ទាក់ទងនិងការប្រកបមុខរបរបង្កងនេះ តើប្រជាកសិករគួរតែចិញ្ចឹមបង្កងអូស្ត្រាលី ឬបង្កងធម្មជាតិ ដើម្បីបានប្រាក់ចំណូលយកទៅពង្រឹងសេដ្ឋកិច្ចក្នុងគ្រួសារ ខណៈបង្កងដៃខ្លីងាយស្រួលក្នុងការចិញ្ចឹមជាងបង្កងធម្មជាតិ?

បើតាមកសិករម្នាក់បាននិងកំពុងចិញ្ចឹមបង្កងអូស្ត្រាលី ឬបង្កងដៃខ្លីនៅខាងខេត្តតាកែវបានអះអាងថា បង្កងដៃខ្លីមកដល់ពេលនេះសំបូរទីផ្សារហើយតម្លៃលក់ជាមធ្យមមិនក្រោម១០ដុល្លារក្នុង១គីឡូក្រាម។

លោក អ៊ឹម បេ បានឱ្យដឹងថា« នៅពេលបច្ចុប្បន្ននេះបង្កងដៃខ្លី តម្លៃជាមធ្យមពី១០ដុល្លារឡើងទៅក្នុង១គីឡូក្រាម ហើយបើទោះជាតម្លៃលក់មិនបានថ្លៃដូចទៅនិងបង្កងធម្មជាតិក្នុងស្រុក យើងនៅតែបន្តចិញ្ចឹម ព្រោះមុខរបរនេះងាយស្រួលទំាងនៅក្នុងការមើលថែនិងការរកប្រាក់ចំណូល ជាងការប្រកបមុខរបរផ្សេងទៀត»។

លោកលើកឡើងថា «តាមគំនិតរបស់ខ្ញុំ បើកសិករឬអ្នកដែលចង់ចិញ្ចឹមបង្កងតែគ្មានបទពិសោធន៍ឬគ្មានចំណេះដឹង កសិករអាចសាកល្បងចិញ្ចឹមបង្កងដៃខ្លីនេះបាន បើទោះបីតម្លៃនៅលើទីផ្សារសព្វថ្ងៃនេះ លក់មិនបានថ្លៃដូចនិងបង្កងធម្មជាតិក៏ដោយ តែការចិញ្ចឹមវាមានភាពងាយស្រួល ពុំចំាបាច់ប្រើបច្ចេកទេសដូចទៅនិងបង្កងធម្មជាតិនៅក្នុងស្រុក។ កសិករគ្រាន់តែសាកល្បងជាមួយដើមទុនដំបូងត្រឹមតែ២លានរៀលសម្រាប់ទិញកូនបង្កងដៃខ្លីយកមកចិញ្ចឹមបំប៉ន ដើម្បីបានមេពូជបង្កើតកូនទុកចិញ្ចឹមដោយខ្លួនឯង ដោយពុំចំាបាច់ចំណាយប្រាក់ច្រើនទៅលើការទិញកូនបង្កងពីគេ ហើយនៅពេលយើងមានកូនបង្កងដាក់ចិញ្ចឹមដល់ត្រពំាងឬក្នុងស្រែអស់រយៈពេល៤ទៅ៥ខែឡើង នោះយើងនឹងចាប់ផ្តើមអាចរកប្រាក់ចំណូលបានសន្សឹមៗវិញហើយពីការលក់បង្កងដៃខ្លី»។

លោក អ៊ុក ហាក់ នាយរងខណ្ឌរដ្ឋបាលជលផលនៃមន្ទីរកសិកម្មខេត្តតាកែវ បានសង្កេតឃើញថាការចិញ្ចឹមបង្កងអូស្ត្រាលីនេះ នៅក្នុងទឹកដីខេត្តតាកែវក៏មានកសិករចិញ្ចឹមច្រើនគ្រួសារ ហើយវាងាយស្រួលក្នុងការចិញ្ចឹមជាងបង្កងធម្មជាតិក្នុងស្រុក ប៉ុន្តែទាក់ទងនិងទីផ្សារវាមិនដូចជាបង្កងដៃវែង ព្រោះប្រជាពលរដ្ឋនិយមហូបបង្កងដៃខ្លីវាមានចំនួនតិច។

