងកុងប្រកាសក្ស័យធនតាមសាលក្រម ក្រោយគ្មានលទ្ធភាពសងបំណុល appeared first on .

អ្នកជំនួញនិរទេសខ្លួនពីចិន Guo Wengui ប្រកាសក្ស័យធន ក្រោយជាប់បំណុលវ័ណ្ឌក

ឧកញ៉ាសំពៅ — Thu, 17 Feb 2022 08:24:19 +0000

កាលពីពេលថ្មីៗនេះ លោក Guo Wengui ដែលត្រូវបានគេស្គាល់ថា ជាអ្នកជំនួញដែលត្រូវបាននិរទេសចេញពីប្រទេសចិន និងជាដៃគូអាជីវកម្មរបស់អតីតទីប្រឹក្សាហិរញ្ញវត្ថុរបស់អតីតប្រធានាធិបតី Donald Trump គឺលោក Steve Bannon បានប្រកាសក្ស័យធន ក្រោយតុលាការបញ្ជាឲ្យលោកសងបំណុលប្រមាណ ១៣៤ លានដុល្លារ។

បើតាមសម្ដីរបស់លោក Guo ដែលមានឈ្មោះក្រៅ Miles Kwok ឬ Kwok Ho Wan នៅក្នុងញត្តិបានឲ្យដឹងថា បំណុលរបស់លោកទាំងអស់ គឺមិនជាប់ពាក់ព័ន្ធនឹងដំណើរការអាជីវកម្ម ឬក៏ទាក់ទងនឹងអតិថិជនណាម្នាក់ឡើយ ដោយវាគឺទាក់ទងនឹងការចំណាយលើវិវាទ ការទាមទារ និងការវិនិច្ឆ័យទៅវិញ។

ដោយឡែក កាលពីសប្ដាហ៍មុនតុលាការបានទុកពេលឲ្យលោក Guo ៥ថ្ងៃក្នុងការបង់ថ្លៃពិន័យ ក្រោយល្មើសបញ្ជាតុលាការដែលតម្រូវឲ្យនាវាផ្ទាល់ខ្លួនរបស់លោកត្រូវចតទុកទីក្រុង New York តែវាបែរជាធ្វើដំណើរទៅប្រទេស Bahamas ទៅវិញ ស្របពេលលោកអះអាងថា មិនមែនជាម្ចាស់កម្មសិទ្ធិនៃនាវាមួយនោះ។

លោក Guo បានអះអាងថា លោកបានជាប់បំណុលមនុស្សប្រមាណពី ៥០ ទៅ ៩៩ នាក់ ដោយទ្រព្យសម្បត្តិរបស់លោកនាពេលបច្ចុប្បន្នគឺមានចន្លោះពី ៥ ទៅ ១០ ម៉ឺនដុល្លារ ខណៈបំណុលវិញគឺវ័ណ្ឌក ពោលចន្លោះពី ១០០ ទៅ ៥០០ លានដុល្លារឯណោះ៕

ប្រភព: Yahoo

The post អ្នកជំនួញនិរទេសខ្លួនពីចិន Guo Wengui ប្រកាសក្ស័យធន ក្រោយជាប់បំណុលវ័ណ្ឌក appeared first on .

ក្ស័យធន​