រាជរដ្ឋាភិបាល សម្រេចកែសម្រួលផ្ទៃដីជាង៣៤០០ហិកតា ពីតំបន់៣បញ្ចូលមកតំបន់២នៃតំបន់បឹងទន្លេសាប ក្នុងខេត្តពោធិ៍សាត់

ឧកញ៉ា ឆ្នាំងដី — Sat, 28 May 2022 03:30:41 +0000

រាជរដ្ឋាភិបាលកម្ពុជា បានចេញអនុក្រឹត្យកែសម្រួលផ្ទៃដីទំហំ ៣៤៤៨ហិកតា ៧៧អា ចេញពីតំបន់៣ បញ្ចូលមកតំបន់២ នៃតំបន់បឹងទន្លេសាប ស្ថិតក្នុងភូមិសាស្ដ្រខេត្តពោធិ៍សាត់ និងប្រគល់ជូនប្រជាពលរដ្ឋប្រើប្រាស់ និងអាស្រ័យផល។

នៅក្នុងអនុក្រឹត្យដែលចុះហត្ថលេខាដោយសម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា កាលពីថ្ងៃទី២៧ ខែឧសភា ឆ្នាំ២០២២ បានសម្រេច «កែសម្រួលផ្ទៃដីទំហំ ៣៤៤៨ ហិកតា ៧៧ អា ស្ថិតក្នុងភូមិសាស្ត្រខេត្តពោធិ៍សាត់ ចេញពីតំបន់៣នៃបឹងទន្លេសាប ដែលកំណត់ដោយអនុក្រឹត្យលេខ ១៩៧ អនក្រ.បក់ ចុះថ្ងៃទី២៩ ខែសីហា ឆ្នាំ២០១១ បញ្ចូលមកតំបន់២ និងប្រគល់ជូនប្រជាពលរដ្ឋចំនួន ១៦៥៨គ្រួសារ ប្រើប្រាស់ និងអាស្រ័យផល។

ក្នុងនោះ រួមមានឃុំកំពង់ពោធិ៍ ឃុំកំពង់លួង់ ឃុំអន្សាចំបក់ ឃុំអូរសណ្តាន់ ស្រុកក្រគរ ដីទំហំ ១,១២២ហិកតា ៤៥អា ជូនប្រជាពលរដ្ឋចំនួន៧០៦គ្រួសារ។ ឃុំកញ្ជរ ឃុំរាំងទិល ឃុំស្យា ឃុំស្រែស្តុក ស្រុកកណ្ដៀង ដីទំហំ ១,១៦៩ហិកតា ៧២អា ជូនប្រជាពលរដ្ឋចំនួន៥៨៥គ្រួសារ។ និងឃុំបឹងបត់កណ្តោល ឃុំមេទឹក និងឃុំអូរតាប៉ោង ស្រុកបាកាន ដីទំហំ ១,១៥៦ហិកតា ៦០អា ជូនប្រជាពលរដ្ឋចំនួន៣៦៧គ្រួសារ៕

The post រាជរដ្ឋាភិបាល សម្រេចកែសម្រួលផ្ទៃដីជាង៣៤០០ហិកតា ពីតំបន់៣បញ្ចូលមកតំបន់២នៃតំបន់បឹងទន្លេសាប ក្នុងខេត្តពោធិ៍សាត់ appeared first on .

រដ្ឋាភិបាលកម្ពុជា សម្រេចឲ្យសាងសង់ពហុកីឡដ្ឋានតម្លៃខ្ទង់លានដុល្លារនៅខេត្តពោធិ៍សាត់ ខណៈបច្ចុប្បន្នកំពុងដោះស្រាយបញ្ហាទំនាស់ដីធ្លី

ឧកញ៉ាកោះក្របី — Sun, 06 Feb 2022 08:37:15 +0000

រាជរដ្ឋាភិបាល គ្រោងសាងសង់ពហុកីឡដ្ឋានសម្តេចតេជោ ហ៊ុន សែន នៅខេត្តពោធិ៍សាត់ ក្នុងតម្លៃខ្ទង់លានដុល្លារ ដែលនឹងត្រូវចាប់ដំណើរការសាងសង់នៅឆ្នាំ២០២២នេះ ដើម្បីបន្សល់ទុកជាកេរ្តិ៍មរតកនិងឆ្លើយតបទៅនឹងភាពរីកចម្រើននៃវិស័យកីឡានៅកម្ពុជា។ នេះបើតាមលោក កែវ រតនៈ អគ្គនាយកអគ្គិសនីកម្ពុជា និងជាប្រធានក្រុមការងាររាជរដ្ឋាភិបាល ចុះមូលដ្ឋានស្រុកក្រគរ និងស្រុកកណ្តៀង ក្នុងពិធីជួបសំណេះសំណាល និងនិមន្តព្រះសង្ឃប្រោះព្រំឆ្នាំថ្មីដល់ប្រជាពលរដ្ឋស្រុកក្រគរ ពេលកន្លងទៅ។