លោកសង្កត់ធ្ងន់ថា«បើយើងក្រឡេកទៅមើលអ្នកចិញ្ចឹមបង្កងដៃខ្លីនៅខេត្តផ្សេងៗពីមុនមករហូតមកដល់បច្ចុប្បន្ននេះអ្នកចិញ្ចឹមស៊ឹងតែទុក អាងហាលចោលដោយសារតែទីផ្សារមិនសូវមានអ្នកកម្ម៉ង់ទិញឬតម្រូវការនៅលើទីផ្សារទាប ខុសពីបង្កងដៃវែងឬបង្កងធម្មជាតិក្នុងស្រុក»។

បើតាមមន្ត្រីជំនាញរូបនេះ ការចិញ្ចឹមបង្កងដៃខ្លីជាលក្ខណៈគ្រួសារ ឬធម្មតាៗវាមិនជាបញ្ហានោះទេសម្រាប់ទីផ្សារ តែបើកសិករចាប់យកធ្វើជាមុខរបរអាជីវកម្មវាមិនដូចជាការចិញ្ចឹមបង្កងធម្មជាតិ។ លើសពីនេះវាជា ប្រភេទពូជបង្កងនាំចូលពីខាងក្រៅហើយ នៅពេលណាវាមានបញ្ហាវាអាចចម្លងជំងឺឬធ្វើឱ្យប៉ះពាល់ដល់ធនធានធម្មជាតិដែលមានស្រាប់ហើយថែមទំាងមានតម្លៃក្នុងសេដ្ឋកិច្ចទៀតផង។

បើតាម លោក អ៊ឹម បេ មានគំនិតចង់ចិញ្ចឹមបង្កងធម្មជាតិដែរ តែនៅតំបន់របស់កសិកររូបនេះ ខ្វះប្រភពទឹក មិនអំណោយផលដល់ការចិញ្ចឹមបង្កងធម្មជាតិនៅក្នុងស្រុក។ តែលោកអ៊ឹម បេ អាចចិញ្ចឹមបង្កងដៃខ្លីនេះបាន ព្រោះវាងាយស្រួលជាងការចិញ្ចឹមបង្កងធម្មជាតិនាពេលសព្វថ្ងៃ៕

អត្ថបទ៖សារេត

The post តើកសិករគួរតែចិញ្ចឹមបង្កងអូស្ត្រាលី ឬបង្កងធម្មជាតិដើម្បីពង្រឹងសេដ្ឋកិច្ចនៅក្នុងគ្រួសារ? appeared first on .

លោក អ៊ឹម បេ អាយុជាង៥០ឆ្នំា រស់នៅភូមិប្រហ៊ូត សង្កាត់រការក្រៅ ក្រុងដូនកែវ ខេត្តតាកែវ បានឱ្យដឹងថា «ខ្ញុំចាប់ផ្តើមចិញ្ចឹមបង្កងដៃខ្លីនេះ នៅចុងឆ្នំា២០២២ ចំនួនមេបង្កងពូជប្រហែល២០ក្បាល ក្នុងមួយក្បាលថ្លៃ៨ដុល្លារអាមរិក ក្នុងគោលបំណងគឺចង់ចិញ្ចឹមទុកធ្វើជាម្ហូបសម្រាប់ក្រុមគ្រួសារប៉ុណ្ណោះ តែចិញ្ចឹមយូរទៅវាចេះតែកើនឡើងច្រើន ធ្វើឱ្យយើងពង្រីកអាងចិញ្ចឹមបន្ថែមជាបន្តបន្ទាប់រហូតមកដល់សព្វថ្ងៃ»។

លោកបន្តថា ក្នុងការចិញ្ចឹមបង្កងដៃខ្លីអស់រយៈពេល១ឆ្នំាកន្លងមកនេះ យើងលក់បង្កងបាន ៣០០គីឡូក្រាមហើយបើគិតជាសាច់ប្រាក់បាន ៣ពាន់ដុល្លារអាមេរិក ហើយនៅខែតុលា ឆ្នាំ២០២៣ខាងមុខនេះ យើងអាចប្រមូលផលបង្កងបានប្រហែល១តោន សម្រាប់លក់នៅលើទីផ្សារ។

