ថ្លែងក្នុងពិធីសម្ពោធដាក់ឱ្យដំណើរការជាផ្លូវការ រោងចក្រប្រព្រឹត្តកម្មទឹកស្អាតបាក់ខែងជំហានទី២ និងបើកការដ្ឋានសាងសង់ជំហានទី៣ កាលពីថ្ងៃទី២៥ ខែមិថុនា ឆ្នាំ២០២៤ លោក ហែម វណ្ណឌី រដ្ឋមន្រ្តីក្រសួងឧស្សាហកម្ម វិទ្យាសាស្រ្តបច្ចេកវិទ្យា និងនវានុវត្តន៍ បានឱ្យដឹងថា គម្រោងរោងចក្រប្រព្រឹត្តកម្មទឹកស្អាតបាក់ខែងជំហានទី៣ ដែលបានបើកការដ្ឋានសាងសង់នេះ នឹងគ្រោងប្រើថវិកាសរុបចំនួន ២៥៧ លានដុល្លារអាមេរិក។

លោកបន្តថា ថវិកាដែលគ្រោងប្រើនេះ បានមកពីប្រភពមូលនិធិរួមមាន ប្រាក់កម្ចីចំនួន ២១០ លានដុល្លារ ពីទីភ្នាក់ងារ AFD, ៥ លានដុល្លារ ដែលនៅសល់ពីជំហានទី១ និងជំហានទី២ របស់ AFD, និងការវិនិយោគចំនួន ៤២ លានដុល្លារ ពីរដ្ឋាករទឹកស្វយ័ត ក្រុងភ្នំពេញ ទន្ទឹមនឹងនេះ, សហភាពអឺរ៉ុបគ្រោងផ្តល់ជំនួយឥតសំណងចំនួន ១២ លានដុល្លារសម្រាប់គម្រោងនេះផងដែរ។

សូមបញ្ជាក់ថា គម្រោងរោងចក្រប្រព្រឹត្តកម្មទឹកស្អាតបាក់ខែងជំហានទី៣នេះ នឹងចូលរួមចំណែកផលិតទឹកស្អាត ដើម្បីផ្គត់ផ្គង់តាមតម្រូវការរបស់ប្រជាពលរដ្ឋនៅរាជធានីភ្នំពេញ។គម្រោងរោងចក្រនេះ នឹងប្រើប្រាស់រយៈពេលសាងសង់៣៦ខែ ពោលគឺបញ្ចប់នៅឆ្នាំ២០២៧។

សូមជម្រាបផងដែរថា គម្រោងសាងសង់រោងចក្រប្រព្រឹត្តកម្មទឹកស្អាតបាក់ខែងទាំង៣(រួមមានជំហានទី១, ២, និងទី៣)នេះ នឹងចំណាយថវិកាសរុបប្រមាណ ៦៦០លានដុល្លារអាមេរិក៕

The post គម្រោងរោងចក្រប្រព្រឹត្តកម្មទឹកស្អាតបាក់ខែងជំហានទី៣ តម្លៃជាង២០០លានដុល្លារ បើកការដ្ឋានសាងសង់ជាផ្លូវការ appeared first on .