លោក កែវ រតនៈ បញ្ជាក់ថា៖ «មិនខុសពីឆ្នាំនេះទេ នឹងមានការបុគគ្រឹះសាងសង់ មជ្ឈមណ្ឌលពហុកីឡាដ្ឋាន សម្តេចតេជោ នៅវាលយន្តហោះសម្តេចយសនេះហើយ។ បច្ចុប្បន្ននេះយើងបានដោះស្រាយបញ្ហាទំនាស់ដីធ្លី និងបានដោះស្រាយសំណងផលប៉ះពាល់បានរួចរាល់ហើយដែរ»។

លោកបន្តថា៖ «យើងក៏បានឈូសឆាយ ចាក់ដីរួចរាល់ និងបន្តធ្វើរបងឱ្យបានឆាប់បំផុត មុននឹងឈានដល់ការសាងសង់។ ទន្ទឹមនឹងនោះ ក្រុមការងារ ក៏បាននឹងកំពុងត្រៀមរៀបចំធ្វើផ្លូវក្រាលកៅស៊ូ ប្រវែងជិត៣គីឡូម៉ែត្រ នៅរ៉បនឹងទីតាំងពហុកីឡដ្ឋាននេះ តភ្ជាប់ពីផ្លូវជាតិលេខ៥ ឆ្ពោះទៅវត្តសម្តេចយស ដែលគម្រោងនេះ នឹងចាប់ដំណើរនៅអំឡុងខែកុម្ភៈនេះ»។

បើតាមលោក កែវ រតនៈ សំណង់ពហុកីឡដ្ឋាននេះ នឹងក្លាយជាពហុកីឡដ្ឋានដែលធំជាងគេបង្អស់ សម្រាប់ភូមិភាគ រាប់គិតចាប់ពីខេត្តកំពង់ឆ្នាំង រហូតដល់ខេត្តបាត់ដំបង។ គម្រោងពហុកីឡដ្ឋាននេះ នឹងត្រូវសាងសង់នៅលើផ្ទៃដីប្រមាណ២៥ហិកតា ស្ថិតក្នុងភូមិវាលវង់ ឃុំស្នាអន្សា ស្រុកក្រគរ ខេត្តពោធិ៍សាត់។

សូមបញ្ជាក់ថា ពហុកីឡដ្ឋាននេះសាងសង់ឡើង ដើម្បីអភិវឌ្ឍវិស័យកីឡារបស់កម្ពុជា និងមួយផ្នែកទៀត សម្រាប់កម្ពុជាឈានឆ្ពោះទៅធ្វើជាម្ចាស់ផ្ទះ រៀបចំការប្រកួតកីឡាតំបន់អាស៊ាន «Sea Game» នៅឆ្នាំ២០២៣។ ពហុកីឡាដ្ឋាននេះ រួមមានទីលានបាល់ទាត់ខ្នាតអន្តរជាតិ, ទីលានមហោស្រព, ទីលានបាល់ទះ, ទីលានបាល់បោះ, ទីលានរត់ប្រណាំង, ទីលានវាយសី, កន្លែងអង្គុយទស្សនា, កន្លែងហាត់ប្រាណ, ប្រព័ន្ធផ្លូវខ្វាត់ខ្វែង (៨ទៅ១០ម៉ែត្រ), វាលស្មៅ, កន្លែងក្មេងលេង, កន្លែងអង្គុយលេង, ស្រះទឹក និងកន្លែងចតរថយន្ត។ល៕

The post រដ្ឋាភិបាលកម្ពុជា សម្រេចឲ្យសាងសង់ពហុកីឡដ្ឋានតម្លៃខ្ទង់លានដុល្លារនៅខេត្តពោធិ៍សាត់ ខណៈបច្ចុប្បន្នកំពុងដោះស្រាយបញ្ហាទំនាស់ដីធ្លី appeared first on .

ខេត្ត​ពោធិ៍សាត់

ខេត្តពោធិ៍សាត់