បើតាមលោកអ៊ឹម បេ បន្ទាប់ពីមានសមត្ថភាពអាចចិញ្ចឹមបង្កងដៃខ្លី មានការរីកចម្រើននៅក្នុងទីតំាង លោក ក៏បានលក់មេបង្កងពូជជូនទៅប្រជពលរដ្ឋដែលចិញ្ចឹមបង្កងនៅក្នុងតំបន់ មួយក្បាលថ្លៃ៥ដុល្លារអាមេរិក និងកូនបង្កងមួយក្បាលថ្លៃ៥០០រៀល ខណៈបច្ចុប្បន្ននេះ លោកនៅមានមេបង្កងពូជ មេពងនិងកូនបង្កងសរុបប្រហែល៤ម៉ឺនក្បាល។

លោកសង្តត់ធ្ងន់ថា ការចិញ្ចឹមបង្កងអូស្ត្រាលីនេះងាយស្រួលក្នុងការចិញ្ចឹម ហើយសម្រាប់ប្រជាពលរដ្ឋមិនមានចំណេះដឹងផ្នែកបច្ចេកទេស ក៏អាចចិញ្ចឹមបានដែរ សំខាន់ឱ្យមានទីតំាងល្អ ហើយមានប្រភពទឹកគ្រាប់គ្រាន់។

លោកលើកឡើងថា មុនចូលមកដល់ការចិញ្ចឹមបង្កងដៃខ្លីមានដូចសព្វថ្ងៃនេះ ពីមុនក្រុមគ្រួសារបានសាកល្បងចិញ្ចឹមត្រីអណ្តែងប្រមាណ១ម៉ឺន៥ពាន់ក្បាល ត្រូវការចំណាយច្រើនពេក ទៅលើចំណី ហើយប្រឈមហានិភ័យ ថែមទំាងមិនសូវមានទីផ្សារល្អទៀតនោះ ក៏ឈប់ចិញ្ចឹម។ វាខុសពីការចិញ្ចឹមបង្កងនេះ វាស៊ីចំណីតិចក្នុង១ម៉ឺនក្បាលត្រូវការចំណាយប្រាក់អស់ប្រហែល៧ពាន់រៀល ក្នុងមួយថ្ងៃ ហើយសំបូរទីផ្សារដល់ពេលប្រមូលផល ។

លោកគូសបញ្ជាក់ថា «ការចិញ្ចឹមបង្កងដៃខ្លីនេះ បើសិនយើងមានផ្ទៃដីត្រឹមមួយហិកតា ក៏អាចរកបានប្រាក់ពី១ម៉ឺនទៅ២ម៉ឺនដុល្លារអាមេរិក ក្នុងមួយវគ្គ ពោលវាផ្តល់ប្រយោជន៍ច្រើនជាងយើងធ្វើស្រែ ចិញ្ចឹមមាន់ និងចិញ្ចឹមត្រី នាពេលបច្ចុប្បន្ន»។

បើតាមលោក អ៊ឹម បេ ការចិញ្ចឹមបង្កងដៃខ្លីនៅពេលសព្វថ្ងៃមានទំនុកចិត្តខ្លំាងលើមុខរបរមួយនេះ បានចំណាយប្រាក់រាប់ម៉ឺនដុល្លារអាមេរិក ទៅលើទិញដីពង្រីកទីតំាងចិញ្ចឹមបង្កងបន្ថែម ហើយនៅថ្ងៃខាងមុខ លោកមានគម្រោងពង្រីកការចិញ្ចឹមបង្កងនៅកន្លែងផ្សេង ដែលមានប្រភពទឹកគ្រប់គ្រាន់ ដើម្បីឱ្យមុខរបរមួយនេះកាន់តែមានភាពប្រសើរឡើង៕

អត្ថបទ៖សារេត

The post លោក អ៊ឹម បេ ចិញ្ចឹមបង្កងអូស្ត្រាលី ទុកធ្វើជាម្ហូបប្រចំាគ្រួសារ ក្លាយជាមុខរបររកប្រាក់បានរាប់ពាន់ដុល្លារអាមេរិក appeared first on .