គណៈកម្មាធិការជាតិជំរុញចលនាភូមិមួយផលិតផលមួយជំរុញខ្សែច្រវ៉ាក់ផលិតកូនមាន់ និងការចិញ្ចឹមមាន់យកសាច់ឲ្យបាន២៥លានក្បាល នៅទូទាំង២៥រាជធានី ខេត្ត ក្នុង១ឆ្នាំៗ

រ៉េត សុកធា — Fri, 23 Jan 2026 06:32:05 +0000

(ភ្នំពេញ)៖ ឯកឧត្តម ផល សុជាតិ អគ្គលេខាធិការ គណៈកម្មការធិការជាតិជំរុញចលនាភូមិមួយផលិតផលមួយ បានជំរុញ លើកទឹកចិត្ត និងគាំទ្រទៅដល់គម្រោងខ្សែច្រវ៉ាក់ផលិតកូនមាន់ និងការចិញ្ចឹមមាន់យកសាច់ ចំនួន២៥លានក្បាល នៅទូទាំង២៥រាជធានី-ខេត្ត ក្នុង១ឆ្នាំៗ។

ការលើកឡើងបែបនេះរបស់ ឯកឧត្តម ផល សុជាតិ បានធ្វើឡើងនៅថ្ងៃទី២២ ខែមករា ឆ្នាំ២០២៦ នៅក្នុងពិធីចុះអនុស្សរណៈនៃកិច្ចព្រមព្រៀងរវាងក្រុមហ៊ុនចំនួន៣ គឺក្រុមហ៊ុន 1. THOMLANG JAPAN CO., LTD. 2. ក្រុមហ៊ុន HALAL PARK CAMBODIA; និង 3. ក្រុមហ៊ុន D.C.O.N. Development & Import Export Co., Ltd. លើគម្រោងផលិតកូនមាន់ ចិញ្ចឹមមាន់យកសាច់ នៅទូទាំង២៥ រាជធានី ខេត្ត។

កិច្ចព្រមព្រៀងអនុវត្តគម្រោងរួមគ្នារបស់ក្រុមហ៊ុនទាំង៣ មានគោលបំណងដើម្បីលើកកម្ពស់សេដ្ធកិច្ចរបស់ប្រទេសកម្ពុជា តាមរយៈការជំរុញវិស័យកសិឧស្សាហកម្ម វិស័យសុវត្ថិភាពចំណីអាហារ និង សន្តិសុខស្បៀងអាហារទូទាំងប្រទេសកម្ពុជា ដោយផ្សារភ្ជាប់ជាមួយនឹងគណៈកម្មាធិការជាតិជំរុញចលនាភូមិមួយផលិតផលមួយ។

គម្រោងអាចនឹងជួយ ១. បង្កើនប្រាក់ចំណូលដល់បងប្អូនកសិករចិញ្ចឹមមាន់ ២. លើកកម្ពស់សន្តិសុខស្បៀង និងអាហារូបត្ថម្ភ ៣. វិនិយោគទាប តែបានផលចំណេញច្រើន និង ៤. លើកកម្ពស់អំណាចស្រ្តី

គោលដៅធំនៃគម្រោងគឺនឹងជំរុញឲ្យគ្រប់រាជធានី ខេត្ត ទាំង២៥ នៃព្រះរាជាណាចក្រកម្ពុជា ផលិតកូនមាន់ និងចិញ្ចឹមមាន់យកសាច់ឲ្យបាន១លានក្បាល ក្នុង១ខេត្ត។ ទីផ្សារដែលអាចស្រូបយកបានគឺការនាំចេញសម្រាប់យកជាចំណីអាហារប្រភេទ Halal ដែលមានក្រុមហ៊ុន Halal Park Cambodia ជាអ្នករ៉ាប់រងប្រមូលទិញ។

The post គណៈកម្មាធិការជាតិជំរុញចលនាភូមិមួយផលិតផលមួយជំរុញខ្សែច្រវ៉ាក់ផលិតកូនមាន់ និងការចិញ្ចឹមមាន់យកសាច់ឲ្យបាន២៥លានក្បាល នៅទូទាំង២៥រាជធានី ខេត្ត ក្នុង១ឆ្នាំៗ appeared first on .

កសិករមកពីប្រទេសថៃ ទទួលបានការបណ្តុះបណ្តាលឱ្យមានជំនាញអំពីការដាំដុះ បន្លែសុវត្ថិភាពក្នុងផ្ទះសំណាញ់

Kem sinath — Sat, 22 Nov 2025 01:37:29 +0000

ធនាគារARDB និងគណៈកម្មាធិការជាតិជំរុញចលនាភូមិមួយផលិតផលមួយ សហការរៀបចំវគ្គបណ្តុះបណ្តាលរយៈពេលខ្លីដល់កសិករមកពីប្រទេសថៃ ឱ្យមានជំនាញអំពីការដាំដុះ បន្លែសុវត្ថិភាពក្នុងផ្ទះសំណាញ់ កាលពីថ្ងៃទី២១ ខែវិច្ឆិកា ឆ្នាំ២០២៥។

កិច្ចសហការនេះមានការចូលរួមពី លោក សួង ណយ រដ្ឋលេខាធិការទីស្តីការគណៈរដ្ឋមន្រ្តី និងជាអនុប្រធានគណៈកម្មាធិការជាតិជំរុញចលនាភូមិមួយផលិតផលមួយ មានការសហការជាមួយធនាគារអភិវឌ្ឍន៍ជនបទនិងកសកម្ម សាខាខេត្តបាត់ដំបង និងការិយាល័យចល័តខេត្តកំពង់ធំ ព្រមទាំងបានដឹកនាំកសិករមកពីបណ្តាស្រុកទាំងអស់ចុះធ្វើទស្សនកិច្ចសិក្សានៅទីតាំងផ្ទាល់របស់សហគមន៍កសិកម្មតាសីសាមគ្គី។

ក្នុងដំណើរទស្សនកិច្ចផ្ទាល់នៅទីនោះ លោក សួង ណយ និងតំណាងធនាគារ ARDB លោក ណុប នុន ប្រធានសហគមន៍កសិកម្មតាសីសាមគ្គីក៏បានរៀបចំកម្មវិធីបណ្តុះបណ្តាលរយៈពេលខ្លីវគ្គទី៥ អំពីការដាំដុះ បន្លែសុវត្ថិភាពក្នុងផ្ទះសំណាញ់ដល់ប្រជាពលករមកពីប្រទេសថៃ ដោយបង្ហាញឲ្យឃើញពីការអនុវត្តផ្ទាល់និងកន្លែងសហគមន៍តែម្តង ដើម្បីឲ្យពួកគាត់ក្លាយជាបុគ្គលិកនិងមានចំណេះជំនាញច្បាស់លាស់លើការដាំដុះបន្លែ និងចិញ្ចឹមសត្វផងដែរ។

លើសពីនេះ បន្ទាប់ពីទទួលបានការបណ្តុះបណ្តាលវគ្គខ្លីពីអ្នកជំនាញរួចហើយនោះ កសិករទាំងនោះអាច យកចំណេះដឹងទៅអនុវត្តបាននៅក្នុងជីភាពរស់នៅប្រចាំថ្ងៃជាមួយនឹងការធ្វើកសិកម្មល្អ ដាំដុះបន្លែសុវត្ថិភាព នឹងបង្កើនប្រាក់ចំណូលបន្ថែមទៀតដល់គ្រួសារ ព្រមទាំងចូលរួមបង្កើតមូលដ្ឋានសេដ្ឋកិច្ចនៅជនបទថែមទៀតផង។

គួរឱ្យដឹងថា សហគមន៍កសិកម្មតាសីសាមគ្គីបានចាប់ផ្តើមដំបូងមានសមាជិកចំនួនតែ៦៥គ្រួសារប៉ុណ្ណោះ ដោយមានការដាំដុះតែនៅតាមទីវាលក្នុងស្រុកថ្មគោល តែបច្ចុប្បន្នសមាជិកមានការកើនឡើងដល់៣៧៤គ្រួសារ និងបានពង្រីកសកម្មភាពការងារដល់បណ្តាខេត្តផ្សេងៗទៀតសម្រាប់ពង្រីកទីផ្សារ បន្លែសុវត្ថិភាព ក្នុងផ្ទះសំណាញ់ មានខេត្តបាត់ដំបង សៀមរាប កំពង់ធំ កណ្តាល កំពង់ឆ្នាំង និងរាជធានីភ្នំពេញ៕

The post កសិករមកពីប្រទេសថៃ ទទួលបានការបណ្តុះបណ្តាលឱ្យមានជំនាញអំពីការដាំដុះ បន្លែសុវត្ថិភាពក្នុងផ្ទះសំណាញ់ appeared first on .